Evangelio Mateokwe
19 Jesukwe kukwe ne niebare ünä, ye bitikäre kämikaninkä kwe Galilea aune namani kä Judea niken krüte ye kräbätä, Jordán kwäräkri. 2 Nitre kwatí krubäte nikani niara jiebiti aune yete niarakwe nitre bren mikaninta räre.
3 Ye ngwane nitre fariseo ruäre jatani kokwäre aune tö namani nuaite, yebätä ngwanintari kwetre ie: “¿Ni brare raba ja divorciare* muko kwe ben kukwe ngwarbebätä?”. 4 Niarakwe niebare ietre: “¿Kenanbe Ngöbökwe ni nire sribebare brare aune merire yebätä mun ñan ñäkäbare? 5 Niarakwe niebare: ‘Ye medenbätä ni brare käkwe rün aune meye kwe tuainmetre aune rabai keteitibe muko kwe ben, aune nibutre rabai ni itibe kwrere’. 6 Aisete ñan niena nibu, ñakare aune ni itibe kwrere. Ye medenbätä, Ngöbökwe ni mikani keteitibe* ye ni jire iti käkwe diandrekä mento”. 7 Niaratrekwe niebare ie: “Ni merire juankäre mento, ni brare rabadre täräkwata ja divorciakäre bien muko kwe ie, ¿ye ñobätä Moisekwe nuain mananbare?”. 8 Niarakwe niebare ietre: “Mun ja brukwä mike ribi yebätä, Moisekwe mun tuanimetre ja divorciare mun muko yebätä. Akwa kenanbe ñan nämäne ye erere. 9 Ti niere munye, meri ja mäkäninte ñan nemen ni madabe* akwa muko kwe tä ja divorciare ben, biti tä ja mäkete meri madabe, ni ye tä ja mike ngite rababätä meri mada yebe”.*
10 Nitre ja tötikaka käkwe niebare Jesús ie: “Ja mäkäteta ye kore ngwane,* ñan ja mäkädrete ye bäri kwin”. 11 Niarakwe niebare ietre: “Ñan ni jökrä raba kukwe ye mike täte, ñakare aune Ngöböta nitre tuenmetre nuainne ye aibe raba kukwe ye mike täte. 12 Nitre ruäre eunuco* ye därebarera kore, mada abokän nitre kä nebätä käkwe mikani eunuco. Akwa mada abokän käkwe ja mikani eunuco akwle Gobran kä kwinbiti yebätä. Nire raba kukwe ne mike nemen bare ye käkwe nuain”.
13 Ye bitikäre monsotre kia ruäre jäntani ie, ne kwe niarakwe kise mikadrebiti aune oradre kwe kräke. Akwa nitre ja tötikaka käkwe ñäkäbare ie. 14 Akwa Jesukwe niebare: “Monsotre kia tuenmetre nüke tikänti aune ñan ketabätä tibätä, ñobätä ñan aune Gobran kä kwinbiti ye abokän, nitre niaratre ye kwrerekwe”. 15 Ye bitikäre, niarakwe kise mikani niaratrebiti* biti kämikaninkä kwe yete.
16 Ye bitikäre ni brare iti jatani kokwäre käkwe ngwanintari ie: “Dirikä, ¿dre dre kwin ti raba nuainne ne kwe ja nire kärekäre rabadre tikwe?”. 17 Niarakwe niebare ie: “¿Dre kwin ye ñobätä mäta ngwentari tie? Ngöbö aibe abokän kwin. Akwa ja nire rabadre mäkwe ie mä tö ngwane, kukwe biani Ngöbökwe ye käre mä rabadre mike täte”. 18 “¿Meden meden?”, ngwanintari kwe. Jesukwe niebare ie: “Ñan ni murie keta, mun ja mäkäninte ñan raba ni madabe,* mun ñan go, ñan kukwe ngwarbe nie ni madabätä. 19 Mäkwe mä rün aune mä meye mika ütiäte jai* aune mäkwe ni mada tare mäta ja tarere ño ye erere”. 20 Ni brare yekwe niebare ie: “Kukwe jökrä ne käre tita mike täte, ¿dre mada nemen nuaindre tie?”. 21 Jesukwe niebare ie: “Mä tö kukwe jökrä nuain kwin ngwane, jondron tä mäkwe ye mä rika rürübäine aune ngwian ye mäkwe bian ni bobre ie. Ye köböire jondron ütiäte rabai kä kwinbätä mäkwe, biti mä jata aune mäkwe ja mika ja tötikaka tibe”. 22 Ye juruabare ni brare yei ngwane, nikaninta ulire krubäte, ñobätä ñan aune jondron nämäne ere kwe. 23 Ye ngwane, Jesukwe niebare nitre ja tötikaka kwe ie: “Ti niere metre munye, nitre jondron bäkäne ere ye kräke ñan rabai nuäre nänkäre Gobran kä kwinbiti yete. 24 Ti niere munye, camello kräke rabai bäri nuäre nänkäre agu mäkäte ta, ni jondron bäkäne ere krubäte rikadre Gobran Ngöbökwe te ye kräke”.
25 Kukwe ye juruabare nitre ja tötikaka ie ngwane, töi namani ñan krütare aune niebare kwetre: “Aisete, ¿se nire raba nemen kwäre?”. 26 Jesús okwä namani kwekebebätä käkwe niebare ie: “Ni kä nebätä ie ñan raba nemen bare jire, akwa Ngöbö ie kukwe jökrä raba nemen bare”.
27 Ye ngwane Pedrokwe niebare ie: “Akwa, nänbätä mäbe nunkwe jondron jökrä tuanimetre, ¿se dre rabai nunkwe?”. 28 Jesukwe niebare ietre: “Ti niere metre munye, kä jondron ükatekäre jökrä mrä ye käi rükai aune Ni Kä Nebätä Monsoi ye rabai täkäni kürä kri kwe yebiti ngwane, mun nänkä ti jiebiti rabai täkäni kürä krä jätäbiti krobu yebiti aune juta Israel keta jätäbiti ketebu ye kräke munkwe kukwe ükaite. 29 Aune nire käkwe, ja jue, eteba, ngwai, rün, meye, monso o kä jakwe tuainmetre ti kä ngwanbätä,* yekwe jondron rabai 100 biti bäri aune ja nire kärekäre rabai kwe.
30 Akwa ni kwatí tä käne ye rabai mrä köre, aune ni kwatí tä mrä köre ye rabai käne”.