Evangelio Lucakwe

4 Ngöbökwe üai deme biani Jesús ie, aune kämikaninkä kwe Jordán, aune Ngöbö die nikani jie ngwena kä ngwarbe nötare yekäntita 2 köbö 40 te,* yete Diablu nämäne nuinte. Ñan mröbare jire kwe köbö ye ngwane, aisete köbö ye krütani jökrä ngwane mrö namani ie. 3 Aisete Diablukwe niebare ie: “Mä Ngöbö monsoi ngwane, niere jä noko ie nikwite mröre”.* 4 Akwa Jesukwe niebare ie: “Tä tikani: ‘Mrö ye ñan aibebiti ni nire rabadre nüne’”.

5 Ye bitikäre, Diablu nikani ngwena kä mente kwin känti aune gobran kä tibienbätä ye mikani tuare kwe ie batibe jökrä. 6 Diablukwe niebare mada ie: “Jondron ütiäte ütiäte gobran nete ye tikwe biain mäi aune tikwe mä mikai gobranebiti, ñobätä ñan aune gobran ne jökrä biani tie aune ti tö biain nire ie ye erere ie tikwe biain. 7 Yebätä, mäkwe kukwe nuaindi batibe ti mikakäre ütiäte jai ngwane, jökrä rabai mäkwe”. 8 Jesukwe niebare ie: “Tä tikani: ‘Jehová* Ngöbö mäkwe ye mäkwe mika täte aune niara aibe kräke mäkwe sribi’”.

9 Diablu nikani ngwena mada Jerusalén, aune mikani kwe kä bäri mente kwin templo yekänti aune niebare kwe ie: “Mä Ngöbö monsoi ngwane, nete ja kite timo, 10 ñobätä ñan aune tä tikani: ‘Niarakwe kukwe nuain manandi mä kräke angeletre ie mä kriemikakäre’, 11 aune ‘mä jänäin kisete kwe ne kwe mä ngoto ñan matadre jäte’”. 12 Jesukwe niebare ie: “Tä niebare: ‘Mäkwe ñan Jehová Ngöbö mäkwe ye nuate’”. 13 Aisete, Diablukwe nuaninte ünä ngwane, nikani mento niarabätä kä bäri kwin ngübakäre nuatekäre.

14 Ye bitikäre, üai deme diebiti Jesús nikaninta Galilea. Aune niara käikitaka namani kä jökrä yekäntita. 15 Arato nikani dirire sinagoga* niaratrekwe yete, aune nitre jökrä namani mike ütiäte.

16 Ye bitikäre nikani Nazaret, kä känti niara ririabare yekänti aune nämäne nuainne käre köbö ja dükakäre* te erere, nikani sinagogate aune nükani krö ñäkäkäre täräbätä. 17 Ye ngwane rollo ni Ngöbö kukwei niekä Isaiakwe ye biani ie. Niarakwe tikani, aune kukwe ne nämäne tikani ye kwani ie: 18 “Üai deme Jehovakwe ye tä tibätä, ñobätä ñan aune niarakwe ti dianinkä kukwe kwin ye mikakäre gare nitre bobre ie. Nitre klabore ye mikai kwäre ye ti juani niere kwe ie aune nitre ie kä ñan tuin yei kä mikakäreta tuin, aune nitre tä ja tare nike ye mikakäre kwäre, 19 kä te Jehovakwe nitre kai ngäbiti ye driekäre”. 20 Ye bitikäre, rollo mritaninkä kwe aune ngökaninkäta kwe ni ni dimikaka sinagogate yei, biti namani täkäni tibien. Nitre jökrä nämäne yete ye okwä namani kwekebe niarabätä. 21 Aune nikani niere ietre kukwe nebiti: “Kukwe nieta Ngöbö Kukweibätä kukwe nuri munkwe ye matare nibi bare”.

22 Nitre jökrä namani blite kwin niarabätä aune kukwe bä nuäre namani betekä kadate yebätä nitre töi namani nemen ñan krütare. Namanintre niere: “Ne José ngobo, ¿ñan ererea?”. 23 Ye ngwane niebare kwe ietre: “Kukwe nieta ne munkwe niei tibätä ye gare metre tie: ‘Ni kräkäi mikaka, ja kräkäi miketa akwle’. Aune munkwe niei: ‘Mäkwe kukwe nuainbare Capernaúm kukwe nuani nunkwe ye erere nuainne ja käite arato’”. 24 Niebare kwe arato: “Ni Ngöbö kukwei niekä ka ngäbiti ñaka jire iti, ja käite ye ti niere metre munye. 25 Ñodre, ti niere metre munye meritre kän muko krütani nämäne kwatí Israel Elías näire, ye ngwane kä kwin nämäne ngidiani kä komä te aune sö krä ti te, aune kä ye näire mrö nikabare krubäte kä yekäntita. 26 Akwa Elías ñan juani meritre jire iti yekänti, ñakare aune meri kän muko krütani Sarepta käi Sidón ye aibe känti. 27 Ne madakäre ni Ngöbö kukwei niekä Eliseo näire, nitre kwatí nämäne bren lepra kisete Israel. Akwa niarakwe ñan nitre ye jire iti mikaninta räre, ñakare aune Naamán käi Siria ye aibe”. 28 Ye ngwane, nitre jökrä nämäne sinagogate ie kukwe ye juruabare ye brukwä namani. 29 Aisete nükanintre krö, aune jänikani kwetre jötrö ngwarbe juta ye bäre mento aune jänikani kwetre nemen ngutuäbiti juta nämäne sribebare yekänti kitakäre dokwäre jräte. 30 Akwa niarakwe nänbare nitre ye ngätäite ta aune nikani jankunu ja käne.

31 Ye bitikäre jatani motokwäre Capernaúm, juta keteiti Galilea yekänti. Köbö ja dükakäre te nämäne dirire yete nitre ie, 32 aune niara nämäne dirire ño yebätä nitre töi nämäne nemen ñan krütare, ñobätä ñan aune kukwe drie nämäne kwe ye jökrä kite Ngöbökri. 33 Ne madakäre sinagogate ni brare itibätä üai käme nämäne, chokali iti, aune ye käkwe ngratebare ja dibiti: 34 “¡Ah! ¿Mäta dre nuainne nete Jesús nazarebu? ¿Mäki nun gatekäre? Mä nire ye gare metre tie: mä abokän Deme Ngöbökwe”. 35 Akwa Jesukwe ñäkäbare ja dibiti chokali yei: “Kada kete aune näin mentobätä”. Ye ngwane chokalikwe ni ye kitani tibien nitre ngätäite, aune kämikaninkä kwebätä aune ñan nuainbare tare kwe. 36 Ye jutuabare nitre ie ngwane, töi namani ñan krütare aune namanintre niere jai kwärikwäri: “¿Blita ño amare? Ñobätä ñan aune dita kwe yebiti tä kukwe nuainmana üai käme yei aune ¡üai käme ye tä kämikekä nitrebätä!”. 37 Aisete kukwe nuain nämäne Jesukwe, ye kädrie namani kä kiakia jökrä yekäntita.

38 Jesukwe kämikaninkä sinagogate ye bitikäre, nikani gwä Simón känti. Aune ye ngwane, Simón köbönain merirebätä* drangwan nämäne tainbrere, aune Jesukwe dimikadre ye ribebare ie. 39 Aisete ja mikaninte kwe niara bititubu aune ñäkäbare kwe drangwan ie aune drangwan nikanibätä. Ye bengwairebe niara nükani krö aune nikani mrö sribere kräketre.

40 Ñänä jatani niken nekä ngwane, nitrekwe nitre nämäne bren, bren bätäkä ngwarbe kisete, ye jänikani niara ie. Aune niarakwe kise mikani niaratre itire itirebiti aune mikaninta räre kwe. 41 Arato nitre kwatibätä chokali namani niken mento aune ngrente: “¡Mä ye Ngöbö Monsoi!”. Akwa niara namani ñäke ietre aune ñaka namani tuenmetre blite, ñobätä ñan aune niara abokän Kristo nämäne gare ietre yebätä.

42 Kä jatani ngwen ngwane, niarakwe kämikaninkä yete aune nikani kä kaibe te mentokwäre. Akwa nitre kwatí ye nikani känenentari aune nämäne medente yekänti niaratre namani, aune namanintre ketete ne kwe niarakwe ñan tuadremetre. 43 Akwa niarakwe niebare ietre: “Kukwe kwin Gobran Ngöbökwebätä ye ti rabadre driere juta madate arato, ñobätä ñan aune ye kräke ti juani”. 44 Aisete nikani kukwe driere jankunu sinagoga Judea yete.