Juan Ketamä
1 Ni umbre* tä kukwe tike Gayo, ti eteba tare kri tikwe ie.
2 Ti eteba tare tikwe, tita orare ne kwe kukwe kwin tädre nemen bare jankunu mä kräke kukwe jökrä känti aune mä tädre räre, mäta kwin gwä ngwane ye erere. 3 Ñobätä ñan aune ja mräkätre rükaba nete ngwane, mäta ja ngwen metre aune mä täbe näin kukwe metrebätä mikaba gare kwetre, ye käkwe kä mikaba juto tibätä. 4 Monsotre tikwe täbe näin kukwe metrebätä kukwe nuata tikwe, ye tä kä mike juto krubäte tibätä.
5 Ti eteba tare tikwe, ja mräkätre ñan gare mäi, akwa mäta kukwe kwin nuainne kräke yebiti mäta ja ngwen metre mäta bämike. 6 Mäta ja tare bämike ye niaratre tä kädriere konkrekasionte. Mäkwe niaratre dimika dre ribei kwetre jai dikakakäre yebätä, aune mäkwe nuain ne kwe kä rabadre juto Ngöböbätä, ye ti tö ribei mäi. 7 Ñobätä ñan aune Ngöbö kä yebätä niaratre nikani blite nitrebe, aune ñan jondron ngibiare nitre juta madate* ie. 8 Yebätä nikwe ja töi mikadre mantiame ja mräkätre ye erere kräke ye tä nuaindre nie, ne kwe ni rabadre kukwe metre ye dimike.
9 Tikwe kukwe tikaba konkrekasion ie, akwa Diótrefes, abokän tä ja mike käne niaratre ngätäite, ye ñan tä kukwe nieta nunkwe ye mike ütiäte jai. 10 Ye medenbätä, ti rabai yete ngwane, kukwe nuainta kwe ye tikwe mikai gare. Niarata nun kädriere blo. Ye ñan aibe ngörä, ñan tä ja mräkätre kain ngäbiti kwin aune ñan mike ütiäte jai. Aune nireta ja töi mike kain ngäbiti ye niarata ketebätä aune kitekä konkrekasionte.
11 Ti eteba tare tikwe, nitre kukwe käme nuainkä ye erere mä ñan ja ngwan, ñakare aune mä kukwe kwin nuain. Nireta kukwe kwin nuainne ye kite Ngöbökri. Nireta kukwe käme nuainne yei Ngöbö ñan gare. 12 Ja mräkätre tä blite kwin Demetriobätä aune kukwe nieta niarabätä ye tä mike gare, niara tä nüne kukwe metre ye ererebätä. Aune nun arato tä blite kwin niarabätä, aune nunta kukwe era niere ye gare mäi.
13 Kukweta kabre täindre tie mäi, akwa ti ñaka tö tikai jerekäbe täräre. 14 Ñakare aune ti tö nibira ja tuai mäbe ne kwe nikwe blitadre gwärere.
Kä jäme tädre mäbe.
Ja ketamuko tä köbö kwin juen mäi. Aune ja ketamuko kräke tita köbö kwin juen, ye mä nie itire itire ie.