Kukwe ja tötikara 14
Nitre testiko Jehovakwe ye tä ükaninte ño
¿Ñongwane nitre testiko Jehovakwe jataninta ja üketeta kukwe kwetre nuainkäre kä bitin nikanina ta yete? (1)
¿Nitre testiko Jehovakwe tä gätäre ye tä nemen bare ño? (2)
¿Ngwian kitakata konkrekasionte ye ütiä bianta ño? (3)
¿Nireta ji ngwen käne konkrekasion kwatire kwatire yete? (4)
¿Gätä meden bäri kri nuainta kä kwatire kwatire te? (5)
¿Sribi meden nuainta obisina bäri kri yete bätä obisina kiakia juta kwatire kwatire yete? (6)
1. Kä 1870, käi nikanina ta ye angwane nitre testiko Jehovakwe jataninta ja ükete kukwe kwetre nuainkäre. Kena kädeka nämene ni ja Tötikaka Bibliabätä. Akwa kä 1931 ye ngwane ja kädekani kwetre testiko Jehovakwe tä tikani Bibliabätä ye erere. (Isaías 43:10.) Kena nitre testiko Jehovakwe nämene braibe, akwa kä nüke nengwane juta Ngöbökwe yete ni nibira nirien kwati krubäte; ne abokän kätä kukwe driere kä 230 känti.
2. Konkrekasion jökrä bäsi känti nitre testiko Jehovakwe tä ja ükökrö bämä, bämän kratire kratire te. Mä nübaita gätä nebätä. (Hebreos 10:24, 25.) Kukweta Biblia yebätä erere drieta. Gätä ne kömikata bätä mikata krüte orasionbiti, bätä gätä ne jökrä bäsi känti “kantata bökän Ngöböi”. (Efesios 5:18, 19.) Gätä nebätä ni jökrä raba niken ngwian kärä ñaka. (Mateo 10:8.)
3. Konkrekasion jökrä bäsi kätä gätä ye nuainne Ju ja Ükarakrö ye känti. Kä jökrä känti, Ju ja Ükarakrö ye ñan sribebare ju mada bätäkä ngwarbe ye kwrere. Ju ne abokän sribeta nitre Testiko käkwe ja töi kwin jeñebiti. Ju yete jondron bä üai ngwarbe bätä kruso jutuai ñakare mäi. Ngwian bianta ja töi kwin jeñebiti nikwe yebiti ngwian kitakata konkrekasionte ye ütiä bianta. Nire töraba ngwian biain ja töi jeñebiti angwane ni raba ngwian ye kite ngwian ngwä yete. (2 Corintios 9:7, Kukwe Kuin Ngöbökwe.)
4. Konkrekasion kwatire kwatire te nitre umbre tärä ji ngwanka käne kukwe driekä. (1 Timoteo 3:1-7; 5:17, Kukwe Kuin Ngöbökwe.) Nitre umbre ye dimikata nitre kädekani sribikä konkrekasionte yekwe. (1 Timoteo 3:8-10, 12, 13.) Ni ñakare iti jire chi bäri ütiäte ni mräkätre konkrekasionte ye bitita. (2 Corintios 1:24.) Ni kädeka ñaka bäri kri. (Mateo 23:8-10.) Ñaka ja ngwäkite jene mräkätre yebätä. Sribi nuainta kwetre ye ütiä bian ñaka ietre. Nitre umbre yebätä kätä nemen juto nitre konkrekasionte ye dimike kukwe ja üaire yebiti. Kukwe tare tä nakainkä nibätä ye angwane tä ni töi miketa jäme aune tä ni tötike. (Santiago 5:14-16; 1 Pedro 5:2, 3.)
5. Nitre testiko Jehovakwe tä gätä kri nuainne kä kwatire kwatire te arato. Gätä kri ye näire konkrekasion kwati tä ja ükökrö kukwe ütiäte Bibliabätä kädrieta ye kukwei nuakäre. Gätä kri nete käre nitre mrä ja kitaka kukwebätä ye kätä ja ngökö ñöte. (Mateo 3:13-17; 28:19, 20, Kukwe Kuin Ngöbökwe.)
6. Obisina bäri kri sribikrä nitre testiko Jehovakwe ie ye tä ükaninte kä kädekata Nueva York känti. Ne känti abokän Nitre umbre Braibe, töbätä krubäte tätre ji ngwen käne konkrekasion kä jökräbiti tibien ye ngübabitikä. Ne madakäre, kä jökräbiti tibien obisina kiakia tä ükaninte siento krati ye biti näre. Kä yekänti nitre sribikä ja töi kwin jeñebiti ye kätä tärä kwati sribere biti juen mentokwäre; tärä yebätä kukwe Bibliabätä ye kädrieta. Kä yekänti arato kukwe drieta käbiti tibien ye köböi kitata. ¿Ñobätä mä ñan kä denkä jai obisina bäri no mä ken ye mikakäre gare jai?