Evangelio Lucakwe
13 Nitre galileo nämäne jondron nire bien kukwadre ye Pilatokwe murie ketani ye nitre ruäre nämäne yete ye käkwe täinbare Jesús ie. 2 Ye juruabare Jesuye ngwane, niebare kwe ietre: “¿Nitre galileo ye bäri ja mikani ngite nitre galileo mada ye kräke yebätä ja tare nikabare kore kwetre ruin munye? 3 Ñakare, ti niere munye. Aune mun ñan ja töi kwite arato ngwane, mun jökrä gaite. 4 O ju mente kwin Siloam nikani nitre 18 bitubu käkwe murie ketani, ¿nitre murie neketani ye bäri ngite nitre jökrä nünanka Jerusalén ye kräke ruin munye? 5 Ñakare, ti niere munye. Aune mun ñan ja töi kwite arato ngwane, mun jökrä gaite niaratre ye erere”.
6 Ye ngwane, kukwe ne bämikani kwe ietre: “Ni itikwe higokrie nämäne nökani uva tireite aune nikani higokrie ngwä tuin, akwa ngwä ñan kwani ie. 7 Ye bitikäre niebare kwe ni uva tirei ngübabitikä yei: ‘Tuin, kä komära tita nüke nete higokrie ne ngwä tuin, akwa ñan kwen tie. ¡Mäkwe tikaka! ¿Ngwä ñan nemen se drekäre tädre nökani ngwarbe dobote?’. 8 Uva tirei ngübabitikä käkwe niebare ie: ‘Däkien, tuenmetre kä kwati, ti bike kä denkä dokwä bäre aune ti bike jondron nire ngäin kite dokwäbätä.* 9 Ja känenkäre ngwä rabaibätä ngwane, ye kwin, akwa ñakare ngwane, mäkwe tikakamana’”.
10 Bati köbö ja dükakäre* te niara nämäne dirire sinagoga keteiti te. 11 Yete meri iti nämäne, aune kä 18 te niara nämäne bren üai käme köböite. Nämäne ngödötaninkä tolene aune ñan nämäne nünenkä metre krö. 12 Jutuabare Jesuye ngwane, niebare kwe ie: “Meri, mä raba kwäre bren mäkwe yebätä”. 13 Jesukwe kise mikani niarabiti, aune bengwairebe namaninta nünaninkä metre aune nikani Ngöbö käikitekä. 14 Jesukwe ni mikaninta räre köbö ja dükakäre te ye jutuabare ni sinagoga jie ngwanka ie ngwane, namani rubun aune niebare kwe nitre kwatí yei: “Köbö ti te sribidre, aisete köbö yete mun jata ja mikamana räre aune ñan köbö ja dükakäre te”. 15 Däkienkwe niebare mada ie: “Mun ja bämikaka jerekäbe, ¿akräke mun iti ñan tä toro o burro jakwe denkä mrö käi* kwe yete biti niken ngwena ñö ñain köbö ja dükakäre te? 16 Meri ne Abrahán ngängän abokän nämäne mäkäninte Satanakwe kä 18 te, ¿ne ñan bärira jire mikadre kwäre bren kwe yebätä köbö ja dükakäre te?”. 17 Niarakwe kukwe ye niebare ngwane, nitre ja mikaka niara rüere ye namani ja gaire, akwa nitre mada kwatí nämäne yete ye abokänbätä kä namani juto, kukwe ñan tuabare nuain nämäne kwe yebätä.
18 Aune niebare jankunu kwe ietre: “¿Gobran Ngöbökwe ye abokän dre kwrere, aune drebätä ti raba kete? 19 Ye abokän ni iti käkwe mostaza nurai chi diani aune nökani kwe tirete jai ye kwrere. Nura ye mu betaninkä aune namani kri kri erere aune nukwä kwitekä kwinta ja judakwata mikani küde ngrabare”.
20 Bobukäre niebareta kwe ietre: “¿Drebätä ti raba Gobran Ngöbökwe ye kete? 21 Ye abokän meri iti käkwe levadura diani aune mritani kwe harina ere* ben ye kwrere. Mrä mada, masa ye jökrä ririabare”.
22 Nämäne näin Jerusalén kokwäre ngwane, nikani juta krikri aune juta kiakia te dirire nitre ie. 23 Ye ngwane ni brare iti käkwe ngwanintari ie: “Däkien, nitre braibe rabai kwäre, ¿ñan ererea?”. Niarakwe niebare ie: 24 “Ja di ngwen kwatibe* nänkäre jukwe krä chi yete ta, ñobätä ñan aune ti niere munye, nitre kwatí ja di ngwain näin te ta, akwa ñan rabai bare ietre. 25 Ju bäkänkä rükai krö aune jukwe dikai kwe llavebiti ngwane, mun rabai nünaninkä jubäre jukwe mete aune niere: ‘¡Däkien, jukwe tike nunye!’. Akwa niarakwe niedi munye: ‘Mun kä medenbu ye ñan gare tie’. 26 Ye ngwane mun rikai niere: ‘Nunkwe mröba aune tomana ñaba mä ngwärekri, aune mäkwe diriba ji krikri* nunkwe yete’. 27 Akwa niarakwe niedi munye: ‘Mun kä medenbu ñan gare tie. ¡Mun jökrä kukwe käme nuainkä, kämikekä tibätä!’. 28 Abrahán, Isaac, Jacob aune nitre jökrä Ngöbö kukwei niekä, tä Gobran Ngöbökwe te, akwa mun abokän tä kitani jubäre jutuai munye ngwane, yete munkwe ja muaidi aune tu ukwadi ja tare nikabätä. 29 Ne madakäre, nitre kädri, nedrin, mintrini,* mötöri* jatai aune rabai täkäni mesabätä Gobran Ngöbökwe te. 30 Ne kukwe nuin, nitre ruäre tä mrä köre ye rabai käne, aune nitre mada tä käne ye rabai mrä köre”.
31 Ye ngwane nitre fariseo ruäre jatani käkwe niebare ie: “Kämikekä nete ñobätä ñan aune Herodes tönibi mä kämikai”. 32 Aune niarakwe niebare ietre: “Mun nän, aune niere nukro känsenta* yei: ‘Tuin, matare aune jetebe ti näin chokali juentari aune nitre miketa räre aune köbö köbömäkäre krütai tie’. 33 Akwa ti näin jankunu ja käne matare, jetebe aune ngübüken, ñobätä ñan aune ni Ngöbö kukwei niekä ye murie keta ñan raba Jerusalén bäre. 34 Jerusalén, Jerusalén ni Ngöbö kukwei niekä kämikaka aune ni juanta ie täkäkä jäbiti...,* ¡bäbe ti tö rababa monsotre mäkwe ükaikrö, kwi tä ngäbä kia ükekrö ja ngwike täni ye erere! Akwa mun ñan tö rababa ie. 35 ¡Tuin! Ngöböta ju jakwe tuenmetre munye. Ti niere munye, munkwe ñan ti tuaita nememe kukwe ne niedi ngwane: ‘¡Ni kite Jehová* käbiti ye kräke kukwe kwin raba bare!’”.