Evangelio Lucakwe

20 Jesús nämäne dirire nitre ie templote aune nämäne kukwe kwin mike gare, ye köböi ruäre te sacerdote ütiäte ütiäte aune nitre escriba jatani nitre ji ngwanka judío yebe gwaire, 2 aune ngwanintari kwetre ie: “¿Nirekwe ja di biani mäi kukwe ne nuainkäre? ¿Nirekwe nuain mananbare mäi?, niere nunye”. 3 Niarakwe niebare ietre: “Ti bike kukwe keteiti ngwentari munye arato, aune munkwe nie tie. 4 Ni ngöka nämäne ñöte Juankwe, ¿ye Ngöbökri o ni kä tibienbätäkri?”. 5 Ye ngwane namanintre kukwe ye kädriere jabe. Namanintre niere: “Nikwe Ngöbökri niedi ie ngwane, niedi kwe nie: ‘¿Se ñobätä mada munkwe ñan mikani era jai?’. 6 Akwa, ni kä tibienbätäkri nikwe nie ie ngwane, nitre jökrä käkwe ni täkäi jäbiti, ñobätä ñan aune Juan abokän ni Ngöbö kukwei niekä kräketre”. 7 Aisete kite nirekri ñan nämäne gare ietre niebare kwetre. 8 Aune Jesukwe niebare ietre: “Nire diebiti tita kukwe jökrä ne nuainne, ti ñan raba niere munye arato”.

9 Ye bitikäre nikani kukwe ne bämike nitre ie: “Ni iti käkwe uva nökani aune alquilabare kwe nitre nura nökaka ruäre ie, biti nikani juta madate aune nuabare raire kwe yete. 10 Kä nükani ngwane, ni yekwe ni klabore iti kwe juani, nitre nura nökaka yekänti uva ngwä biandre ie ye tuakäre. Akwa nitre nura nökaka käkwe ni klabore ye kwata metani ye bitikäre, juaninta kise tökare kwetre ja jiebiti. 11 Aune ni ye käkwe ni klabore mada juani bobukäreta. Akwa nuainbare tare, ñan mikani ütiäte jai aune juaninta kise tökare kwetre ja jiebiti arato. 12 Aune ni klabore nimäkäre mada juani kwe. Akwa nuainbare tare aune juanintari kwetre arato. 13 Biti ni uva tirei bäkänkä käkwe niebare: ‘¿Se tikwe dre nuaindre? Ti bike ti ngobo tare tikwe juen. Niara mikai ütiäte kwetre jai ruin tie’. 14 Jutuabare nitre nura nökaka ie ngwane, nikanintre blite jabe. Namanintre niere jai: ‘Ni nekwe jondron rünkwe rabai. Aisete ani kämike ne kwe jondron rabai kwe ye rabadre nikwe’. 15 Aisete jänikani kwetre uva tireibätä mento aune murie ketani kwetre. Ye medenbätä, ¿ni uva tirei bäkänkä käkwe dre nuaindi bätätre? 16 Jatai aune nitre nura nökaka ye murie ketai kwe aune uva tirei ye biain kwe nitre madai”.

Ye juruabare nitre ie ngwane, niebare kwetre: “¡Ye ñan rabadre bare jire!”. 17 Akwa Jesús okwä namani kwekebe bätätre aune niebare kwe: “Erere ngwane, ‘nitre ju sribekäkwe ñaka jä kani ngäbiti, jä ye namani bäri ütiäte’,* abokän tä tikani, ¿ye dre gärätä? 18 Ni jökrä betaikä jä nebiti ye gidiainte jökrä. Aune jä ne betadrekä ni itibiti ngwane, ni ye dikandrete jökrä kwe”.

19 Ye ngwane nitre escriba aune sacerdote ütiäte ütiäte tö namani Jesús kai biarebe ngite, ñobätä ñan aune niaratre ben töbätä* Jesús nämäne kukwe bämike nükani gare jabätä ietre. Akwa nitre jürä namani bätätre. 20 Ye medenbätä Jesús mrusaibare kwekebe kwetre ye bitikäre, nitre brare ruäre ben kukwe ükaninte gore kwetre ye juani kwetre, ne kwe ja bämikadre kwetre ni kukwe metre nuainkä erere aune Jesús nämäne blite ño yebiti rakadre ietre yekäre. Niaratre tö nämäne Jesús biain gobran kri ie. 21 Nitre ye käkwe ngwanintari ie: “Dirikä, mäta kukwe metre niere aune dirire bätä mä ñaka nitre kitete, ñakare aune mäta kukwe metre Ngöböbätä driere ye gare nunye. 22 Aisete impuesto ütiä biandre Rei Romano* ie, ¿ye kwin o ñakare?”. 23 Akwa niaratre tö namani ngökai gani kwe bätätre, aisete niebare kwe ietre: 24 “Denario* mike tuare kwati tie. ¿Nire üai aune nire kä tä tikanibätä?”. “Rei Romano üai aune kä tä tikanibätä”, niebare kwetre. 25 Niarakwe niebare ietre: “Aisete jondron Rei Romanonkwe ye erere bien Rei Romano ie, akwa jondron Ngöbökwe ye erere bien Ngöböi”. 26 Mrä mada Jesukwe dre niebare nitre okwäbiti yebiti ñan nakani ietre. Kukwe niebare kwe ye niaratre töi mikani niä, aisete namanintre kwekebe.

27 Akwa nitre saduceo,* abokän tätre niere ni ñan gaikröta, ye ruäre jatani aune ngwanintari kwetre ie: 28 “Dirikä, Moisekwe kukwe ne tuanimetre tikani nunye: ‘Ni brare iti eteba krütadre aune muko rabadre ie, akwa monso ñan rabadre kwe ngwane, brare ye rabadre ja mäkete meri namani kaibe yebe, ne kwe rabadre monso bien eteba mre krütani yei’. 29 Bati ni ja etebare nämäne ni kükü. Ni ja etebare ye mubai käkwe ja mäkäninte, akwa monsoi ñaka ngwane krütani. 30 Arato eteba nibukäre, 31 aune eteba nimäkäre ye ja mäkäninte meri yebe. Niaratre ni kükü yebätä kukwe ja erebe namani bare. Monsoi ñaka ngwane krütani. 32 Mrä mada, meri ye krütani arato. 33 Yebätä, köbö te nitre mikaita nire ngwane, ¿meri ye rabai niaratre ni kükü ye medenkwe? Ñobätä ñan aune niaratre ni kükü yekwe ja mäkäninte meri yebe”.

34 Jesukwe niebare ietre: “Nitre kä ne* näire ye tä ja mäkete aune bianta ja mäkätekäre, 35 akwa Ngöbökwe nitre tuainmetre nüne kä ja känenkäre yete aune gaikröta nitre ngwakare ngätäite, ye ñaka ja mäkäite aune ñaka biain ja mäkätekäre. 36 Ne madakäre, niaratre angeletre erere yebätä ñaka raba krüte arato, aune niaratre Ngöbö monsoi ñobätä ñan aune gaikröta nitre ngwakare ngätäite yebätä. 37 Aune kri mu chibätä Moisekwe kukwe tikani ngwane, nitre ngwakare mikaita nire* ye mikani gare kwe arato, ñobätä ñan aune Jehová* kädekani kwe ‘Ngöbö Abrahankwe, Ngöbö Isaackwe aune Ngöbö Jacobkwe’. 38 Niara ye ñaka Ngöbö ni ngwakarekwe, ñakare aune niara Ngöbö ni nirekwe, ñobätä aune nitre ye jökrä tä nire niara kräke”. 39 Ye juruabare nitre escriba ruäre ie ngwane, niebare kwetre ie: “Dirikä, mä blitani metre”. 40 Ñobätä ñan aune ja ñan namani nüke törö ietre kukwe mada ngwantarikäre ie.

41 Angwane Jesukwe ngwanintari ietre: “¿Se ño amare Kristo kite Davidkri nieta? 42 Ñobätä ñan aune David ara käkwe niebare tärä Salmo yebätä: ‘Jehovakwe nieba Däkien tikwe ie: “Täke ti kise ruinkri 43 nememe tikwe mä rüe mikai mä ngoto gräre”’. 44 Aisete Davidta Däkien niere ie. ¿Se ño amare Kristo kite Davidkri nie raba?”.

45 Ye bitikäre, nitre jökrä nämäne niara kukwe nuin ngwane, niebare kwe nitre ja tötikaka kwe ie: 46 “Mun ja ngübabiti nitre escriba yebätä, niaratre töta nemen basai dän nga aune bä nuäre te aune köbö kwin niedre ietre kä jondron rürübäinkäre yekänti tä nemen tuin kwin ietre, aune täkärä tä käne sinagogate yete niaratre töta nemen täkäi aune mröta* ngwane, niaratre töta nemen täkäi kä bäri ütiäte yekänti. 47 Meritre muko krütani yekän tätre jondron* denkä aune ja bämikakäre tätre orasion nga niere. Niaratre mikai ja ngie nuin bäri ni mada kräke”.