Kukwe ja tötikara 18
¡Nikwe ja mikadre ja ketamuko Ngöbökwe kärekäre!
Ja ketadre biti ngübadre käre yekäre nikwe ja di ngwandre. Nikwe ja di ngwain ja ketakäre Ngöböbe bätä nikwe ja mäkädre käre ben ye ngübadre köböire jondron kwin krubäte rabai nikwe. Nitre kä nämene Jesús kukwei mike metre jai ye ie niarakwe niebare: “Kukwe era yebti mun rabadi tikaninte” (Juan 8:32, Kukwe Kuin Ngöbökwe). ¿Dre gäräbare kwe?
Ni raba nüne kwäre kä nengware. Kukwe ngwarbe drieta yebätä ni raba nemen kwäre, bätä kukwe ngwarbe nieta käbiti tibien Satanakwe yebätä ni raba nemen kwäre arato. Ni kwati krubäte ie Jehová ye ñaka nüke gare yebätä tödekakwe kwin ñakare ietre. Ni töita ne erere angwane ni mika raba nemen kwäre arato (Romanos 8:22). Nitre ja ketamuko Ngöbökwe ye ñaka ja mike jire chi klabore “gata jürä” yei (Hebreos 2:14, 15, Kukwe Kuin Ngöbökwe).
Ni rabai nüne kwäre kä mrä Ngöbökwe yete. ¡Ni rabai kwäre kä ja känenkäre yete ye abokän kwin krübäte! Kä tibien ye sribei bä nuäre angwane, rü ñaka rabaira, bren bätä kukwe blo ñaka rabaira. Ni ñaka rabaira bobre bätä mrönika ñaka rabaira. Ni mikai kwäre ni nemen umbre bätä gata yebätä, kä jürä yebätä arato, nitre ni mikaka ja tarenike bätä ni töi käme yebätä ni rabai kwäre arato. Biblia kätä niere Ngöbö yebätä: “Mätä mä kise ngiente bätä jondron jökrä nire tö dre dre ie ye erere mätä bien täte ie” (Salmo 145:16).
Nitre ja ketamuko Ngöbökwe käkwe nünandi kärekäre. Ja nire käre ye jondron ütiäte krubäte abokän Ngöbökwe biain nitre kätä niara känene ja ketakäre ben yei (Romanos 6:23). Mä raba töbike ken dre dre kwin raba nemen mäkwe nünandre kärekäre yebätä.
Kä rabai jondron krubäte nuainkäre nie. Ni ruäre tö rabai ja kitabätä jondron ngö mike kukwe nuara jai, jondron sribere jükadre o sribi bätäkä ngwarbe nuainne kri yebiti. Ruäre abokän ni tö rabai ja tötikai jondron nire känsenta yebätä o kri mu bätäkä yebätä. O ruäre ni tö rabai näin basare bätä kä mada mike gare jai bätä nitre kä ye gänti mike gare jai arato. Ja nire kärekäre rabai nikwe, ye medenbätä ni rabai jondron jökrä ne nuainne.
Kä rabai ja ketakäre ni kwati ben nie. Nikwe nünandi kärekäre yebätä nitre mada kwati ja ketamuko Ngöbökwe rabai nüke gare nie. Dre dre nuain gare ietre ye rabai gare nie, bätä töi kwin ye rabai gare nie, aune arato ni rabai ja ketamuko kwe. Nikwe niaratre taredi, bätä niaratre käkwe ni taredi (1 Corintios 13:8). Ja nire tädi kärekäre nikwe yebätä, ni rabadi ja mäke nitre jökrä nünanka Käbiti tibien yebe. Akwa bäri kwin, kä jatai niken ta yete nita ja mäke Jehovabe ye abokän jatadi nirien bäri dite mada. ¡Nikwe ja mikadre ja ketamuko Ngöbökwe kärekäre!