Evangelio Juankwe
17 Jesús kukwe niebare ye bitikäre nikrabare kwe kä kwinbätä aune niebare kwe: “Ti Rün, kä nüra. Mä ngobo mike ütiäte ne kwe mä ngobo käkwe mä mikadre ütiäte, 2 mäkwe ja di biani ie nitre jökrä kä tibienbätäbiti* ye erere, ne kwe nitre biani mäkwe ie, ye jökrä ie rabadre ja nire kärekäre bien. 3 Ja nire kärekäre raba nemen kwetre ne köböire: mä abokän Ngöbö metre, niaratre tädre mä mike gare jai aune ni juani mäkwe Jesukristo ye tädre mike gare jai. 4 Tikwe mä mikanina ütiäte kä nebätä, aune mäkwe sribi mikani ti kisete ye nibira bare täte tie. 5 Aisete ti Rün, ni kä tibienbätä jämi ye känenkri ti nämäne ütiäte mä ken ye erere ti miketa ütiäte ja ken.
6 Nire nire nämäne nitre kä tibienbätä ngätäite mäkwe biani tie, ye ie tikwe mä kä mikani gare.* Niaratre mäkwe, akwa mäkwe biani tie, aune niaratre tä mä kukwei mike täte. 7 Nengwane mäkwe dre dre biani tie, ye jökrä kite mäkri ye niena gare ietre. 8 Ñobätä ñan aune mäkwe kukwe biani tie ye tikwe niebare ietre, kani ngäbiti kwetre aune ti jatani mä käbiti ye niena gare metre ta ietre, aune mäkwe ti juani ye era kräketre. 9 Tita orare kräketre. Ti ñan tä orare nitre kä tibienbätä kräke, ñakare aune tita orare nitre biani mäkwe tie ye kräke, ñobätä ñan aune niaratre ye mäkwe. 10 Dre dre tikwe ye mäkwe, dre dre mäkwe ye tikwe, aune mäkwe nitre biani tie ye käkwe ti mikanina ütiäte.
11 Ti ñan niena nitre kä tibienbätä ngätäite, ti näin mäkänti, akwa niaratre abokän täbe nitre kä tibienbätä ngätäite. Ti Rün deme, mä kä, abokän mäkwe biani tie, ye köböire niaratre ngübarebiti, ne kwe nita keteitibe* ye erere niaratre rabadre keteitibe.* 12 Ti nämä bentre ngwane, mä kä, abokän mäkwe biani tie, ye köböire ti nämä niaratre ngübarebiti, tikwe niaratre kriemikaba aune jire iti ganinte, akwa itibe gaite, ne kwe Kukweta Tikani ye rabadre bare. 13 Akwa ti bike nikenta mäkänti aune ti täbe kä tibienbätä yebätä tita kukwe ne niere, ne kwe käta juto tibätä ye erere kä rabadre juto täte bätätre. 14 Tikwe mä kukwei mikani gare ietre, akwa ti ñan ja ngwen nitre kä nebätä erere, ye erere arato niaratre ñan ja ngwen nitre kä nebätä erere, yebätä nitre kä nebätä brukwä kräketre.
15 Mäkwe diandrekä nitre kä nebätä ngätäite ti ñan tä ribere mäi, ñakare aune mäkwe kriemikadre Satana yebätä tita ribere mäi. 16 Ti ñan ja ngwen nitre kä nebätä erere, ye erere arato niaratre ñan ja ngwen nitre kä nebätä erere. 17 Niaratre mike deme* kukwe metre yebiti. Mä kukwei abokän metre. 18 Mäkwe ti juani nitre kä nebätä ngätäite, ye erere arato tita niaratre juen nitre kä nebätä ngätäite. 19 Tita ja mike deme niaratre ütiäre, ne kwe niaratre rabadre deme arato kukwe metrebiti.
20 Ti ñaka tä orare niaratre aibe kräke, ñakare aune kukwe driei kwetre ye köböire nire nire käkwe tödekai tibiti ye kräke tita orare arato, 21 ne kwe niaratre jökrä tädre keteitibe. Ti Rün, mäta keteitibe tibe aune tita keteitibe mäbe, ye erere arato niaratre tädre keteitibe nibe. Aune ye köböire mäkwe ti juani rabai era nitre kä tibienbätä kräke. 22 Mäkwe ti mikani ütiäte ye erere tita niaratre mike ütiäte, ne kwe tädre keteitibe nita keteitibe ye erere. 23 Ti keteitibe niaratre ben aune mä keteitibe tibe, ne kwe niaratre rabadre erametre keteitibe. Ye köböire mäkwe ti juani aune mäkwe ti tarebare ye erere mäkwe niaratre tarebare rabai gare nitre kä tibienbätä ie. 24 Ti Rün, ti tädre medente yekänti mäkwe nitre biani tie ye tädre tibe ie ti tö, ne kwe mäkwe ti mikani ütiäte ye jutuadre ietre, ñobätä ñan aune ni kä nebätä sribebare kena* ye känenkri mäkwe ti tarebare. 25 Ti Rün, mä kukwe metre nuainkä, metrere mä jämi gare nitre kä nebätä ie, akwa mä gare tie aune mäkwe ti juani garera ietre. 26 Tikwe mä kä mikani gare ietre, aune tikwe mikai gare jankunu ietre, ne kwe mäkwe ti tarebare ye erere niaratre ni mada taredre aune ti tädre keteitibe bentre”.