Evangelio Lucakwe

2 Kä ye ngwane, César Augusto käkwe censo nuain mananbare ne kwe nitre jökrä* käkwe ja kä tikadre täräbätä. 2 (Quirinio nämäne gobrane Siria ngwane, censo kena ne nuainbare). 3 Aune nitre jökrä nikani ja kä tike täräbätä, juta kwetre ye erere känti. 4 José käkwe nuainbare arato. Aune niara kite David mräkäkri, yebätä dikakabare kwe mintukwäre Galilea nemen Judea, juta Nazaret nemen juta Davidkwe kädekata Belén yete. 5 Nikani ja kä tike täräbätä muko kwe María ben, aune kä namanina braibe María käne ne kwe monso däredre kwe. 6 Nämänentre yete ngwane, monso däredre Mariakwe ye käi nükani. 7 Aune ngobo namani kena kwe. Minianinte* kwe dänkwä krä brai te aune mikani kwe jondron nire bukara* yete. Ñobätä ñan aune cuarto ja dükakäre yete kä ñan namani kräketre.

8 Kä ye arabe käntita nitre oveja ngübaka nämäne nünentubu jutare aune nämänentre oveja jakwe ngübarebiti dibire. 9 Aune bátibe, ángel Jehovakwe* ja mikani tuare ietre, aune käträ Jehovakwe ye niatebare niaratre bäre aune kä jürä namani krubäte bätätre. 10 Akwa angelekwe niebare ietre: “Ñan kä jürä ngwan jabätä ñobätä ñan aune, kukwe nuin, tiki kukwe kwin mike gare munye, abokän käkwe kä mikai juto juta jökräbätä. 11 Ñobätä ñan aune juta Davidkwe yete mun mikaka kwäre däreni matare, abokän Kristo, mun Däkien. 12 Ne käkwe niara driei munye: ngäbäkre därebe täi minianinte dänkwä krä brai te aune täi mikani jondron nire bukara te, yete kwain munye”. 13 Bátibe, ángel yebe ángel mada kwatí krubäte nämäne, abokän nämäne Ngöbö käikitekä aune niere: 14 “Ngöbö kä kwinbiti ye käikitekä aune kä jäme nitre kä tibienbätä ka ngäbitita kwe ye kräke”.

15 Angeletrekwe tuanimetre aune nikaninta kä kwinbiti ngwane, nitre oveja ngübaka ye namanintre niere jai: “Ni rabadre niken Belén, dre nakaka ye mikakäre ñärärä, Jehovakwe kukwe miri gare nie ye ererebätä”. 16 Ye ngwane nikanintre jötrö ngwarbe aune María aune José kwani ietre monso chi ye ben jondron nire bukara yete. 17 Ye jutuabare ietre ngwane, dre niebare monso chi yebätä ietre ye niebare kwetre. 18 Kukwe täinbare nitre oveja ngübakakwe ye nirekwe kukwe nuani ye töi namani ñan krütare. 19 Aune María abokän, jatani kukwe ye üke kwin ja töite aune kukwe ye dre gärä nämäne, yebätä nämäne töbiketari. 20 Ye bitikäre nitre oveja ngübaka ye nikaninta ja jiebiti, aune kukwe niebare ietre ye erere jökrä tuani kwetre aune kukwe nuani kwetre, yebätä nikanintre debe bien Ngöböi aune käikitekä.

21 Köbö kwä ye bitikäre, ngäbäkre tarei kwata tikadrekä ye käi nükani ngwane, kädekani Jesús, meye jämi nemen murore känenkri angelekwe kädeka mananbare ño ye erere.

22 Ne madakäre Lei Moisekwe ye ererebätä niaratrekwe ja mikadre mrebe Ngöbö okwäkänti ye käi nükani ietre ngwane, nikanintre Jesús ngwena mintukwäre Jerusalén mikakäre gare Jehovai, 23 tä tikani Lei Jehovakwebätä erere: “Monsotre mubai* brare ye jökrä kädekai deme Jehová kräke”. 24 Jondron biani kwetre kämikadre, Lei Jehovakwe tä niere erere: “Ütü kubu o ütü ngäbä kubu”.

25 Kä ye ngwane, ni iti ja ngwanka metre aune Ngöbö jürä ngwanka jabätä kä Simeón nämäne Jerusalén, ñongwane Ngöbökwe Israel töi mikai jäme ngüba nämäne kwe aune üai deme nämänebätä. 26 Jämi krüte ye känenkri Kristo Jehovakwe tuai kwe ye Ngöbökwe mikani gare ie üai demebiti. 27 Ye ngwane üai deme käkwe jie ngwani aune nikani templote gwä, José aune María nikani Jesús chi ngwena gwä, kukwe ribe nämäne Leibätä ye erere nuainkäre kräke ngwane, 28 Simeonkwe monso chi diani kisete, Ngöbö käikitaninkä kwe aune niebare kwe: 29 “Däkien kri mäta ni klabore mäkwe tuenmetre krüte töi jäme, mäkwe niebare ye erere, 30 ñobätä ñan aune nirebiti mäkwe nitre mikai kwäre tikwe turi ja okwäbiti, 31 abokän mäkwe juani ne kwe nitre jökrä käkwe tuadre. 32 Niara ye ñotra käträ mikakäre nitre tä kä ikote yebiti aune niarakwe nitre mäkwe Israel ye mikai ütiäte kri”. 33 Dre nie nämäne monsobätä ye namani rün aune meye töi mike ñan krütare. 34 Ne madakäre Simeonkwe kukwe kwin ribebare kräketre aune niebare kwe María monso meye yei: “Ne kukwe nuin, monso chi ne dianinkä ne kwe nitre kwatí Israel rikadre tibien aune nitre kwatí rükadreta krö, Ngöbö täi ben Ngöbökwe bämikai, akwa nitre kwatí käkwe ñäkäi rüere, 35 dreta nitre kwatí brukwäte ye diankakäre kä mrebiti (aune mä abokän brukwäte ta espada* nga kriai)”.

36 Arato yete, meri Ngöbö kukwei niekä kä Ana nämäne, niara Fanuel ngängän, niara kite tribu Aserkwe yekri. Niara ye namanina umbre, ja mäkäninte kwe ye bitikäre nünanbare kwe kä kwä kükü te muko kwe ben, 37 aune ye ngwane muko krütanina aune kä nämäne 84 biti. Käre nämäne templote Ngöbö mike täte dibire rare, orare kisere aune ñan mröre kä ruäre te.* 38 Ye ngwane, niara nikani niaratre kokwäre, nikani debe bien Ngöböi aune nitre nämäne Jerusalén mikai kwäre ngübare ye jökrä ben nikani blite monso chi yebätä.

39 Lei Jehovakwe nämäne kukwe nuainmana ye ererebätä José aune María kukwe nuainbare jökrä ye bitikäre, nikaninta Galilea juta kwetre Nazaret yete. 40 Ngäbäkre brare ye jatani nirien jankunu, dite aune töbätä. Aune käre Ngöbö nämäne kain ngäbiti.

41 Käre kä kwatire kwatire te rün aune meye nämäne niken Jerusalén fiesta Pascua yebätä. 42 Kä nämäne 12 biti ngwane, nikanintre Jerusalén nämänentre niken käre fiesta Pascuabätä ye erere. 43 Fiesta ye köböi krütani ngwane, niaratre nikaninta jakwäre, akwa Jesús* abokän namani Jerusalén, ye rün aune meye käkwe ñan gani. 44 Nitre kwatí nämäne näin ye ngätäite monso chi ye nämäne näin siba nütübare kwetre. Dikakabare köböiti jire kwetre, ye ngwane nikanintre känene mräkätre aune nitre gare ietre ye ngätäite. 45 Akwa ñan kwani ietre, yebätä nikanintre ja jiebiti nementa Jerusalén aune känänbare kwetre kä jökrä känti. 46 Mrä mada, köbö komä bitikäre kwani ietre täkäni templote dirikätre ngätäite. Jesús nämäne kukwe nuin aune kukwe ngwentari ietre. 47 Aune nitre jökrä niara kukwe nuaka ye töi nämäne nemen ñan krütare, kukwe nämäne nüke gare ño ie aune kukwe mika nämäne gare ño kwe yebätä. 48 Jutuabare rün aune meye ie ngwane, töi namanintre ñan krütare aune meyekwe niebare ie: “Chi, ¿ñobätä mäkwe kukwe ne nunie nunbätä? Töbike, ti aune mä rün nunta nikenkä mä känenentari”. 49 Akwa Jesukwe niebare ietre: “¿Ñobätä munta ti känenentari? ¿Ti tädre ti Rün gwirete ye ñan nämä gare munye?”. 50 Akwa dre nie nämäne kwe ye ñan nükani gare ietre.

51 Ye bitikäre niara nikaninta bentre Nazaret, aune nämäne rün aune meye mike täte jankunu. Aune meye nämäne kukwe jökrä ye üke kwin ja brukwäte. 52 Aune Jesús jatani nirien jankunu, nemen bäri töbätä aune Ngöbö bätä nitre nämäne kain ngäbiti.