Nitre Braibe Konkrekasion Jökrä Ngübabitikä tärä tikani 2017

Ja mräkätre aune ja ngwaitre tare nunkwe:

Kä nikanina bäsi 2,600 ta yete, ni Ngöbö kukwei niekä Ezequiel ie jondron mikani tuare ye niara töi mikani ñan krütare: karo kri abokän Ngöbö Gobranka kri kä jökräbiti nämene jie ngwen. Karo ja üaire ye nämene nen ño ye käkwe niara töi mikani bäri ñan krütare. Mräträ tä trä ngitiekä ye kwrere karo ye namani niken mentokwäre, ye tä mike gare ni karo ye ngwanka kräke namani nuäre ngwandre (Ezeq. 1:4, 9, 12, 14, 16-27).

¿Jondron mikani tuare ye tä dre ngwenta törö nie? Ye tä mike gare juta ükaninte Jehovakwe kä kwinbiti ye ñaka nünenkä. Aune Jehovakwe juta ükaninte kä tibienbätä, ¿yebätä ni raba dre niere? Kä nikani ta yete sribi Ngöbökwe nuainbare ye kätä mike gare Jehovata juta kwe Kä tibien nebätä jie ngwen sribi keta kabre nuainkäre.

Kä Estados Unidos yekänti nitre sribikä Betelte kwati krubäte kisete sribi kri tä, niaratre tä ja ükete Brooklyn yekänti nänkäre central mundial ükaninte mrä Warwick (Nueva York) yete, o ju mada känti. Ruäre juani sribi mada nuainne Betel ye bäre mento. Juta mada känti ja mräkätre Betelte käkwe sribibare ja dibiti ju sribebätä, ju ükatekäre, aune sukursal ruäre mikani keteitibe, o ruäre juani kä madakänti. Mun ruäre ñaka ja kwitabare ju madate, akwa gare metre nunye munta sribi mada nuainne arato.

Nitre Braibe Konkrekasion Jökrä Ngübabitikä yebätä mun käita juto aune ja mräkätre Kä jökräbiti tibien tätre sribire krubäte nänkäre gwairebe juta ükaninte Jehovakwe yebe ye tä mate kwin bätätre. Nitre ribeta kukwe driekäre yekänti mun kwati krubäte ja töi mikani niken yete ye gare kwin nunye. Mun ruäre ja töi mikani ja kite blite kukwe madabiti kukwe driekäre o mun ja töi mikani kukwe driedre ño bäri kwin yebätä. Mun ruäre käkwe kukwe ükaninte jai kukwe driekäre bäri. Ne madakäre, nitre Ngöbö mikaka täte metre, niena umbre o tätre bren, akwa täbe kä ngwen nüke jai niakäre ja nire ye ganainkäre, tätre käre ja di ngwen sribi Jehovakwe ye nuainne aune töita kwatibe bämikabätä Satana ye ni ngökaka (1 Cor. 9:24).

Mun jökrä tä ja di ngwen sribikäre Jehová kräke ye niara tä mike ñärärä ye munkwe ngwan törö jai (Heb. 6:10). Munta ja ngwen Abrahán aune Sara erere. Kä nämene bäsi 70 Abrahanbiti ye ngwane, niara nämene juto biare juta Ur ye tuanmetrekäre aune nikani Canaán kä mente yekänti. Yete nünanbare kwe jondron nire kwata sribebare yete kä 100 te nememe niara krütani ye ngwane. ¡Niara aune muko kwe ja töi mikani kwin krubäte! (Gén. 11:31; Hech. 7:2, 3).

Ye erere nita ja töi mike o ñakare ye nikwe ngwandretari jai. Erametre, ni jökrä tä ja ngwen metre kä krüte nengwane ye tä Jesús kukwe niebare ye erere mike täte. Niarakwe kukwe ne biani nuaindre nie: “Mun nän, amne nitre nünanka kä jökräbti temen, ye känti mun näin ti mike gare ietre amne munkwe niaratre mika ja töitikaka siba tibe amne munkwe niaratre ngöka ñöte ni Rün käbti, Ngöbö Odei käbti amne Ngöbö Üai Deme käbti” (Mat. 28:19).

Jesús niebare “mun nän” yebiti mikani gare kwe ni tädre juto biare. ¡Aune ni nänkä Jesús jiebiti käkwe sribi keta kabre krubäte nuainbare kä känente ye käi ta juto krubäte nibätä! Jehová köböire kukwe kwin Gobran Ngöbökwe yebätä drieta kä jökräbiti tibien aune sribi nuainta ye niara kise dite ye tä jie ngwen (Mar. 13:10).

Kukwe kwin drieta ye nitre kwati krubäte tä kain ngäbiti. Kä käne yete nitre kukwe driekä namani 8,340,847 aune nikwe nitre 10,115,264 tötikani Bibliabätä sö kratire kratire. Erametre karo ja üaire ñaka nünenkä, ¡aune mun arato ñaka tä nünenkä! Aisete, munkwe sribi nuain jankunu kore, kä nebera braibe Jehovakwe jukwe dikadre nitre diandretari käi rikadre ta ye känenkri.

¡Kukwe ütiäte krubäte ngwanta törö nie texto kä 2017 nete! Tä niere krörö: “Mäkwe tö ngwan Jehovai aune mäkwe kukwe kwin nuain” (Sal. 37:3). Nita kukwe ne mike täte aune nita sribire kwin Jehová kräke yebiti nita bämike nita tö ngwen ie. Ni ñaka tä kaibe ye käre nikwe ngwandre törö jai. Jesukwe käbämikani: “Ti abko tädi kärekäre munbe köbö kwatirekwatire nebebe kä mrä” (Mat. 28:20). ¿Akräke ñaka kukwe ye mikai nemen bare kwe?

Nikwe ngwandre törö jai: Nita sribire kwin Jehová kräke yebätä niara tä kukwe kwin mike nemen bare ni kräke. Nita sribire krubäte o chi ye ñan ai bäri ütiäte kräke, ñakare aune nita sribi nuainne ja brukwä tätebiti aune nuainne kwin ye nemen bäri ütiäte kräke. Nita ye nuainne angwane, nita kä mike juto niara brukwäbätä aune tä ni kain ngäbiti kä jutobiti (2 Cor. 9:6, 7). Ye medenbätä, nikwe käre oradre ni Rün tare nikwe yei, ja tötikadre Kukwe yebätä aune nikwe kukwe driedre kä jutobiti. Ye köböire, mantre jetebe nikwe ja ketai bäri kwin ben.

“Kä kitera neme braibe” Satana käne ye gare ie aune nikwe ñaka ja ngwandre metre Jehovai yei niara tö (Apocalipsis. 12:12). Kä täi ye ngwane ni rüe käme ye törbai kukwe keta kabrebiti ni diainkä ji metre yebiti. Akwa käre ni täi käre Jehová ken angwane Diablu töita ño ye ñaka rabai bare ie (Sal. 16:8). Mun tare krubäte nunkwe ye munkwe ñaka käi kwitaka jabiti aune jondron jökrä munta nuainne nun dimikakäre sribi Gobran Ngöbökwe ye ngübakäre kä krüte nete, yebätä nunta debe bien krubäte munye.

Ja mräkätre,

Nitre Braibe Konkrekasion Jökrä Testiko Jehovakwe Ngübabitikä