Kukwe driedre kwin Biblia yebiti
1. ¿Ñobätä Biblia ye ütiäte krubäte?
1 Kukwe driedre kwin Biblia yebiti angwane kukwe ngwarbe drieta Ngöbötä bätä nitre kä nebätä käkwe kukwe ngwarbe ükaninte mikakäre täte ye ni raba mike gare kwin metre (2 Tim. 2:15; 1 Ped. 3:15).
2. ¿Dre käkwe ni dimikai texto känene jötrö ngwarbe?
2 Mikadre gare bäri kwin jai. Nitre sribire käre maquinabiti ye ie maquina gare kwin, ye erere Biblia yebiti kukwe driedre käre aune mä raba kukwe mike gare kwin. Mäkwe ñäkädre jökräbätä aune kukwe nieta Bibliabätä ye rükai gare mäi, arato ye käkwe mä dimikai texto ye ngwenta törö jai bätä känene jötrö ngwarbe. Mäkwe ja tötikai jankunu Kukwe Ngöbökwe yebätä, angwane kä jürä ñaka rabai mäbätä blitakäre (1 Tes. 1:5).
3, 4. a) ¿Ni raba dre nuainne Biblia ye mikakäre gare bäri jai? b) ¿Mätä dre nuainne kukwe Bibliabätä ye mikakäre gare bäri jai?
3 Gätä konkrekasionte nuainta ye ngwane mäkwe ja töimika texto jökrä känene Bibliabätä aune ñäkebätä. Mä tädre ja tötike Bibliabätä aune gätäkrä ye ngwane mä rabadre texto jökrä känene bätä texto kätä dre mike gare mäi kukwe kädrieta yebätä, ye mäkwe ngwandretari jai. Nitre kätä ñäke komputadora yebiti Bibliabätä akwa nitre kwati ie nüke gare ñäkädre metrere Bibliabätä ye kätä dimike texto känene jötrö ngwarbe kukwe driekäre (Juan 14:26).
4 Nitre ja mräkäre ruäre tä kädenkä jai texto mikakäre nüke gare jai ja töibiti. ¿Tätre nuainne ño? Tätre texto tike täräkwatabätä aune täräkwata ye kwäräkri kukwe nieta texto yebätä ye tätre tike. Biti itire itire kätä texto aune dre nieta texto yebätä ye niereta jatäri ne kwe rükadreta törö ietre. Arato nitre ñaka tö ni kukwe nuai o nitre tä kukwe ngwentari nie ye ngwane, ni raba Biblia yebiti kukwe mike gare ño ietre ye ni raba ja kite bämike kukwe driekäre ietre.
5. ¿Ñobätä ni tö kukwe driei kwin Biblia yebiti?
5 Biblia ye bäri ütiäte tärä mada yekrä, ñobätä ñan angwane Biblia ye aibe raba “ni mike töbtä” (2 Tim. 3:15 KKN). Akwa nitre kwati ie nita kukwe driere, kukwe ütiäte kädrieta Bibliabätä ye ñaka gare ietre; ye medenbätä nikwe ja tötikadre kwin ne kwe kukwe ütiäte kädrieta Bibliabätä ye mikakäre gare ietre (Pro. 2:1-5).