Niara tä jondron jökrä bien nie

Ja tare nikata ye ngwane, ¿Ngöbö töita nibätä, o töi ñaka nibätä? Kukwe ngwantarita ne Biblia tä mike gare ye raba ni dimike krubäte. Ngöbö töita metre nibätä aune nikwe nünandre kä jutobiti yei tö. Mantre jetebe tä kukwe kwin nuainne ni jökrä kräke, nitre ñaka debe bien jire ie ye kräke tä kukwe kwin nuainne arato. Pablo kukwe niebare yebätä töbike. (Mäkwe ñäkä Hechos 14:16, 17.)

Nitre nünanka juta Listra yekänti ñaka nämene Ngöbö mike täte yei Pablo niebare: “Kira abti kä nüke mtare, ni jökrä tö namani dre nuein, erere Ngöbökwe tuanimetre nuene jökrä. Akwa Ngöbö abko moto kuin, aisete käre jändrän kuin nuenbare kwe ja mikakrä gare munye abko krörö: Ngöbö ara käta ñü mike näkäen temen munkrä amne, nura jökrä abko Ngöböta ngwä mike neme kuin munkrä. Ye kwrere Ngöbö ara käta mrö bien kabre kwetadre munye, kä tädre nuäre munbtä abkokäre”. ¿Nitre yei kukwe ne nükani gare ño?

Pablo kukwe niebare ye metre o ñakare mikakäre gare jai nitre nünanka Listra ñaka rabadre niken mente, ñobätä ñan aune niaratre nämene nüne nura ngwä nemen kwin krubäte käite. Ngöbö abokän ñü aune nura ngwä Bianka ere ye Pablokwe ngwani törö ietre. Yebätä, batire batire nura ngwä nämene nemen ere krubäte o nämenentre mrö bänänte kwete ye ngwane, Ngöbö nämene kukwe kwin nuainne kräketre.

Bersikulo ne tä kukwe keta kabre ütiäte krubäte mike gare Jehovabätä nie.

Ni tö dre diain nuaindre jai ye erere Jehovakwe ni tuanimetre nuainne. Nitre kä jökräbiti tö namani dre nuain erere “tuanimetre nuene jökrä” kwe. Tärä kukwe mikakäre gare jai nitre Biblia kwitaka kräke tä kukwe ye mike gare krörö “dre nuain törbadre erere nuaindre” o “ji meden kwin ni kräke ye erere diandre akwle jai”. Jehová ñaka ni mike jire ja mike täte ja dibiti; ñakare aune ni tö dre nuaindi ye erere tä ni tuenmetre nuainne (Deuteronomio 30:19).

Nikwe Jehová mikadre gare jai ie tö. Pablo mikani gare: “Käre jändrän kuin nuenbare kwe ja mikakrä gare”. Tärä kädrite yebätä kukwe nieta ne kwita raba krörö “niara abokän Ngöbö töi ño ye käre mikani gare kwe nitre ie”. Jondron sribebare kwe ye tä “kukwe tiebe tua ñakare” niarabätä mike gare, ñodre, tä kukwe nuainne ni kräke, töbätä, dite aune ni tarekä (Romanos 1:20). Aune Ngöbö töita ño ye tä mike gare bäri Bibliabätä (2 Timoteo 3:16, 17). Kukwe ye tä mike gare nikwe niara mikadre gare jai ie tö, ¿ñan ererea?

Kä tädre juto nibätä ie Jehová tö. Ngöbö “käta mrö bien kabre kwetadre [nie], kä tädre nuäre [nibätä] abkokäre” niebare Pablokwe. Ni ja mikaka ngite ñaka debe bien Ngöböi abokän törbadre dre dre kwetai erere raba kwete jökrä aune raba nüne kä jutobiti ruäre ngwane arato. Akwa, ño ni raba nüne metre kä jutobiti ye rabadre gare nie yei Ngöbö tö, aune kukwe metre mikadre gare jai niarabätä aune mikadre täte ye aibe köböire nüna raba ye erere (Salmo 144:15; Mateo 5:3).

Mantre jetebe Ngöbö tä kukwe kwin nuainne ni jökrä kräke. ¿Ngöbö tä mrö bien mäi aune tä kä mike juto mäbätä yei mäkwe debe biandre ño ye mä törba mikai gare jai?