Evangelio Lucakwe
14 Mada ngwane, köbö ja dükakäre te,* nikani mröre nitre fariseo jie ngwanka iti gwirete. Nitre nämäne yete ye ñan namani okwä denkäbätä. 2 Aune niara känenkri ni brare iti nüen* ngrabare nämäne. 3 Jesukwe ngwanintari mada nitre fariseo aune nitre ie kukwe gare krubäte Leibätä yei: “¿Köbö ja dükakäre yete ni bren mikadreta räre ye nuain raba o ñakare?”. 4 Akwa nitre ye namani kwekebe. Aisete niarakwe kise mikani ni yebiti, mikaninta räre kwe aune juaninta kwe. 5 Ye ngwane ngwanintari kwe ietre: “¿Monso munkwe o toro munkwe tä betekä kä mäkäte köbö ja dükakäre te ngwane, mun ñan tä denkä jötrö ngwarbe?”. 6 Kukwe ñan kwani niedre ietre.
7 Nitre nübaibare ye nikani kä bäri ütiäte känene jai, ye jutuabare ie ngwane, kukwe ne driebare kwe ietre ja töi kräke: 8 “Ja mäkäteta kräke mrö sribeta yebätä mä nübai ngwane, kä bäri ütiäte ye ñan ai känti mä raba täkäni. Nane mada ni bäri ütiäte mä kräke nübaibare arato yebätä. 9 Ye ngwane, ni mun nibu nübaikä jatai aune niedi kwe mäi: ‘Kä mikete ni ne ie’. Aune ja gaire kwärä mä näin kä ñan ütiäte yekänti. 10 Ñakare aune, mä nübai ngwane, mä rika aune mä raba täkäni kä ñan ütiäte yekänti, ne kwe ni mä nübaikä jatadre ngwane, niedre kwe mäi: ‘Ja ketamuko, jakwe kä bäri ütiäte nekänti’. Yebiti mä mikai ütiäte jai, nitre mada nübaibare ye okwäbiti. 11 Ñobätä ñan aune ni jökrä käkwe ja mikadi kri ye mikadi ngwarbe jai, akwa nire käkwe ja ngwandi bobre ye mikadi ütiäte kri”.
12 Ye bitikäre Jesukwe niebare ni niara nübaikä yei: “Mäkwe mrö sribe ñänä ruäre o derekri ngwane, mä ñan ja ketamukotre, mä etebatre, mä mräkätre o nitre jondron bäkäne ere mä bäre ye nübai. Mäkwe nuaindre ngwane, niaratre arato raba mä nübaire, aune ye rabadre ütiäre mäkwe. 13 Ñakare aune mäkwe mrö sribe ere ngwane, mäkwe nitre bobre, nitre ngrabare ruäre ñaka kwin, nitre ñan dikekä kwin aune nitre ie kä ñan tuin ye nübai. 14 Aune kä rabai juto mäbätä, ñobätä ñan aune niaratre ñan raba ütiä bien mäi. Aune nitre ja ngwanka metre mikaita nire ye ngwane ütiä rabai mäkwe”.
15 Ni nübaibare ye iti ie kukwe ye juruabare ngwane, niebare kwe ie: “Ni käkwe mröi* Gobran Ngöbökwe te yebätä kä juto”.
16 Jesukwe niebare ie: “Ni brare iti jababare mrö sribere ere dere käkwe nitre kwatí nübaibare. 17 Mrö dere ye horai nükani ngwane, ni klabore kwe ye juani kwe niere nitre nübaibare kwe yei: ‘Mun jakwe, mrö nibira bare’. 18 Akwa jökrätre jatäri, nikani kukwe mike jabiti. Käne ye käkwe niebare ie: ‘Tikwe kä kökani aune nibi tuadre känti tie, mäkwe juandre ta tibiti tita ribere mäi’. 19 Mada käkwe niebare ie: ‘Tikwe nibi* kürü krä jätä aune ti bike niken mike ñärärä, mäkwe juandre ta tibiti tita ribere mäi’. 20 Madakwe niebare ie: ‘Krire tikwe ja märite yebätä ti ñan raba niken’. 21 Aisete ni klabore nikani kukwe ye jökrä täine bäkänkä yei. Ju bäkänkä ye namani rubun aune niebare kwe ni klabore kwe yei: ‘Nän gwä ngwane ji krikri* aune ji kiakia jutate yete aune mä jata nitre bobre, nitre ngrabare ruäre ñaka kwin, nitre ñan dikekä kwin aune nitre ie kä ñaka tuin ye ngwena’. 22 Ye bitikäre ni klabore ye käkwe niebare: ‘Ji ngwanka, mäkwe dre nuain manani ye erere nunie aune kä täbe ni mada kräke’. 23 Bäkänkäkwe niebare ni klabore yei: ‘Nän ji niken jutabätä mentokwäre yebiti aune mäkwe nitre mika niken ja dibiti gwä, ne kwe ni rabadre ju kwáti tie. 24 Ñobätä ñan aune ti niere munye, nitre nübaibare käne ye jire iti käkwe mrö tikwe dere ye bänä nuai’”.
25 Aune nitre kwatí krubäte nämäne näin Jesube, Jesús nikwitaninte niaratre kokwäre aune niebare kwe ietre: 26 “Ni iti tä dikekä tibe akwa brukwä ñaka,* rün, meye, muko, monsotre, etebatre, ngwaitre aune ja nire kwe kräke ngwane, ñan raba nemen ja tötikaka tibe. 27 Nire ñan kri oto ja tare nikakäre* jakwe ngwen aune näin ti jiebiti ye ñan raba nemen ja tötikaka tikwe. 28 Ñodre, mun meden tö ju mente kwin sribei akwa ye känenkri, ¿mun ñan tä nemen täkäni aune ngwian tärä munye ju ye mikakäre bare ya, ye mun ñan tä mike gare jai? 29 Nane mada ju ye kömikadre kwe, akwa ñan rabadre bare ie, aune nitre tuaka ye jökrä rikadre kötaire 30 aune niere: ‘Ni ne käkwe ju kömikani, akwa ñan namani bare ie’. 31 O rei itikwe ni rükä tä 10 mil ye tö näin rüre rei madakwe ni rükä tä 20 mil ye rüere, ¿akwa ye känenkri raba ganane ya, ye ngwaintari kwe ni madai ñan ererea? 32 Ñan raba ganane ngwane, rei iti ye tä mente ngwane, nitre ruäre juain kwe kä jäme känene ben. 33 Erere arato ne raba gare metre munye, mun ñan jondron jakwe jökrä tuenmetre ngwane, mun ñan raba nemen ja tötikaka tikwe.
34 Bäkänä, mren ye kwin krubäte, akwa mren tä bänä nekä ngwane, ¿drebiti bänä mika rabata? 35 Ñan niena kwin jire mritakäre dobro aune jondron nire ngäin yebe. Ye medenbätä nitre tä kitekä. Nire olo tärä ni kukwe nuakäre, ye käkwe olo ketate kwekebe ni kukwe nuakäre”.