Evangelio Juankwe
16 “Tödeka munkwe ñan riadrekä munkän* yekäre tita kukwe ne niere munye. 2 Mun juaintari sinagogate. Ne madakäre, kä rükai ngwane nitre jökrä käkwe mun murie ketadi yebiti täi Ngöbö mike täte* nütüdi kwetre. 3 Akwa kukwe jökrä ne nuaindi kwetre, ñobätä ñan aune ti Rün aune ti, jämi gare ietre. 4 Tita kukwe ne niere munye ne kwe kukwe ye rabadre bare käi rükadre ngwane, tikwe kukwe ye niebarera munye rükadreta törö munye.
Tikwe ñan nieba kenanbe munye, ñobätä ñan aune ti nämä munbe. 5 Ti bikera nikenta ni ti juanka yekänti, akwa ‘¿Mä niki medente?’ ye mun ñan ngwentari tie. 6 Ñakare aune, tita kukwe niere munye ye käkwe mun brukwä miri ulire krubäte. 7 Akwa ti kukwe metre niere munye, ti bike nikenta ye kwin mun kräke, ñobätä ñan aune ti ñan rikadre ngwane, mun dimikaka ñan rükai munkänti. Akwa ti näinta, yebätä tikwe juain munkänti. 8 Akwa rükai ngwane, ja mika ngite, tita kukwe metre nuainne aune nire ben Ngöbökwe kukwe ükaite yebätä kukwe mikai gare erametre kwe nitre kä tibienbätä ie. 9 Kena, kukwe mikai gare erametre kwe ja mikata ngite yebätä, ñobätä ñan aune niaratre ñan tödeke tibiti. 10 Ye bitikäre, tita kukwe metre nuainne yebätä kukwe mikai gare erametre kwe, ñan ñobätä aune ti näinta ti Rün känti aune mun ñan ti tuaita mada. 11 Ye bitikäre, nire ben Ngöbökwe kukwe ükaite yebätä kukwe mikai gare erametre kwe, ñobätä ñan aune kukwe ükaninante ni kä ne gobrainkä ben.
12 Kukwe täbe keta kabre tie niekäre munye, akwa gwä ngwane kukwe ye ere krubäte mun kräke. 13 Akwa, dimikaka, abokän üai deme kukwe metre mikaka gare ye rükai ngwane, mun jie ngwain kwe kukwe metre ye jökrä kokwäre, ñobätä ñan aune ñan ja töi mikai gare kwe, ñakare aune dre kukwe nuai kwe ye niei kwe aune dre rabai bare ja känenkäre ye mikai gare kwe. 14 Niarakwe* ti käikitaikä, ñobätä ñan aune tikwe dre mikai gare ye mikai gare kwe munye. 15 Kukwe gare ti Rün ie ye jökrä mikani gare kwe tie. Yebätä tita niere, tikwe dre mikai gare ye mikai gare kwe munye. 16 Kä braibe te mun ñan ti tuaita mada, akwa arato kä braibe te mun ti tuaita”.
17 Ye juruabare nitre ja tötikaka kwe ie ngwane, ruäretre namani niere kwärikwäri jai: “‘Kä braibe te mun ñan ti tuaita, akwa arato kä braibe te mun ti tuaita’, aune ‘Ti bike niken ti Rün känti’ nieta kwe, ¿yebiti dre gäräta kwe?”. 18 Namanintre niere: “‘Kä braibe te’ nieta kwe, ¿yebiti dre gäräta kwe? Drebätä tä blite ñan gare nie”. 19 Niaratre tö namani kukwe ngwaintari Jesús ie ye Jesukwe gani, yebätä niebare kwe ietre: “‘Kä braibe te mun ñan ti tuaita, akwa arato kä braibe te mun ti tuaita’ tikwe nini, ¿yebätä munta kukwe ngwentari kwärikwäri jai ya? 20 Erametre ti niere munye, munkwe ja muaidi aune munta ulire krubäte ye munkwe bämikai, akwa ni kä nebätäbätä kä rabai juto. Munkwe ja tare nikadi krubäte, akwa ja tare nika ye rikwitai kä juto erere mun kräke. 21 Meri iti kwe monso däredre ye käita nüke ngwane, tä ja tare nike. Akwa monso tärä därere ngwane, käita nemen jutobätä, yebätä ja tare nikabare kwe ye käita nikwitekä jökräbiti. 22 Ye erere nemen bare munbätä. Gwä ngwane munta ulire krubäte, akwa tikwe mun tuaita aune kä rabai juto krubäte mun brukwäbätä aune ni jire iti käkwe kä juto ye diainkä munkän. 23 Ye ngwane mun ñan kukwe ngwaintari jire tie. Erametre ti niere munye, ti käbiti munkwe drekwa käräi ti Rün ie ngwane, biain kwe munye. 24 Nükebe nengwane mun ñan jondron kärere jire ti käbiti. Jondron kärere aune biandi munye ne kwe kä juto rabadre täte munbätä.
25 Tita kukwe bämike kukwe ne niekäre munye. Kä rükai ngwane, ti ñaka kukwe bämikai blitakäre munbe, ñakare aune tikwe blitai metre ta ti Rünbätä munbe. 26 Ye ngwane ti käbiti munkwe jondron käräi ti Rün ie. Tikwe jondron käräi ie mun kräke ye ñan ai gäräta tikwe. 27 Ñobätä ñan aune ti Rün ara tä mun tarere, munta ti tarere aune ti jatani Ngöbö käbiti era mun kräke yebätä mun tare kwe. 28 Ti jatani kä tibienbätä ti Rün käbiti. Nengwane ti bike kämikekä kä tibienbätä aune ti bike nikenta ti Rün känti”.
29 Nitre ja tötikaka kwe käkwe niebare ie: “Matarebrä mäta blite mrebe, mä ñan kukwe bämike blitakäre. 30 Kukwe jökrä gare mäi aune kukwe ngwandretari mäi ye mä ñan tä ribere jai kukwe mikakäre gare, ye nibira gare nunye. Yebätä mä jatani Ngöbökri nunta mike era jai”. 31 Jesukwe niebare ietre: “¿Matare munta ti mike era jai? 32 Ne kukwe nuin. Kä rükai ngwane, mun juaintari mento kwäräkwärä, metrere kä ye nüra. Mun itire itire näinta ja gwirete aune mun ti tuainmetre kaibe. Akwa metrere ti ñan tä kaibe, ñobätä ñan aune ti Rünta tibe. 33 Tita kukwe ne niere munye ne kwe ti köböire kä jäme tädre munbätä. Munkwe ja tare nikai kä nebätä. Akwa, ¡ja ngwen dite! Ñobätä ñan aune tikwe kä ne ganainbarera”.