Evangelio Juankwe

5 Ye bitikäre fiesta nitre judiokwe ye keteiti nuainbare, aune Jesús nikani mintukwäre Jerusalén kokwäre. 2 Ne madakäre, Jerusalén yete, Jukwe Oveja ye ken ñö okwä sribebare kädekata hebreore Betzata ye tä, aune bäre ta kä sribebare nänkäre.* 3 Kä yekänti nitre kwatí bren, kä drüne okwäte, ñan dikekä kwin aune ngrabare ruäre nakwaninkä* ye nämäne kitani tibienta. 4* —— 5 Yete ni brare iti nämäne abokän nämäne bren kä 38 te. 6 Ni brare ye nämäne kitani tibien jutuabare Jesuye aune kä kwatí te nämäne bren nämäne gare ie, aisete niarakwe ngwanintari ni yei: “¿Mä tö rabaita räre?”. 7 Ni bren ye käkwe niebare ie: “Däkien,* ti dimikaka ñaka ja kriakäre ñöte, ñöta nemen ngrenkä ngwane. Batire batire ti töta ja kriai ñöte ngwane, ni mada tärä niken ti käne aune tä ja krien ñöte”. 8 Jesukwe niebare ie: “¡Nüke krö! Camilla jakwe den kisete aune nän dikekä”. 9 Aune bengwairebe ni ye namaninta räre, camilla jakwe diani kisete kwe aune nikani dikekä.

Köbö ye köbö ja dükakäre* näire. 10 Ye medenbätä, nitre judío namani niere ni brare namaninta räre ye ie: “Matare köbö ja dükakäre. Aisete mä ñan raba camilla ngwen kisete”. 11 Akwa niarakwe niebare ietre: “Ni käkwe ti mirita räre käkwe nini tie ‘Camilla jakwe den kisete aune nän dikekä’”. 12 Niaratrekwe ngwanintari ie: “‘Camilla den kisete aune nän dikekä’, ¿ye nire käkwe nini mäi?”. 13 Akwa nirekwe ni brare ye mikaninta räre ñan nämäne gare ni brare yei, ñobätä ñan aune Jesús nianinkä nitre kwatí nämäne yete ye ngätäite.

14 Ye bitikäre, ni ye kwani templote Jesuye aune niebare kwe ie: “Mä nibirata räre. Ñan ja mika ngite mada, ne kwe kukwe bäri tare ñan rabadre bare mäbätä”. 15 Ni brare ye nikaninta aune Jesukwe mikaninta räre niebare kwe nitre judío ie. 16 Ye arabätä, nitre judío nämäne ja mike Jesús rüere, ñobätä ñan aune niara nämäne kukwe ne nuainne köbö ja dükakäre yete. 17 Akwa niara nämäne niere ietre: “Ti Rün tä sribire jankunu nükebe nengwane, aune tita sribire jankunu arato”. 18 Yebätä, nitre judío namani ja di ngwen bäri niara murie ketakäre, ñobätä ñan aune niara ñan nämäne köbö ja dükakäre mike täte, ne madakäre nämäne Ngöbö kädeke Rün kwe aune nämäne ja mike Ngöbö kwrere.

19 Ye medenbätä Jesukwe niebare ietre: “Ti niere metre munye, Monso ñan raba kukwe keteiti nuainne jire ja töi jeñebiti, tä Rün tuin dre nuainne ye aibe nuainta kwe. Ñobätä ñan aune jondron jökrä nuainta Rünkwe, ye erere arato Monso tä nuainne. 20 Ñobätä ñan aune Rün tä Monso kwe tarere aune dre nuainta kwe ye jökrä drieta kwe ie, aune kukwe ñan tuabare bäri kri nebiti ta driei kwe ie, ne kwe mun töi rabadre ñan krütare. 21 Ñobätä ñan aune Rün tä nitre krütanina gainkrö aune tä ja nire bien ietre, ye erere arato nire ie Monso tö ja nire biain ye ie tä bien. 22 Ñobätä ñan aune Rün ñan tä kukwe ükete ni jire iti ben, ñakare aune tä tö ngwen Monso ie aune kukwe ükadrete ni jökrä ben ye mikani kwe niara kisete, 23 ne kwe ni jökrä käkwe Monso mikadre ütiäte jai, tätre Rün mike ütiäte jai ye erere. Nire ñaka Monso mike ütiäte jai ñaka tä Rün, käkwe Monso juani, ye mike ütiäte jai. 24 Ti niere metre munye, nire tä ti kukwe nuin aune tä tödeke ni ti juanka ie, yekwe ja nire kärekäre tä aune ñan kukwe ükaite ben, ñakare aune ni krütanina akwa nengwane tä nire ye erere rabai.

25 Ti niere metre munye, kä rükai, metrere kä ye nüra, känti nitre krütanina ie Ngöbö Monsoi kukwei juruai aune nire nire käkwe kukwei mikani täte yekwe ja nire rabai. 26 Ñobätä ñan aune Rün die tärä ja nire biankäre, ye erere arato ja di biani kwe Monso ie ja nire biankäre. 27 Aune kukwe ükadrete ye mikani kwe niara kisete, ñobätä ñan aune niara abokän Ni Kä Nebätä Monsoi. 28 Mun ñan töi raba niä kukwe ne jiebiti, ñobätä ñan aune kä rükai känti nitre jökrä tä dobote* ie niara kukwei juruai 29 aune jataitre kä mrebiti, nitrekwe kukwe kwin nuainbare ye gaikröta nünankäre, aune nitrekwe kukwe käme nuainbare ye gaikröta kukwe ükatekäre bentre. 30 Ti ñan raba kukwe keteiti nuainne jire ja töi jeñebiti. Ti Rün tä dre niere tie ye ererebätä tita kukwe ükete, aune kukwe ükateta tikwe ye metre, ñobätä ñan aune ti töi rabadre bare ye ñan känänta tikwe, ñakare aune ni ti juanka töi rabadre bare känänta tikwe.

31 Ti aibe käkwe kukwe mikadre gare akwle jabätä ngwane, tikwe kukwe mikadre gare ye ñan metre. 32 Akwa ni mada tä kukwe mike gare tibätä, aune kukwe mikata gare kwe tibätä ye metre gare tie. 33 Munkwe nitre juani Juan känti, aune niarakwe kukwe metre yebätä kukwe mikani gare. 34 Akwa ni iti kukwe mikadre gare tibätä ye ti ñan ribere jire jai, mun rabadre kwäre yekäre tita kukwe ne niere. 35 Ni ye namani ñotra jutra nemen jankunu aune trä nebetekä ye kwrere, aune kä braibe te mun nämäne juto biare trä kwe käi ngwankäre juto krubäte jabätä. 36 Akwa tita kukwe mike gare ye bäri ütiäte Juankwe ye kräke, ñobätä ñan aune ti Rünkwe sribi nuain mananbare tie, abokän nuainta tikwe, ye tä mike gare metre ti Rünkwe ti juani. 37 Aune ti Rün, käkwe ti juani, niara ara käkwe kukwe mikani gare tibätä. Mun ñan niara kukwe nuabare aune tuabare jire, 38 aune niara kukwei ñaka tä mun brukwäte ñobätä ñan aune nire juani kwe ye ie mun ñan tödeke.

39 Munta ja tötike kwin Ngöbö Kukweibätä ñobätä ñan aune ye köböire ja nire kärekäre rabai munkwe munta nütüre. Aune ye ara tä kukwe mike gare tibätä. 40 Akwa yebiti ta, mun ñan tö näin ti jiebiti ne kwe ja nire rabadre munkwe. 41 Nitre tä ti käikitekä ye ti ñan kain ngäbiti. 42 Akwa, mun ñaka Ngöbö tarere ja brukwäte ye gare kwin tie. 43 Ti jatani ti Rün käbiti aune mun ñan tä ti kain ngäbiti. Akwa ni iti jatadre ja käbiti, yebrä mun törbadre kain ngäbiti. 44 Munta ja käikitekä kwärikwäri ye munta kain ngäbiti aune Ngöbö itibe mun kadre ngäbiti* ye mun ñan känene, ¿se ñokänti mun raba tödeke tie? 45 Tikwe kukwe mikai gare mun rüere ti Rün ngwärekri ye munkwe ñan nütü. Moisés, abokänbiti munta tö ngwen, käta kukwe mike gare mun rüere. 46 Metrere, mun tädre tödeke Moisés ie akräke, munkwe tödekadre tie, ñobätä ñan aune niarakwe kukwe tikani tibätä. 47 Akwa, kukwe tikani kwe ye mun ñan mike era jai, ¿se ñokänti tita kukwe niere ye munkwe mikai era jai?”.