Evangelio Juankwe
8 12 Ye bitikäre, Jesukwe blitabare bobukäre bentre. Niebare kwe: “Ti abokän käträ ni kä tibienbätä kräke. Nire näin ti jiebiti ye ñan dikaikä jire kä drünente ta, ñakare aune käträ ja nire kräke ye rabai kwe”. 13 Yebätä nitre fariseo käkwe niebare ie: “Mäta kukwe mike gare akwle jabätä, aisete mäta kukwe mike gare ye ñaka metre”. 14 Jesukwe niebare ietre: “Ebäkänä tita kukwe mike gare akwle jabätä. Akwa tita kukwe mike gare ye metre, ñobätä ñan aune medente ti jatani aune ti näin medenkwäre ye gare tie. Akwa medente ti jatani aune ti näin medenkwäre ye ñaka gare munye. 15 Kukwe tuin ño ni kä nebätä ie* ererebätä munta kukwe ükete. Ti ñan kukwe ükete ni jire iti ben. 16 Akwa nane tikwe kukwe ükadrete ni iti ben ngwane, kukwe metre ye ererebätä tikwe kukwe ükadrete, ñobätä ñan aune ti ñan tä kaibe, ñakare aune ti Rün käkwe ti juani ye tä tibe. 17 Ne madakäre, Lei munkwebätä tä tikani: ‘Ni nibu tä kukwe mike gare ye metre’. 18 Tita kukwe mike gare akwle jabätä, aune ti Rün, abokän ti juani, ye tä kukwe mike gare tibätä arato”. 19 Aune nitrekwe ngwanintari ie: “¿Mä Rün tä medente?”. Jesukwe niebare ietre: “Ti aune ti Rün ñaka gare munye. Ti tädre gare munye ngwane, ti Rün rabadre gare munye arato”. 20 Caja ngwian kitara templote ye käi känti niara nämäne dirire ngwane, kukwe ye niebare kwe. Akwa niara ñan nakani nitre ie, ñobätä ñan aune niara murie ketadre ye käi jämi nüke.
21 Aisete niebare kwe bobukäre ietre: “Ti näinta, aune munkwe ti känäin, akwa munta ja mike ngite yebätä mun krütai. Ti näin yekänti mun ñan raba niken”. 22 Nitre judío namani niere: “‘Ti näin yekänti mun ñan raba niken’ nieta kwe. ¿Ja murie ketai kwe ya gwari?”. 23 Biti niebare kwe: “Mun abokän kä tibienbätä, ti abokän kä kwinbätä. Mun kä nebätä, ti abokän ñaka kä nebätä. 24 Yebätä tikwe nini munye, ‘Munta ja mike ngite yebätä mun krütai’. Ñobätä ñan aune ti abokän niré nieta tikwe, ye mun ñan mike era jai ngwane, munta ja mike ngite yebätä mun krütai”. 25 Aisete namanintre ngwentari ie: “¿Mä abokän niré?”. Jesukwe niebare ietre: “¡Drekäre ti rika blite munbe! 26 Kukwe keta kabre tä niekäre tie munbätä aune kukwe keta kabrebätä tä kukwe ükadrete tie. Ne madakäre, kukwe metre ye ererebätä ni ti juanka tä ja ngwen, aune dre niebare kwe, tikwe kukwe nuabare ye ara tita niere kä tibienbätä”. 27 Akwa nämäne blite Rün kä kwinbiti yebätä ñan nükani gare ietre. 28 Biti Jesukwe niebare: “Munkwe Ni Kä Nebätä Monsoi kaikä kwin* ngwane, ti abokän niré nieta tikwe, ye metre aune ti ñaka kukwe nuainne jire ja töi jeñebiti, ñakare aune ti Rünkwe dre driebare tie ye erere tita niere ye rabai gare munye. 29 Aune ni ti juanka ye tä tibe, ñaka ti tuenmetre kaibe, ñobätä ñan aune dre tuin kwin ie ye käre tita nuainne”. 30 Nämäne kukwe ye niere ngwane, nitre kwatí namani tödekebiti.
31 Aune nitre judío namani tödeke Jesubiti, ie Jesukwe niebare: “Munkwe ti kukwei mikai täte jankunu ngwane, erametre mun ja tötikaka tikwe. 32 Kukwe metre rabai gare munye aune kukwe metre köböire mun rabai kwäre”. 33 Niaratrekwe niebare ie: “Nun abokän Abrahán mräkä aune ni jire iti käkwe nun mikani klabore jai, ¿se ño amare ‘Mun rabai kwäre’ mäta niere?”. 34 Jesukwe niebare ietre: “Ti niere metre munye, nire nire tä ja mike ngite ye tä nemen klabore ja mika ngite kisete. 35 Ne madakäre, ni klabore ñan tä nüne kärekäre ju bäkänkäkwe yete, monso abokän tä nüne kärekäre yete. 36 Aisete, Ngöbö Monsoi käkwe mun mikadre kwäre ngwane, erametre mun rabai kwäre. 37 Mun abokän Abrahán mräkä gare tie, akwa kukwe drieta tikwe ye mun ñan tä kain ngäbiti, yebätä mun tö ti murie ketai. 38 Ti nämä ti Rün känti ngwane, dre tuaba tikwe yebätä tita blite, akwa mun rün tä dre niere kukwe nuata munkwe ye nuainta munkwe”. 39 Aisete niaratrekwe niebare ie: “Abrahán abokän nun rün”. Jesukwe niebare ietre: “Mun Abrahán monsoitre ngwane, dre nuainbare Abrahankwe, ye erere mun tädre nuainne. 40 Ti abokän tä kukwe metre mike gare munye, kukwe metre ye Ngöbökwe niebare juruabare tie abokän tita mike gare munye, akwa yebiti ta mun tö ti murie ketai. Ye erere Abrahankwe ñan nuainbare. 41 Mun rün tä dre nuainne ye erere munta nuainne”. Aune niaratrekwe niebare ie: “Nun ñaka nitre ñan ja mäkäninte monsoi,* nun rün abokän itibe, ye abokän Ngöbö”.
42 Jesukwe niebare ietre: “Ngöbö ye mun Rün ngwane, mun tädre ti tarere, ñobätä ñan aune Ngöbökwe ti juani, yebätä tita nete. Ti ñan jatani ja töi jeñebiti, ñakare aune niarakwe ti juani. 43 ¿Tita kukwe niere ye ñobätä ñan nüke gare munye? Mun ñaka ti kukwei kain ngäbiti yebätä. 44 Mun abokän mun rün Diablu monsoi aune mun rün tö dre ie ye erere mun tö nuaindi. Kenanbe niara namani ni murie ketaka. Aune kukwe metre ye ererebätä ñaka ja ngwani metre jankunu kwe, ñobätä ñan aune kukwe metre ñakabätä. Käre niara tä kukwe ngwarbe niere ngwane, tä ja ngwen ño ye ererebätä tä kukwe niere, ñobätä ñan aune niara ni ngökaka aune kukwe ngwarbe nieta ye rün. 45 Akwa ti abokän tä kukwe metre niere munye, yebätä mun ñan ti mike era jai. 46 ¿Ti tärä ja mike ngite ye mun meden raba mike gare metre? Tita kukwe metre niere ngwane, ¿ñobätä mun ñan ti mike era jai? 47 Nire Ngöbökwe ye tä Ngöbö kukwe nuin. Mun ñan Ngöbökwe yebätä kukwei ñan ruin munye”.
48 Kukwe ye juruabare nitre judío ie ngwane, niebare kwetre ie: “‘Aisete mä ye samaritano aune chokalita mäbätä’, ¿ye ñan kukwe era nieta nunkwe ya?”. 49 Jesukwe niebare ietre: “Chokali ñan tibätä. Ti abokän tä ti Rün mike ütiäte jai, akwa mun abokän ñan tä ti mike ütiäte jai. 50 Ti käikitadrekä ye ti ñan tä känene jakrä, ni iti tö ti tuai käikitaninkä, aune niara ye abokän kukwe ükatekä. 51 Ti niere metre munye, nirekwe ti kukwei mikai täte ye ñaka krütadi jire”. 52 Nitre judío käkwe niebare ie: “Chokalita mäbätä nibira gare metre nunye. Abrahán krütani aune nitre Ngöbö kukwei niekä arato. Akwa mäta niere ‘nirekwe ti kukwei mikai täte ye ñaka krütadi jire’. 53 ¿Akräke nun rün Abrahán krütani ye kräke mä bäri kri? Nitre Ngöbö kukwei niekä krütani arato. ¿Mä abokän niré ruin mäi?”. 54 Jesukwe niebare ietre: “Tikwe ja käikitadrekä akwle ngwane, ye ñan rabadre ütiäte jire. Ti Rün, abokän Ngöbö munkwe nieta munkwe, niara tä ti käikitekä. 55 Akwa niara ñan gare munye, tibrä ie gare. Aune niara ñan gare tie tikwe niedre ngwane, ti tädre ni ngökö munta nuainne erere. Akwa niara gare tie aune tita kukwei mike täte. 56 Mun rün Abrahán raba köbö tikwe tuin, yebätä nämäne töbike ngwane, käi nämäne nemen juto krubätebätä, aune tuani kwe aune käi namani jutobätä”. 57 Ye ngwane nitre judío käkwe niebare ie: “Kä jämi 50 mäbiti, ¿se ño amare mäkwe Abrahán tuani?”. 58 Jesukwe niebare ietre: “Ti niere metre munye, Abrahán jämi därere känenkri ti nämänena”. 59 Ye ngwane nitre yekwe jä diani kisete Jesús täkäkäre, akwa niara ja ükani aune kämikaninkä kwe templote.