Evangelio Mateokwe

10 Ye bitikäre, Jesukwe nitre ja tötikaka ni jätäbiti nibu ükaninkrö aune ja di biani kwe ietre, ne kwe rabadre chokalitre juentari aune rabadre bren bätäkä ngwarbe miketa räre.

2 Nitre apóstol* ni jätäbiti nibu abokän kä krörö: Simón abokän ie Pedro nieta aune eteba kwe abokän Andrés, Santiago aune Juan abokän Zebedeo ngäbriänkä. 3 Felipe aune Bartolomé, Tomás, Mateo impuesto ütiä käräkä, Santiago Alfeo ngobo, aune Tadeo. 4 Simón abokän cananita aune Judas Iscariote, ne bä käkwe ja känenkäre Jesús kitani ngise.

5 Jesukwe nitre ni jätäbiti nibu juani aune kukwe ne niebare kwe ietre: “Mun ñan rika ji niken ni ngwena juta madate* yebiti aune mun ñan rika jire juta keteiti juta Samaria yete. 6 Ñakare aune oveja juta Israelkwe nianinte ye mun rika känene bati bobu. 7 Mun rika kukwe ne driere: ‘Gobran kä kwinbiti nibira no’. 8 Munkwe nitre bren mikata räre, nitre krütani ye mikata nire,* munkwe nitre mikata räre lepra yebätä aune munkwe chokali juantari nitrebätä. Biani ngwarbe munye aisete munkwe bian ngwarbe. 9 Mun rikadre oro, ngwian, cobre ngwena ngwian ngwä yete jai yebätä mun ñan töbika.* 10 Arato mun rikadre mrö, dän ötöbu, sandalia mada, mökän mada ngwena jai yebätä munkwe ñan töbika. Ñobätä ñan aune ni sribikä ye kräke mrö tärä.

11 Mun rika juta krikri te o juta kiakia te ngwane, kukwe ngwanta munkwe ye nire tö kukwe nuai ye munkwe känä. Kwan munye ngwane, mun raba yete* nememe mun kä mikaka yete ngwane. 12 Mun rika ju keteiti te ngwane, nita gwi yei munkwe köbö kwin nie.* 13 Mun ka ngäbiti kwin ngwane, kä jäme ribebare munkwe kräketre ye rabadre kwetre. Akwa ñakare ngwane, kä jäme ye rabata munkwe. 14 Ñan mun ka ngäbiti kwin aune ñan mun kukwe nua, ju kwati o juta keteiti te ngwane, mun rika mento yete aune munkwe kä münü känte ja ngotobätä. 15 Ti niere metre munye, juta ye käkwe ja tare nikadi bäri Sodoma aune Gomorra ye kräke, köbö te kukwe ükaite ye näire.

16 Oveja juanta nukro rubun* ngätäite ye kwrere tita mun juen. Aisete, munkwe ja ngwan mokre icha erere, akwa munkwe ja brukwä mika kwin ütü erere. 17 Munkwe ja ngübabiti nitrebätä ñobätä ñan aune mun jänäin kwetre tribunal ye ngwärekri aune mun kwata metai kwetre sinagogate. 18 Aune ja tötikabätä tibe mun jänäin nitre gobranka aune reitre ngwärekri. Ye köböire munta tödeke tibiti ye rabai gare ietre aune juta käbiti tibien ie. 19 Akwa, mun jänraba ngwärekri ngwane, munkwe dre niei o munkwe niei ño, yebätä munkwe ñan ja töibika krubäte. Ñobätä ñan aune kä rükai ngwane, munkwe dre niedi ye mikadi gare munye. 20 Ñan mun aibe käkwe blitadi. Ñakare aune üai deme mun Rünkwe käkwe blitadi mun kräke. 21 Ne madakäre, ni ja etebare käkwe eteba biain kämikakäre aune ni rüne käkwe monso kwe biain kämikakäre. Aune monsotre rikwitaite rün rüere aune kämika manain kwe. 22 Ti kä ngwanbätä jabätä,* nitre jökrä brukwä rabadi mun kräke. Akwa nirekwe kä ngwandi nüke jai nememe mrä ye rabai kwäre. 23 Ja mika mun rüere juta keteiti te ngwane, mun gitia juta madate. Ñobätä ñan aune ti niere metre munye, mun ñan rabai juta Israel ye jökrä te, Ni Kä Nebätä Monsoi jämi nüke ye känenkri.

24 Ni ja tötikaka ye ñan tä bäri ni dirikä yebiti ta, ni klabore ye ñan tä bäri ni bäkänkä yebiti ta. 25 Ni ja tötikaka ye rabadre ni dirikä ye kwrere ye niena debe, ni klabore ye rabadre ni bäkänkä kwe kwrere ye niena debe. Ni ju bäkänkä gwi ie Belcebú* nieta, ¿se ni gwita ñan bäri kädekai kore kwetre? 26 Aisete, mun ñan jürä ngwan jabätä, ñobätä ñan aune dre tä ükani ye rabai kä mrebiti aune dre tä tiebe ye rabai gare. 27 Tikwe kukwe nie kä ikote munye, ye munkwe nie kä trä ngwenbrere te aune tikwe kukwe nie mun olote ye munkwe diri ju dokwäbiti kwin. 28 Ni iti raba mä murie kete, akwa ñan raba ja nire mäkwe ja känenkäre denkä mäkän ye ñan jürä ngwan jabätä. Ñakare aune Ngöbö raba ja nire mäkwe aune mä ngrabare juen ngwarbe Gehenante* yebrä mä jürä ngwan jabätä. 29 Nukwä kia kubu rürübäinta ngwian kwatibe ütiä ñakarebätä,* ¿ñan ererea? Akwa tä nüke mate tibien ngwane, gare mä Rün kä kwinbiti ie. 30 Akwa mun abokän dokwä druen kratire kratire tä jökrä täinbare. 31 Aisete ñan kä jürä ngwan jabätä. Mun bäri ütiäte nukwä kia kabre ye kräke.

32 Ni iti ja mikadi tikri nitre okwäbiti ngwane, ti arato käkwe ja mikadi niarakri ti Rün kä kwinbiti ngwärekri. 33 Akwa nire ñan tä ja mike tikri nitre okwäbiti ngwane, ti arato ñan ja mikadi niarakri ti Rün kä kwinbiti ngwärekri. 34 Ti jatani kä jäme ngwena kä tibienbätä ye munkwe ñan nütü. Ti ñan jatani kä jäme ngwena, ñakare aune ti jatani rü ngwena. 35 Ñobätä ñan aune ti jatani ni ñäkebiti. Monso brare rikwitadi rün rüere, monso merire rikwitadi meye rüere aune bosi rikwitadi bi kwe rüere. 36 Ye erere, ni itire itire ye rüe rakaikä gwita. 37 Nire tä rün o meye tarere bäri ti kräke, ni ye ñan raba nemen ja tötikaka tibe. Aune nire tä ngobo o ngängän kwe tarere bäri ti kräke, ni ye ñan raba nemen ja tötikaka tibe. 38 Aune nire ñan tä kri oto ja tare nikakäre* jakwe ye kain ngäbiti aune näin ti jiebiti, ni ye ñan raba nemen ja tötikaka tibe. 39 Nire tä ja di ngwen ja nire jakwe mikakäre kwäre, yekwe ja nire riaite. Aune ja tötikabätä tibe nire kän ja nire riaite, yekwe nünainta bobukäre.

40 Nire tä mun kain ngäbiti ye tä ti kain ngäbiti arato, aune nire tä ti kain ngäbiti ye tä ni ti juanka kain ngäbiti arato. 41 Ni iti profeta yebätä ni iti käkwe kai ngäbiti ngwane, dre bianta profeta ie, ye erere biain ni ka ngäbitikä yei. Ni iti ja ngwanka metre yebätä ni iti käkwe kai ngäbiti ngwane, dre bianta ni ja ngwanka metre ie, ye erere biain ni ka ngäbitikä yei. 42 Aune ti niere metre munye, nirekwe ñö tibo biain vaso kwatibe nitre bobre nei, tätre ja tötike tibe yebätä ngwane, ni ñö bianka yekwe kukwe kwin rabai”.