Ngöbökwe ni brare aune meri kena sribebare

Kä kädeka nämene Edén yekänti Jehovakwe jardín sribebare. Jardín yekänti jondron bätäkä ngwarbe nämene, kriblü, kri aune jondron nire. Ye bitikäre, Ngöbökwe ni brare kena Adán sribebare. Niarakwe ni ye sribebare dobrobiti aune biti murie täkäni insonte kwe. Angwane, ¿dre namani bare mada gare mäi? ¡Ni brare ye namani murie jäke! Jehová niebare Adán ie rabadre jardín ye ngübare aune jondron nire ye jökrä kädeke.

Jehová kukwe ütiäte krubäte ribebare Adán ie. Niebare kwe ie: ‘Mä törba kri ngokwä meden kwetai ye mä raba kwete, akwa kri dati aibe mä ñaka raba ngokwä kwete. Mäkwe kri ye ngokwä kwetai angwane, mä krütai’.

Ja känenkäre, Jehovakwe niebare: ‘Ti bike meri dätere Adán die mikakäre’. Aisete, Adán mikani kübien nguseta kwe aune krona dianinkä krati kwe yebiti meri sribebare kwe Adán mukore. Meri ye kädekani Eva. Adán aune Eva mikani gure kena. Adán ie muko jutuabare angwane, ¿ja namani ruin ño ie? Kä namani juto krubätebätä, käkwe niebare: ‘¡Mike ñärärä Jehovakwe dre sribebare ti krona yebiti! ¡Ni mada ti kwrere!’.

Jehová niebare Adán aune Eva ie niaratre rabadre monso ngübare kwati krubäte aune rabadre nüne kä jökräbiti tibien. Arato niaratre rabadre sribire gwairebe kä jutobiti kä tibien kwitakäre bä nuäre. Kä jökrä rabadre kwitani bä nuäre krubäte jardín Eden ye erere. Akwa ye erere ñaka namani bare. ¿Ñobätä? Kapitulo ja känenkäre yebätä rabai gare nie.