Evangelio Mateokwe

22 Mada bati, Jesukwe kukwe bämikani ietre blitakäre bentre. Niebare kwe ietre: 2 “Rei iti käkwe mrö sribebare ere krubäte ngobo nämäne ja mäkete kräke, ye kwrere Gobran kä kwinbätä ye bämika raba. 3 Reikwe nitre klabore kwe ye juani nitre nübaibare ja mäkätebätä ye kärere. Akwa nitre nübaibare ye ñaka tö namani näin. 4 Ye bitikäre nitre klabore mada juani kwe aune kukwe ne niebare kwe ietre: ‘Nitre nübaibare yei munkwe nie: “Tuin, mrö nibira bare tie. Toro tikwe aune jondron nire kabre kötikani ye kämirira. Jondron jökrä nibira bare. Mun jakwe ja mäkäte nebätä”’. 5 Akwa nitre nübaibare yekwe ñan kukwe ye töibikaibare ñakare aune ruäre nikani tirete jai, mada nikani negocio jakwete. 6 Aune mada abokän ie nitre klabore ye neketaninte, nuainbare tare kwetre aune kämikani kwetre.

7 Rei namani rubun krubäte aisete nitre rükä juani kwe. Nitre käme krubäte ye ganinte kwe aune juta kwetre ye kukwani kwe. 8 Ye bitikäre reikwe niebare nitre klabore kwe ie: ‘Mrö nibira bare, akwa nitre nübaibare ye ñan nübaidre ye bämikani kwetre. 9 Ye medenbätä, mun nän ji niken jutate yebiti aune nitre kwan munye ye jökrä munkwe nübai ja mäkätebätä’. 10 Aisete nitre klabore ye nikani jibiti aune nitre jökrä kwin o käme kwani ietre ye ükaninkrö kwetre. Aune nitre nübaibare ye namani ja mäkäte käi ükaninte ye kwáti.

11 Rei nikani gwä nitre nübaibare ye mike ñärärä ngwane, ni iti ñan nämäne dän nänkäre fiestabätä kitani jabätä ye jutuabare ie. 12 Aisete niebare kwe ie: ‘Ti mräkä, ¿ñobätä mäkwe ñan dän nänkäre fiestabätä kiti jabätä, biti mä nü nete ye?’. Ni ye ñan krörö niebare ie. 13 Aisete reikwe niebare sribikätre kwe ie: ‘Kise mäke aune ngüre mäke biti kite jubäre kä ikote. Yete ja muaidi kwe aune tu ukwadi kwe ja tare nikabätä’.

14 Ñobätä ñan aune Ngöböta ni kwatí nübaire, akwa braibe ka ngäbitita kwe”.

15 Ye bitikäre, nitre fariseo nikani aune Jesús nämäne blite ño yebiti raba nakain ietre, yebätä blitabare kwetre jabe. 16 Ye medenbätä nitre ja tötikaka ruäre kwetre aune nitre reketaka Herodekri ye ruäre juani kwetre ne niekäre Jesús ie: “Dirikä, gare nunye, käre mäta kukwe metre niere, käre mäta kukwe metre Ngöböbätä driere aune nitrekwe mä kadre ngäbiti ye mä ñan tä ngübare. Ñobätä ñan aune nitre ño ye mä ñan töibikaire. 17 Aisete niere nunye, ¿mä töita ño kukwe nebätä? Impuesto ütiä biandre Rei Romano* ie, ¿ye kwin o ñakare?”. 18 Akwa niaratre töi käme ye nämäne gare Jesús ie, yebätä niebare kwe ietre: “Mun ja bämikaka jerekäbe, ¿ñobätä munta ti nuinte? 19 Ngwian impuesto ütiä biankäre ye mike tuare tie”. Niaratrekwe denario kwati biani ie. 20 Jesukwe ngwanintari ietre: “¿Nire üai aune nire kä tä tikani nete?”. 21 “Rei Romano üai aune kä tä tikani yete”, niebare kwetre. Aune bengwairebe Jesukwe niebare ietre: “Aisete jondron Rei Romanonkwe ye erere biandre Rei Romano ie, akwa jondron Ngöbökwe ye erere biandre Ngöböi”. 22 Ye juruabare ietre ngwane, töi namanintre ñan krütare. Tuanimetre kwetre aune nikanintre mento.

23 Köbö ye arabe te, nitre saduceo, abokän tätre niere ni ñan gaikröta, ye jatani aune ngwanintari kwetre ie: 24 “Dirikä, Moisekwe niebare: ‘Ni brare iti kwe monso jämi nemen känenkri krütadre ngwane, eteba kwe rabadre ja mäkete meri namani kaibe yebe, ne kwe rabadre monso bien etebamre krütani yei’. 25 Bati, ni ja etebare nämäne ni kükü. Ni ja etebare ye mubai käkwe ja mäkäninte, akwa krütani, monsoi ñan namani aisete meri namani kaibe ye namani eteba jiebitikäre ye kräke. 26 Ye erere namani bare eteba nibukäre, nimäkäre, nememe ni kükükäre yebätä. 27 Niaratre krütani jökrä ye bitikäre meri ye krütani. 28 Köbö te nitre mikaita nire ngwane, meri ye rabai ni ja etebare ni kükü ye medenkwe ye niere nunye, ñobätä ñan aune niaratre ye jökrä käkwe ja mäkäninte meri yebe”.

29 Jesukwe niebare ietre: “Munta töbike blo, ñobätä ñan aune Ngöbö Kukwei ye ñan gare munye aune Ngöbö die nuäi ye ñan gare munye. 30 Nitre mikaita nire ye näire, nitre brare aune merire yekwe ñaka ja mäkäite, ñakare aune niaratre rabai angeletre tä kä kwinbätä ye kwrere. 31 Aune nitre ngwakare mikaita nire yebätä, ¿Ngöbökwe kukwe ne niebare munye yebätä munkwe ñaka ñäkäbare? Niebare kwe: 32 ‘Ti abokän Ngöbö Abrahankwe, Ngöbö Isaackwe aune Ngöbö Jacobkwe’. Niara ye ñaka Ngöbö ni ngwakarekwe, ñakare aune niara Ngöbö ni nirekwe”. 33 Ye juruabare nitre kwatí yei ngwane, töi namanintre ñan krütare nämäne dirire ño yebätä.

34 Jesukwe nitre saduceo ngwani kwekebe ja käne ye namani gare nitre fariseo ie ngwane, ja ükaninkrö keteitibe kwetre. 35 Niaratre iti ye ie kukwe nämäne gare krubäte Leibätä,* ye käkwe kukwe ne ngwanintari ie nuatekäre: 36 “Dirikä, ¿kukwe nuain mananbare Leibätä ye meden bäri ütiäte?”. 37 Niarakwe niebare ie: “‘Mäkwe Jehová Ngöbö mäkwe, tare ja brukwä tätebiti, ja nire tätebiti aune ja töi tätebiti’. 38 Kukwe ne abokän kena aune bäri ütiäte kukwe nuain mananbare Leibätä yebätä. 39 Ketebukäre ye abokän bäsi erere, ye tä niere: ‘Mäkwe ni mada tare mäta ja tarere ño ye erere’. 40 Kukwe jökrä tä tikani Leibätä aune kukwe jökrä niebare Nitre Ngöbö Kukwei Niekäkwe* ye kite kukwe ketebu nuain mananbare yekri”.

41 Ye bitikäre, nitre fariseo nämäne ja ükaninkrö yete ngwane, Jesukwe ngwanintari ietre: 42 “¿Munta töbike ño Kristobätä? ¿Niara ye kite nirekri?”. Niaratrekwe niebare ie: “Davidkri”. 43 Niarakwe niebare ietre: “¿Se ño amare üai deme käkwe David jie ngwani Däkien niekäre ie? Ñobätä ñan aune niebare kwe: 44 ‘Jehovakwe nieba Däkien tikwe ie: “Täke ti kise ruinkri nememe tikwe mä rüe mikai mä ngoto täni ngwane”’. 45 Davidta Däkien niere ie, ¿se ño amare Kristo kite Davidkri nie raba?”. 46 Ni jire iti käkwe kukwe niebare kukweikäre. Aune yete ja käne ni jire iti ie ja nükani törö kukwe ngwantarikäre ie.