Evangelio Lucakwe
24 Bämän kömikata köböi kena yete, dekä ngwarbe meritre ye nikani dobobiti.* Jondron rä mane sribebare kwetre ye jänikani kwetre. 2 Akwa jä nämäne dobobiti* ye munuaninkä mentokwäre jutuabare ietre, 3 aune niaratre nikani jä mäkäte ngwane, Däkien Jesús ngwaka ñan kwani ietre. 4 Meritre nómene töi niä kukwe yebätä känime ngwane, bátibe, nitre brare nibu dän trä nebetekä te nükani ken. 5 Meritre ye nikaninkä aune namanintre nikren tibien. Aisete nitre brare ye käkwe niebare ietre: “¿Ñobätä ni tä nire ye munta känene nitre ngwakare ngätäite ye? 6 Ñaka tä nete, niara mirirata nire.* Niara nómene Galilea ngwane, dre niebare kwe munye ye munkwe ngwan törö jai. 7 Ni Kä Nebätä Monsoi mikadre nitre ja mikaka ngite kisete aune metadre kribätä, akwa köbömäkäre mikadreta nire* niebare kwe munye”. 8 Ye ngwane Jesukwe kukwe niebare ye nükaninta törö meritre ye ie. 9 Kämikaninkä kwetre dobobiti* aune nikani kukwe ye jökrä täine nitre Ni Jätäbiti Iti ie aune nitre jökrä ie. 10 Meritre ye abokän María Magdalena, Juana aune María Santiago meye. Aune meritre mada mada nämäne näin siba bentre, ye nikani kukwe ye täine nitre apóstol ie arato. 11 Akwa meritre ye namani kukwe ngwarbe niere namani ruin ietre. Aisete ñan mikani era kwetre jai.
12 Akwa Pedro nükani krö aune nikani betekä dobo* yekänti, aune ja mikani kuintubu kwe nikrakäre jä mäkäte ngwane, dän lino ye aibe jutuabare ie. Aisete nikaninta ja jiebiti aune dre namani bare ye nikani ngwentari jai.
13 Ne madakäre, köbö ye arabe te nitre ja tötikaka nibu nikani juta chi kädekata Emaús kokwäre. Juta ye nemenkä 11 kilómetro, ye abokän hora krämä näre Jerusalén bäre mento. 14 Kukwe namani bare ye jökrä nikanintre kädriere jabe.
15 Nämänentre blite jabe kukwe yebätä ngwane, Jesús ara nikani kokwäre aune nikani siba bentre, 16 akwa Jesús ñan nükani gare ietre. 17 Niarakwe ngwanintari ietre: “¿Drebätä munta ñäke jai ji ngrabare ye?”. Niaratre namani nünaninkä aune kä namani ulire bätätre bä namani ngwärebätä. 18 Iti kädeka nämäne Cleopas käkwe niebare ie: “¿Akräke mä ni menteni aune mäta nüne kaibe Jerusalén, yebätä dre namani bare köbö bitinkä juta yete ye ñan gare mäi?”. 19 “¿Dre namani bare?”, ngwanintari kwe ietre. Aune niaratrekwe niebare ie: “Kukwe namani bare Jesús Nazareno yebätä, niara abokän ni Ngöbö kukwei niekä dite ye bämikani kwe kukwe nuainbare kwe aune kukwe niebare kwe yebiti, Ngöbö aune nitre jökrä ngwärekri. 20 Sacerdote ütiäte ütiäte nunkwe aune nitre nun jie ngwanka käkwe biani murie ketakäre aune metani kribätä. 21 Akwa niara yekwe Israel mikadre kwäre ye nun nämä ngübare. Akwa ye ñan aibe ngörä, köbömära kukwe ye namani bare. 22 Ne madakäre, meritre ja tötikaka ye ruäre käkwe nun töi mikaba niä arato. Niaratre nikani dekä ngwarbe dobobiti.* 23 Aune Jesús ngwaka ñan kwani ietre yebätä, kukwe ñan tuabare namani bare okwäbiti namanintre niere, känti angeletre jutuabare ietre aune Jesuta nire mikani gare kwetre meritre ie. 24 Ye ngwane nitre ruäre nämä nunbe janama dobobiti* aune meritre dre dre niebare ye erere kwani ietre. Akwa ñan Jesús tuani kwetre”.
25 Aune Jesukwe niebare ietre: “¡Mun ñan ja ngwen töbätä aune kukwe jökrä niebare nitre Ngöbö kukwei niekäkwe ye mun ñan mike era jai jötrö ngwarbe ja brukwäte! 26 ¿Akräke kukwe tare ne ñan rabadre bare Kristobätä aune biti rabadre mikani ütiäte?”. 27 Aune dre dre tikani niarabätä Ngöbö Kukweibätä ye nikani mike gare kwin ietre, kömikani kwe kukwe niebare Moisekwe yebätä nememe Nitre Ngöbö Kukwei Niekä jökrä kukwe niebare yebätä.
28 Mrä mada kä känti nikanintre yekänti nikanintre mate, akwa niara nikani bäri mente ye kwrere bämikani kwe. 29 Akwa Jesús ja mikadrete yete ye niaratre namani ribere kisere ie. Namanintre niere ie: “Nemen nunbe nete, ñobätä ñan aune kä raire aune kä kitra iko”. Aisete niara nikani gwä rabakäre niaratre känti. 30 Niara nämäne mröre bentre ngwane, pan diani kwe, orabare kwe, ötaninbätä kwe aune nikani bien niaratre ie. 31 Ye ngwane, nire nämäne bentre yete ye nükani gare ietre. Akwa niara nianinkä mada niaratre okwäte. 32 Aune namanintre niere jai kwärikwäri: “¿Akräke niaraki blite ji ngrabare nibe aune täni Ngöbö Kukwei mike gare kwin nie ngwane, kä ñan nibi nuäre ni brukwäbätä?”. 33 Ye bengwairebe niaratre nükani krö aune nikanintreta Jerusalén, yete nitre Ni Jätäbiti Iti aune nitre mada nämäne ja ükaninkrö yete yebe ja tuani kwetre. 34 Aune nitre nämäne yete ye namani niere: “¡Erametre Däkien mirita nire* aune ja miri tuare kwe Simón ie!”. 35 Ye ngwane, dre namani bare ji ngrabare aune pan ötaninbätä ño kwe yebätä nükani gare ietre ye täinbare kwetre.
36 Niaratre nómene blite känime kukwe yebätä ngwane, Jesús nükani niaratre ngätäite aune niebare kwe ietre: “Kä jäme raba munkwe”. 37 Akwa niaratre namani nekwetekä aune kä jürä namani krubäte bätätre, ñobätä ñan aune ni üaire jutuabare ietre namani ruin ietre. 38 Yebätä niebare kwe ietre: “¿Ñobätä mun nekwetekä? ¿Ñobätä mun ñan nibi kukwe mike era jai ja brukwäte? 39 Ti kise aune ti ngoto mike ñärärä, ti ara se. Kise ketekä tibätä aune mike ñärärä, ñobätä ñan aune ni üaire ngätä aune krä ñaka, ti abokän ngätä aune krä tärä tuin munye erere”. 40 Kukwe ye niebare kwe ye bitikäre ja kise aune ja ngoto mikani tuare kwe ietre. 41 Akwa, niaratre töi nómene niä känime kukwe yebätä aune käi nämäne juto krubäte brukwäbätä, aisete ñan namanintre kukwe mike era jai, ye ngwane Jesukwe ngwanintari ietre: “¿Mrö tärä kwetadre?”. 42 Gwa rötani ye niaratrekwe biani ötöiti ie. 43 Niarakwe kani ngäbiti aune kwetani kwe niaratre okwäbiti.
44 Biti niebare kwe ietre: “Ti nämä munbe ngwane tikwe kukwe ne nieba munye, ye abokän kukwe tikani tibätä Lei Moisekwebätä, Nitre Ngöbö Kukwei Niekäkwe aune Salmobätä ye jökrä rabadre bare tikwe nieba munye”. 45 Ye ngwane niaratre töi tikani täte kwe, ne kwe Ngöbö Kukwei ye rükadre gare ietre. 46 Aune niebare kwe ietre: “Kukwe ne tä tikani: Kristo ja tare nikadre aune köbömäkäre mikadreta nire nitre ngwakare ngätäite. 47 Aune niara käbiti nitrekwe ja töi kwitadre ne kwe ngite kitadre tabiti ye driedi juta jökrä te, ye kömikai Jerusalén. 48 Mun rabadre testikore kukwe ne jökräbätä.* 49 Ti Rünkwe dre käbämikani ye tikwe juandi munbiti, ye tädre gare munye. Akwa mun raba Jerusalén yete, nememe di kite kä kwinbätä käkwe mun miniandrete ye ngwane”.
50 Ye bitikäre nikani niaratre ngwena juta bäre mento nememe Betania, kise ganinkä kwin kwe aune kukwe kwin ribebare kwe kräketre. 51 Niara nómene kukwe kwin ribere kräketre ngwane, näntebare mento kwe niaratrebätä aune jänikani kä kwinbiti. 52 Niaratre namani ngodokwäbiti mikakäre ütiäte jai, biti kä juto krubätebiti nikanintreta Jerusalén. 53 Aune nämänentre käre templote Ngöbö käikitekä aune mike täte.