Filemón Kräke
1 Ti Pablo, tä ngite tödekabätä Kristo Jesús ie, aune ni eteba Timoteo tä kukwe tike, sribi muko tare nunkwe Filemón, 2 nun ngwai Apfia, ni rükä siba nunbe Arquipo, bätä konkrekasion tä mä gwirete ye ie:
3 Kukwe kwin ñan nuain bä ni kräke aune kä jäme kite ni Rün Ngöbökri aune Däkien Jesukristokri ye raba munkwe.
4 Käre tita debe bien Ngöbö tikwe ie tita mä kädekete orasionte ngwane, 5 ñobätä ñan aune mäta tödeke aune mäta Däkien Jesús tarere bätä nitre dianinkä Ngöbökwe* tarere kukwe nua täbe tikwe yebätä. 6 Tita orare ne kwe mäta tödeke nitre mada erere, ye käkwe mä töi mikadre kukwe jökrä kwin tä nikwe Kristo köböire ye gain. 7 Mäta ni mada tarere rababa gare tie ye käkwe kä mikaba juto tibätä aune ti töi mikaba jäme, ñobätä ñan aune mä köböire, ti eteba, nitre dianinkä Ngöbökwe ye brukwä namaninta dite.
8 Ye medenbätä, Kristo käbiti mäkwe kukwe metre nuaindre ye ti raba niere metre mäi. 9 Akwa mäta ni mada tarere yebätä ti tö ribedi mäi, ñobätä ñan aune, ti Pablo, niena umbre aune nengwane arato tita ngite tödekabätä Kristo Jesús ie. 10 Ti ngobo Onésimo, abokän kräke ti namani ni rüne erere ngite käi känti, ye kräke tita ribere mäi. 11 Käne niara ñan nämä sribire kwin ni klabore erere, akwa nengwane niara raba mä dimike aune ti dimike. 12 Tita niara juenta mä känti, niara tare krubäte tikwe.
13 Tita kitani ngite kukwe kwin Ngöbökwe mikabätä täte, aisete ti törba niara ketaite ja känti, ne kwe rabadre mä täte aune ti dimikadre kwe. 14 Akwa kukwe ñan debe mä kräke ye ti ñan tö nuainbätä, ne kwe mäkwe ñaka kukwe kwin ne nuaindre nuain mananta mäi yebätä, ñakare aune mäkwe nuaindre ja töi jeñebiti. 15 Bäkänä, niarakwe kämikaninkä mäbätä kä ruäre te, akwa nane mada kukwe ye namani bare ne kwe niara rabadreta kärekäre mäkwe, 16 ñan ni klabore erere jerekäbe, ñakare aune ni ja etebare ja tarekä erere. Niara tare krubäte tikwe, akwa rabadre bäri tare mäkwe ñobätä ñan aune mun rabaita keteitibe aune gwairebe Däkien mike täte yebätä. 17 Aisete, ti tuin ja ketamuko erere mäi ngwane, mäkwe ka ngäbiti töi kwinbiti, mä ti kadre ngäbiti ye erere. 18 Ne madakäre, kukwe blo nuainbare kwe mäbätä o rürübän ütiäta niarabiti mäkwe ngwane, mäkwe ngite kwe ye kita tibiti. 19 Ti, Pablo, tä kukwe tike ja kise jeñebiti mäi: tikwe ütiä biain mäi, (ja nire mäkwe, mäkwe biandre tie ja ütiäre ye ti ñan kädekete mäi). 20 Jän, ti eteba, Däkien kukwe nuainbare ni kräke yebätä kukwe ne nuainne ti kräke aune Kristo mikabätä täte kä mike juto ti brukwäbätä.
21 Mäkwe ti mikai täte gare metre tie, yebätä tita kukwe tike mäi, ñobätä ñan aune tita dre ribere mäi ye mäkwe nuain biti bäri gare tie yebätä. 22 Ne madakäre, mäkwe kä ükate ti käne ne kwe ti rabadre yete, ñobätä ñan aune munta orare ye köböire ti mikaita kwäre mun kräke ngübata tikwe.
23 Epafras, tä kitani ngite ti erere Kristo Jesús mikabätä täte, tä köbö kwin juen mä kräke. 24 Arato sribi muko tikwe Marcos, Aristarco, Demas aune Lucas tä köbö kwin juen mä kräke.
25 Kukwe kwin ñan nuain bä ni kräke kite Däkien Jesukristokri ye tädre munbe, mun brukwä kwin yebätä.