Evangelio Lucakwe

18 Ye bitikäre, ñobätä niaratre rabadre orare jankunu aune ñaka ja di ngwandre nekä kwetre yekäre kukwe bämikani kwe ietre. 2 Niebare kwe ietre: “Juta keteiti känti ni kukwe ükatekä ñan Ngöbö mike täte* aune ñan nitre mike ütiäte jai nämäne iti. 3 Juta ye arabe känti meri kän muko krütani nämäne iti, meri ye nämäne nemen bati bobu känti aune nämäne niere ie: ‘Kukweta ti rüere ti rüekwe ye ükadrete ti kräke ie ti tönibi’. 4 Aune kä nikani ruäre ta yete, ñaka tö namani kukwe ükaite kräke, akwa biti niebare kwe jai: ‘Ti ñan Ngöbö mike täte* aune nitre mike ütiäte jai akwa, 5 meri kän muko krütani ne tä ti nike jankunu, aisete tikwe dimikai kukwe ükatekäre kräke ne kwe ñaka ti nikadre jankunu kwe’”. 6 Aune Däkienkwe niebare jankunu: “Ni kukwe ükatekä ne ñan kukwe ükete kwin, ¿akwa dre niebare kwe ye jutuani munye? 7 Akräke nitre dianinkä Ngöbökwe tä ja di ribere kisere ie dibire rare, abokän ngübata bätärekä kwe, ¿ye kräke ñan kukwe ükaite kwe ya? 8 Ti niere munye, niara ara käkwe kukwe ükaite jötrö ngwarbe kräketre. Akwa Ni Kä Nebätä Monsoi rükai ngwane, ¿tödeka ye erere kwain kä tibienbätä ie?”.

9 Arato nitre ruäre nämäne ja ngwen kwin nämäne ruin jabätä ietre aune nitre mada ye ñaka ütiäte nämäne ruin ietre, ye ie Jesukwe kukwe ne bämikani: 10 “Nitre brare nibu nikani mintukwäre orakäre templote: iti fariseo aune iti abokän impuesto ütiä käräkä. 11 Ni fariseo ye nükani krö aune namani orare käbube. Namani niere: ‘Ngöbö, tita debe bien mäi, ñobätä ñan aune ti ñan ja ngwen nitre jökrä erere. Ñodre, ni jondron diankaka ja dibiti ni madakän, ni ñan ja ngwen kwin, ni ja mäkäninte nemen ni madabe, arato ti ñan ja ngwen ni impuesto ütiä käräkä ne erere. 12 Tita ja töi mike ñan mröre* bobu jire bämän kratire kratire aune jondron jökrä tikwe ye tita bien braibe’.* 13 Akwa ni impuesto ütiä käräkä nämäne nünaninkä bä mente se kwrere, ie ja ñan nämäne nüke törö nikrakäre kunkwäre, ñakare aune nämäne ja mete mäträräbätä aune nämäne niere: ‘Ngöbö, ti mike tuin bobre jai, ti ngite yebätä’. 14 Ti niere munye, ni ne nikaninta motokwäre ja gwirete ngwane, Ngöbö okwäkänti ni ne namani ja ngwen bäri kwin ni fariseo ye kräke. Ñobätä ñan aune ni jökrä käkwe ja mikadi kri ye mikadi ngwarbe jai, akwa nire käkwe ja ngwandi bobre ye mikadi ütiäte kri”.

15 Arato nitre namani kite monsotre kia ngwena ie, ne kwe niarakwe kise ketadrekäbätä.* Akwa ye jutuabare nitre ja tötikaka ie ngwane, namanintre ñäke nitre ye ie. 16 Akwa monsotre jäntadre Jesús ie ribebare Jesukwe aune niebare kwe: “Monsotre tuenmetre nüke tikänti. Mun ñan tö ngwan ketaibätä, ñobätä ñan aune Gobran Ngöbökwe ye abokän nitre niaratre ye kwrerekwe. 17 Nire ñaka Gobran Ngöbökwe kain ngäbiti monso kia erere, ye ñaka rabai jire Gobran yete ye ti niere metre munye”.

18 Ni brare nitre judío jie ngwanka käkwe ngwanintari ie: “Dirikä kwin, ¿ti raba dre nuainne ne kwe ja nire kärekäre ye rabadre tikwe?”. 19 Jesukwe niebare ie: “¿Ñobätä ti kwin mäta niere tie? Ni itibe kwin ye abokän Ngöbö. 20 Kukwe nuain mananbare ne gare mäi: ni ja mäkäninte ñan raba ni madabe,* ñan ni murie keta, ñan go, ñan kukwe ngwarbe nie ni madabätä, mäkwe mä rün aune mä meye mika ütiäte jai”.* 21 Aune ni yekwe niebare ie: “Kukwe jökrä ne, ti nämäne monsore ngwane, ti jatani mike täte”. 22 Jesukwe kukwe nuani ye bitikäre niebare kwe ie: “Kukwe keteiti täbe nuaindre mäi: jondron jökrä tä mäkwe ye rürübäine aune ngwian ye döräire nitre bobrebiti. Ye köböire jondron ütiäte rabai kä kwinbätä mäkwe. Biti mä jata aune mäkwe ja mika ja tötikaka tikwe”. 23 Ye juruabare ni brare yei ngwane, moto namani ulire krubäte, ñobätä ñan aune niara ye jondron bäkäne ere.

24 Jesukwe mikani ñärärä aune niebare kwe: “¡Nitre ngwian bäkäne kräke ñaka rabai nuäre ji tikakakäre ja käne nememe Gobran Ngöbökwe yete! 25 Metrere, camello kräke bäri nuäre nänkäre agu mäkäte ta, ni jondron bäkäne ere krubäte rikadre Gobran Ngöbökwe te ye kräke”. 26 Nitre ie kukwe ye juruabare käkwe ngwanintari: “Aisete, ¿se nire raba nemen kwäre?”. 27 Jesukwe niebare: “Jondron ñan raba nemen bare ni kä nebätä ie, ye Ngöbö ie nemen bare”. 28 Pedrokwe niebare ie: “Akwa nänbätä mäbe nunkwe jondron nunkwe tuanimetre”. 29 Niarakwe niebare ietre: “Ti niere metre munye, nire käkwe ja jue, muko,* etebatre, rün, meye o monsotre kwe tuanimetre Gobran Ngöbökwe yebätä, 30 ye ie jondron biain bäri ere nengwane, aune kä* ja känenkäre kite yete ja nire kärekäre”.

31 Ye bitikäre, nikani nitre ja tötikaka kwe Ni Jätäbiti Nibu ngwena kaibe mentokwäre aune niebare kwe ietre: “Nita näin mintukwäre Jerusalén kokwäre, aune kukwe tikani Ni Kä Nebätä Monsoibätä, nitre Ngöbö kukwei niekä yebiti ye jökrä rabai bare. 32 Ñodre, mikadi nitre kä nebätä kisete, jadaikäbätä, ñäkäi kämekäme ie aune käli kitai kwetrebätä. 33 Aune kwata metai kwetre ye bitikäre murie ketai kwetre, akwa köbömäkäre mikaita nire”.* 34 Akwa kukwe ne jökrä ñan nükani gare ietre, ñobätä ñan aune kukwe ye dre gärä nämäne ye ükani bätätre.

35 Jesús nikanina nemen Jericó ngwane, ni brare iti ie kä ñaka tuin nämäne täkäni jibätä aune nämäne jondron kärere. 36 Nitre kwatí nikani ta juruabare ie, yebätä dre nämäne nakainkä namani ngwentari. 37 Nitrekwe niebare ie: “¡Jesús Nazareno tä näin ta!”. 38 Ye juruabare ie ngwane, ngratebare kwe: “¡Jesús, David Mräkä,* ti mike tuin bobre jai!”. 39 Nitre nämäne näin käne namani ñäke ie aune rabadre kwekebe namanintre niere ie. Akwa niara namani ngrente bäri: “¡David Mräkä, ti mike tuin bobre jai!”. 40 Ye ngwane Jesús namani nünaninkä aune ni ye jänrikadre känti ribebare kwe. Ni ye namani Jesús känti ngwane, ngwanintari kwe ie: 41 “¿Tikwe dre nuaindre mä kräke ie mä tönibi?”. Ni yekwe niebare ie: “Däkien, kä rabadreta tuinta tie”. 42 Aisete Jesukwe niebare ie: “Kä rabadre tuinta mäi, tödeka mäkwe käkwe mä mirita räre”. 43 Ye bengwairebe ni yei kä namani tuinta aune nikani jiebiti Ngöbö käikitekä. Ye jutuabare nitre ie ngwane, niaratre jökrä namani Ngöbö käikitekä arato.