Evangelio Lucakwe

6 Bati, köbö ja dükakäre* te, Jesús nämäne näin tirete trigo nökani yete ta, aune nitre ja tötikaka kwe nämäne ngwä monointe, mrükete kisete aune ngwä kwete. 2 Ye medenbätä, nitre fariseo ruäre käkwe niebare ietre: “¿Kukwe ñan nuaindre köbö ja dükakäre te ye ñobätä munta nuainne?”. 3 Akwa, Jesukwe niebare ietre: “David aune nitre nänkä ben ie mrö namani ngwane, ¿Davidkwe dre nuainbare yebätä mun ñan ñäkäbare jire? 4 ¿Akräke ñan nikani ju Ngöbökwe* te aune pan mikani Ngöbö ngwärekri* ye kani ngäbiti kwe, kwetani kwe aune biani kwe nitre nänkä ben yei? Aune kukwe ye ni jire iti raba nuainne, ñobätä ñan aune sacerdote aibe raba kwete”. 5 Aisete Jesukwe niebare ietre: “Ni Kä Nebätä Monsoi ye köbö ja dükakäre Däkien”.

6 Köbö ja dükakäre mada te nikani sinagogate aune nikani dirire. Aune yete ni brare iti kise ruinkri nakwaninkä* nämäne. 7 Köbö ja dükakäre aisete, Jesukwe ni mikaita räre o ñakare ye mikakäre ñärärä, nitre escriba aune fariseo ñaka namani okwä denkä Jesubätä, ne kwe kukwe kwandre ietre kitai ngisekäre. 8 Akwa, nämänentre töbike ño ye nämäne gare ie, aisete ni brare kise nakwaninkä yei ribebare kwe: “Näin krö aune nünenkä kä tetubu nete”. Niara nükani krö aune namani nünaninkä yete. 9 Ye ngwane Jesukwe niebare ietre: “Ti ngwentari munye. ¿Dre nuain raba köbö ja dükakäre te? ¿Kukwe kwin nuaindre o kukwe blo nuaindre? ¿Ja nire mikadre kwäre o juandre ngwarbe?”. 10 Aune nitre nämäne bäre ye jökräbätä nikrabare kwe, ye bitikäre niebare kwe ni yei: “Kise ngököte”. Nuainbare kwe ngwane, kise namaninta räre. 11 Akwa niaratre ye brukwä namani tainbrere, yebätä raba dre nuainne Jesubätä ye nikanintre kädriere jabe.

12 Köbö keteiti ye ngwane, niara nikani ngutuäbiti orare aune dibire ta orabare kwe Ngöböi. 13 Kä namani ngwen ngwane, nitre ja tötikaka kwe ye käräbare kwe aune nitre ye ngätäite Ni Jätäbiti Nibu ye dianinkä kwe, abokän kädekani kwe apóstol: 14 Simón (abokän ie Pedro nieta) aune eteba kwe Andrés, Santiago, Juan, Felipe, Bartolomé, 15 Mateo, Tomás, Santiago Alfeo ngobo, Simón (abokän kädekata baliente), 16 Judas* Santiago ngobo, aune Judas Iscariote (abokän käkwe Jesús rürübäinbare).

17 Ye bitikäre, jatani moto niaratre ben aune nükani kä kiare känti, yete nitre ja tötikaka kwe kwatí aune nitre mada kwatí, kä jökrä Judea, Jerusalén aune kä mren kräbäre Tiro aune Sidón nämäne yete. Niaratre jatani niara kukwe nuakäre aune mikadreta räre kwe bren kwetre yebätä yekäre. 18 Nitre nämäne ja tare nike üai käme kisete, ye jökrä nämäne nementa räre. 19 Aune nitre kwatí ye namani ja di ngwen kise ketakakärebätä, ñobätä ñan aune di niarabätä ye namani nitre jökrä miketa räre.

20 Ye ngwane dokwä ganinkä kwe, nikrabare kwe nitre ja tötikaka kwebätä aune niebare kwe:

“Mun bobre, yebätä kä juto, ñobätä ñan aune Gobran Ngöbökwe ye munkwe.

21 Mun tä mrö nike nengwane, yebätä kä juto, ñobätä ñan aune mun rabai trine.

Mun tä ja muaire nengwane, yebätä kä juto, ñobätä ñan aune munkwe kötai.

22 Ni Kä Nebätä Monsoi yebätä, nitre brukwä raba munkrä, mun mika ngwarbe jai, ñäkä tare munye, aune mun kä mika käme ngwane, kä juto munbätä. 23 Kukwe ne raba bare ngwane, kä jutobiti ja täkete kwin, ñobätä ñan aune, tuin, kukwe kwin krubäte tä mun kräke kä kwinbiti, ñobätä ñan aune kukwe ye arabe nuain nämä niaratre mräkätre kirakwe nitre Ngöbö kukwei niekä yebätä.

24 ¡Akwa mun jondron bäkäne ere, mun bobre jakän, ñobätä ñan aune dre mun töi mike jäme ye namanina jökrä munkwe!

25 ¡Munta trine nengwane, ye bobre jakän, ñobätä ñan aune munkwe mrö nikai!

¡Munta kötö nengwane, ye bobre jakän, ñobätä ñan aune mun rabai ulire aune munkwe muadi!

26 ¡Nitre jökrä raba blite kwin munbätä ngwane, mun bobre jakän, ñobätä ñan aune ye erere niaratre mräkä kira käkwe nuainbare nitre ngöbö kukwei niekä ngwarbe yebätä!

27 Akwa mun ti kukwe nuaka, ie ti niere, munkwe mun rüe tare jankunu aune munkwe kukwe kwin nuain jankunu nitre brukwä munkrä ye kräke. 28 Nitre tä kukwe käme ribere mun kräke ye kräke munkwe kukwe kwin ribe, aune nire tä ñäke blo mun rüere ye kräke munkwe ora jankunu. 29 Ni iti mä meta ngwärebätä ngwane, mäkwe ja ngwäre kwäräkri mika metara ie. Ni itikwe dänkwä kri ye dianka mäkän ngwane, mäkwe dän jabätä ye mikate ie arato. 30 Nire käkwe jondron kärä mäi ngwane, mäkwe bian ie. Aune nire käkwe jondron mäkwe dianka mäkän ngwane, biandreta kwe mäi ye mäkwe ñan ribe ie.

31 Arato mun tö dre nuainmana ja kräke ye erere munkwe nuain ni mada kräke.

32 Nireta mun tarere ye munta tarere ngwane, ¿se drebätä debe biandre munye? Ñobätä ñan aune nitre ja mikaka ngite ye tä nitre niaratre tarekä ye tarere arato. 33 Nireta kukwe kwin nuainne mun kräke ye kräke munta kukwe kwin nuainne ngwane, ¿se drebätä debe biandre munye? Nitre ja mikaka ngite tä ye nuainne arato. 34 Aune jondron biainta munye munta nütüre, yebätä munta bien* ngwane, ¿se drebätä debe biandre munye? Ni ja mikaka ngite ye tä jondron bien ni ja mikaka ngite mada ie arato ne kwe jondron ye arabe biandreta ie. 35 Mun abokän käkwe mun rüe tare,* kukwe kwin nuain* aune munkwe jondron bian* ye biandreta munye ye ñan ngüba. Ye ngwane ütiä biain ere munye aune mun rabai Ngöbö Kä Kwinbiti monsoi, ñobätä ñan aune nitre ñan debe bien aune ja ngwen käme yebe arato niarata ja ngwen mantiame. 36 Munkwe ni mika tuin bobre* jai, mun Rün ni mike tuin bobre jai ye erere.

37 Ne madakäre, ñan ñäkä jankunu ni mada rüere ne kwe ñan ñäkädre mun rüere. Ñan ñäkä blo jankunu ni madabätä ne kwe ñan ñäkäi blo munbätä. Ngite kite* ta aune ngite kitai ta munbiti. 38 Käre munkwe jondron bian aune biain munye. Dän munbätä yete jondron biain ere munye, ngrükaninte, ketani dime jabiti aune betekä biti ta. Ñobätä ñan aune munta ja ngwen ño ni madabe ye erere niaratrekwe ja ngwain munbe”.

39 Ye bitikäre kukwe ne bämikani kwe ietre: “Ni iti kä drüne okwäte ye ñan raba ni mada kä drüne okwäte ye jie ngwen, ¿ñan ererea? Nibutre betadrekä kä mäkäte, ¿ñan ererea? 40 Ni ja tötikaka ye ñan tä bäri ni dirikä yebiti ta, akwa ni jökrä tötikata kwin ye rabai dirikä kwe erere. 41 ¿Ñobätä mä okwäta kä burie chi tä ni mada okwäte yebätä, akwa mä ñan kri oto kri tä mä okwäte ye mike ñärärä jai? 42 ¿Kri oto kri tä mä okwäte ñan tuin mäi se ño amare ja nüke törö mäi niekäre mä eteba* ie, ‘Ti eteba, ti tuenmetre kä burie tä mä okwäte ye denkä jai’? ¡Ja ruin deme mäi! Käne mäkwe kri oto tä mä okwäte ye dianka, biti kä burie tä mä eteba okwäte ye mä raba denkä ño ie, ye jutuai bäri kwin mäi.

43 Kri kwin ye ñan nemen ngwäre kämebätä aune kri jökrä ngütiete ye ngwä kwin ñan nemen. 44 Ñobätä ñan aune kri datire datire yebätä ngwä nemen ño yebiti nemen gare. Ñodre higo öta ñaka kri tukwäre yebätä aune uva öta ñaka jire kri chi tukwäre yebätä. 45 Ni iti töi kwin ye tä jondron kwin ükaninkrö kwe jondron kwin ngätäite ja brukwäte ye den kä mrebiti, akwa ni käme ye tä jondron käme ükaninkrö kwe jondron käme ngätäite ye den kä mrebiti. Ñobätä ñan aune dreta brukwäte ye erere tä betekä kadate.

46 ¿Ñobätä munta ti kädeke ‘¡Däkien! ¡Däkien!’ akwa tita kukwe niere ye mun ñan nuainne? 47 Ni iti tä kite ti känti, tä ti kukwe nuin aune tä kukwe ye nuainne, ni ye nire erere ye ti bike bämike munye. 48 Ju sribekäre ni iti käkwe kä muani mente nguse aune üra nökani jäte kwe ye erere ni ye. Ye medenbätä kä nikani ñöte ngwane, ñö matani ja dibiti ju yebätä, akwa nämäne sribebare kwin yebätä ñan ngrükaninte kwe. 49 Ni iti tä ti kukwe nuin akwa ñan tä mike täte, ni ye abokän, ni iti käkwe ju sribebare dobrobiti, akwa ñan üra nökani kwe dobrote ye kwrere. Ñö matani ja dibiti ju yebätä ye bengwaire nikwitaninkä tibien. Ju ye nikwitaninkä tibien aune ngidianinte jökrä”.