Evangelio Lucakwe
15 Ne madakäre, nitre jökrä impuesto ütiä käräkä aune nitre ja mikaka ngite ye nikani ja ükekrö niara bäre kukwe nuakäre. 2 Nitre fariseo aune nitre escriba namani ñäke: “Ni ne tä nitre ja mikaka ngite kain ngäbiti kwin aune mröre bentre”. 3 Ye ngwane, niarakwe kukwe ne bämikani ietre: 4 “Mun itikwe oveja tädre 100 aune riadrete krati munkän ngwane, ¿mun ñan oveja 99 ye mikadrete kä kiare yebiti, biti mun rikadreta krati ye känenentari nememe kwandreta munye ngwane? 5 Tä kwentari ie ngwane, tä niken ngwena ja kötäbiti kä jutobiti. 6 Tä nementa gwi ngwane, tä ja ketamuko aune nitre nünanka bäre kärere aune tä niere ietre: ‘¡Oveja tikwe nianinte tikän kuninta tie, ye käi ngwen juto jabätä tibe!’. 7 Ti niere munye, ye erere arato, ni itibe ja mikaka ngite tä ja töi kwite ye käi rabai bäri juto kä kwinbätä nitre 99 ja ngwanka metre ie ñaka tä ja töi kwitadre ye kräke.
8 O meri meden kwe dracma* tä kwäjätä aune riadrete kwati kän ngwane, ¿ñan ñotra jutra mikadre kwe, biti rikadre kä sökökä gwita aune känenentari kwin nememe kwandretari ie ngwane? 9 Aune tä kwentari ie ngwane, tä ja ketamuko kwe aune meritre nünanka bäre ye kärere aune niere ietre: ‘¡Dracma nianinte tikän kuninta tie ye käi ngwen juto jabätä tibe!’. 10 Ti niere munye, ye erere arato ni iti ja mikaka ngite tä ja töi kwite ngwane, angeletre Ngöbökwe yebätä käta nemen juto”.
11 Biti niebare kwe: “Ni brare itikwe monso nämäne nibu. 12 Ngobo bäri bati yekwe niebare rün ie: ‘Tata, jondron mäkwe tä biandre tie mäi ye bien tie’. Aisete jondron nämäne kwe ye ñäkäninbiti kwe ngobotre nibu kwe yebiti. 13 Köbö nikani ruäre ta ye bitikäre, bäri bati ye käkwe jondron jakwe jökrä ükaninkrö aune nikani juta mente känti, yete jondron biani rünkwe ie ye jökrä ganinte kwe kukwe käme nuainbätä. 14 Ngwian jakwe ganinte jökrä kwe ye bitikäre, juta yete mrö nika jatani kri, aune niara jatani mrö ribere jai. 15 Aune nikani sribire ni iti nünanka juta yete ben, ni yekwe juani mütü ngübare kä kwe yete juta bäre mento. 16 Aune mütü gota* yebiti tö nämäne mrö gaikä jai, akwa nitre ñan namani buke jire.
17 Kä nükani ruinbiti ngwane, niebare kwe: ‘¡Nitre sribikä ti rünbe kwe mrö tärä ere, ti abokän murie niken mrö miare jakän nete! 18 Ti bike niken aune ti näinta ti rün gwirete. Tikwe niei ie: “Tata, tikwe ja mikani ngite kä kwinta rüere aune mä rüere. 19 Ti mä ngobo niedre ye ñan niena nie bä. Nitre sribikä mäkwe ye kwrere mäkwe ti mika tuin jai”’. 20 Aisete nükani krö aune nikaninta rün gwirete, niara nómene mente ngwane, jutuabare rün kwe ie, namani tuin bobre krubäte ie. Rün nikani betekä ngäbiti, kise kitani kwe ngärä* aune demainbare* kwe. 21 Ye ngwane ngobokwe niebare ie: ‘Tata, tikwe ja mikani ngite kä kwinta rüere aune mä rüere. Ti mä ngobo niedre ye ñan niena nie bä’. 22 Akwa rünkwe ribebare nitre klabore kwe yei: ‘¡Jötrö! Dän nga bäri kwin känene aune ngwä kite. Anillo kite kwati kisebätä aune sandalia kite ngotobätä. 23 Ne madakäre, nibi ngäbä köte ye ngwen, kämike kwetadre aune niara nüta ye ani käi ngwen juto jabätä, 24 ñobätä ñan aune ti ngobo ne nämäne ngwakare aune nüta nire, nämäne nianinte aune kuninta’. Aune nikanintre kä ngwen juto jabätä.
25 Ngobo mubai kwe nämäne tirete. Jataninta nüketa no ju ken ngwane, música aune baile ye ngö juruabare ie. 26 Aisete sribikä iti käräbare kwe aune dre nämäne nakainkä ye ngwanintari kwe ie. 27 Ni yekwe niebare ie: ‘Mä eteba nüta, aune mä rünkwe nibi ngäbä köte kämiri, ñobätä ñan aune ngobo nüta kwin känti’. 28 Akwa ngobo mubai ye namani rubun aune ñan nikani gwä. Aisete rün nikani känti aune rikadre gwä ye rün nikani ribere kisere ie. 29 Niarakwe niebare rün kwe ie: ‘Mike ñärärä, kä jökrä nete tikwe sribibarera ni klabore erere mä kräke aune käre tita mä kukwei mike täte, akwa mä ñan cabra ngäbä bien jire krati tie kä ngwankäre juto jabätä ja ketamukotre tikwe ben. 30 Akwa, mä ngobo käkwe ngwian mäkwe kitaninkä jökrä meri ja rürübäinkä ngwianbätä ben abokän nüta kräke mäkwe nibi ngäbä köte kämiri’. 31 Ye ngwane niebare kwe ie: ‘Monso tikwe, käre mäta tibe aune jondron jökrä tikwe ye mäkwe. 32 Akwa nüta ye jerekäbe käi ngwandre juto jabätä, ñobätä ñan aune mä eteba nämäne ngwakare nüta nire. Nämäne nianinte akwa kuninta’”.