Juan Ketebu
1 Ni umbre* tä kukwe tike ja ngwai* dianinkä Ngöbökwe aune monsotre kwe ie. Mun tare krubäte tikwe, ñan ti aibe tä mun tarere ñakare aune nitre jökrä ie kukwe metre namani gare ye tä mun tarere arato. 2 Ñobätä ñan aune kukwe metre tä nikwe aune tädi kärekäre nikwe yebätä. 3 Ni Rün Ngöbö aune Jesukristo ni Rün Monsoi, käkwe kukwe metre ye mikai gare nie aune ni taredi kwetre. Niaratre kukwe kwin ñan nuain bä ni kräke nuaindi ni kräke, ni mikai tuin bobre jai aune kä jäme biain kwetre nie.
4 Ni Rün kukwe biani nie, ye ererebätä mä ngäbriänkä ruäre tä kukwe metre mike täte rababa gare tie, ye käi rababa juto tibätä. 5 Ja ngwai, nengwane mada nikwe ja taredre kwärikwäri tita ribere mäi. (Kukwe nuain mananta ne ñan mrä, ñakare aune tita kukwe tike mäi ne nämänena käne nikwe). 6 Aune ja tare ye abokän, kukwe biani nuaindre kwe ye mikadre täte jankunu meden gärätä. Munkwe kukwe nuani kena nüke nengwane erere, kukwe biani nuaindre ye abokän, munkwe ja taredre jankunu. 7 Ñobätä ñan aune nitre ni ngökaka kwatí tä näin käbiti tibien, aune nitre ye kräke Jesukristo nükani ni nire erere ye ñaka metre. Nitre ye ni ngökaka aune Kristo rüe.
8 Munkwe ja ngübabiti ne kwe jondron namani nikwe sribibätä krubäte ye ñan riadrete munkän aune ütiä biandre täte munye yekäre. 9 Kukwe driebare Kristokwe ye erere jiebiti nire ñan tä näin aune tä kukwe mada driere, ni ye ka ngäbiti ñaka Ngöbökwe. Aune kukwe driebare Kristokwe ye erere jiebiti nire tä näin jankunu, ye Rün aune Monso* tä kain ngäbiti. 10 Ni iti jata munkänti aune kukwe driebare ye erere ñan jata driere munye ngwane, ñan ka ngäbiti gwi aune ñan köbö kwin nie ie. 11 Ñobätä ñan aune nire tä köbö kwin niere ie, ye tä kukwe blo ye nuainne siba ben.
12 Kukwe tä kabre täindre tie munye, akwa ti ñaka tö tikai jerekäbe täräre munye, ñakare aune ti töta näin munkänti blitakäre gwärere munbe, ne kwe kä rabadre juto krubäte munbätä.
13 Mä eteba* dianinkä Ngöbökwe ye monsoitre tä köbö kwin juen mä kräke.