Sribi Ngöbökwe kä Centroamérica yekänti
1. ¿Carro kri ye ketata drebätä aune Jehovata mike näin ño?
1 Ezequiel capítulo 1 yekänti carro kri te Jehová bämikata. Llanta kobokä tä carro yebätä ye tä näin ja töbiti, ñobätä ñan aune üai deme tä carro ye mike näin aune ye köböire raba ja kwite jötrö ngwarbe. Juta Jehovakwe kä kwinbiti ye ketata carro yebätä, Ngöbö tä carro ye mike näin, ne kwe niara töita dre nuainbätä ye erere rabadre bare (Eze. 1:4–28).
2, 3. ¿Kukwe meden ükateta kä nengwane abokän nita tuin? ¿Kukwe meden tä mike gare juta Jehová tä keteitebe?
2 Kukwe ükateta ni näire. Kukwe keta kabre ükaninante kä nikani bitinkä ta yete, ye kätä mike gare carro Jehovakwe ye tä näin jankunu. Ñodre, gätä konkrekasionte ye kräke kukwe ükaninte mrä, juta ruäre te tärä sribe nämene ye ñaka nuainta mada, aune computadora yebiti sribita bäri. ¡Kukwe ne nita tuin kä nengwane ye tä kä mike juto krubäte nibätä!
3 Ni Ngöbö kukwei niekä Amós käkwe niebare kä rükai angwane ‘nitre kä jökräbiti tibien’ nünain keteitebe aune nitre ye kädekai Ngöbö kä yebiti (Amós 9:11, 12; Hech. 15:15-17). Niaratre ye tä gare Jehovai, yebätä tätre keteitibe. Kukwe ye bämikakäre niaratre ñaka ja rüere kwärikwäri bätä ja ñaka ruin bäri ütiäte ietre.
4, 5. ¿Nitre Braibe konkrekasion jökrä Ngübabitikä käkwe kukwe meden ükaninte aune ñokäre nuainbare kwetre?
4 Nitre Braibe konkrekasion jökrä Ngübabitikä käkwe kukwe ükaninte sukursal ruäre kräke. Kä Centroamérica yekänti sukursal Costa Rica, El Salvador, Guatemala, Honduras, Nicaragua bätä Panamá, Sribi Ngöbökwe nuain nämene yete ye mikani sukursal México ye kisete, ño namani bare sukursal Belice yete ye kwrere. Ye medenbätä, sukursal tä juta keta ti yekänti, sribi nuain ñaka niena. Ye köböire sribi Ngöbökwe ye ngübabiti raba kä keteitebe känti.
5 Kukwe ye ükaninte ne kwe sribi Ngöbökwe nuaindre bäri nuäre kä ye jökrä känti. “Nitre tä näin Jehová kokwäre aune tö niara käikitaikä juta kwe yebe”, ye dimikai jankunu kukwe ja üaire yebiti (Organizados, pág. 4; Sal. 145:21; Rev. 22:17). Ne madakäre, sribi Ngöbökwe tä nirien bäri, ye medenbätä kukwe ükateta nuainkäre bari kwin. Ye köböire sribi ye nuainta keteitebe.
6. ¿Sö nikani ta yete kukwe meden nuainta kä Centroamérica yekänti?
6 Ye medenbätä, julio nemen octubre 2010, sukursal kwatire kwatire Centroamérica yekänti dika jatani. Ja mräkätre nämene sribire sukursal kwatire kwatire yete, ruäre juani sukursal México aune ruäre juani kukwe driere Sribi Ngöbökwe nuinkäre bäri.
7. ¿Ñobätä nikwe tö ngwandre nitre Braibe konkrekasion jökrä Ngübabitikä tä kukwe ükete yei?
7 Jehovata ni jie ngwen ye erere nuaindre. Orasion nuainbare krubäte aune kukwe mada känänbare kukwe ye ükatekäre kwin. Bati, Milton G. Henschel –niarakwe sribibare kä kwati te nitre Braibe konkrekasion jökrä Ngübabitikä yebe- käkwe kukwe ne ngwantaribare: “¿Juta mada tärä kä tibien nebätä abokän tä ja jie ngwen Kukwe Ngöbökwe yebiti kukwe ütiäte ükatekäre?”. Ñakare (“Testimonio cabal”, página 111-113 párrafo 10 mikadre ñärärä). Erametre, nita tö ngwen üai deme Jehovakwe yebiti kukwe jökrä ne ükateta.
8. ¿Ni itire itire Jehová mikaka täte raba näin ño gwairebe carro kwe yebe?
8 Nitre Braibe konkrekasion jökrä Ngübabitikä käkwe kukwe ükaninte kwin, ye nitre ji ngwanka käne sukursal kwatire kwatire te juta Centroamérica yekänti käkwe mikani täte, ye erere nitre ji ngwanka käne nämene tö ngwen nitre, misionero, ni ni tuabitikä, prekursor, nitre umbre, nitre sribikä konkrekasionte, bätä nitre kukwe driekä käkwe nuaindre arato. Erametre, “nitre [...] [ni] jie ngwianka” ye kukwei mikadre täte angwane ye köböire ni raba näin gwairebe carro Jehovakwe yebe aune niarakwe kukwe kwin mikai nemen bare krubäte nikräke (Heb. 13:17, Kukwe Kuin Ngöbökwe [KKN]).
9. ¿Nikwe dre nuaindre ja mräkätre tä nüne juta kwatire kwatire yete ye mikakäre gare jai?
9 Sribi Ngöbökwe ririabare ño juta kwatire kwatire yete ye mikata gare mapa tä página 8 nemen 10 yebätä. ¿Mätä kä medenkänti ye mäkwe turira yete? Juta kwatire kwatire yete nitre nüne ño, juta yete kä ngire o tibo, bätä sribi Ngöbökwe ye jatani nirien ño yete ye mä raba känene Anuario de los testigos de Jehová yebätä. Ja tötikadre ni Mräkätre yebe, ye ngwane kukwe ye känä raba. Juta kwatire kwatire yete nita sribi Ngöbökwe nuainne gwairebe ja mräkätrebe ye rabai gare nie (Efe. 6:21; Fili. 1:12).
10. ¿Kukwe meden kwin tä nemen bare abokän nita tuin aune kukwe ye köböire dre rabai bare?
10 Siklo kena, nitre braibe sribi Ngöbökwe ngübabitikä nämene kukwe ükete angwane kukwe kwin nämene nemen bare juta Jehovakwe ye kräke (Hechos 16:4, 5). Kä nengwane kukwe ye erere tä nemen bare. Ñodre, ni ni tuabitikä iti tä sribire Costa Rica käkwe niebare kore: “Munta sribi nuainne üai deme Jehovakwe ye köböire, yebätä ti tönibi debe biain munye. Sribi Ngöbökwe nuainta nuäi ye juankäre, kukwe ngwantarikäre, blitakäre nitre sukursal o nitre konkrekasionte yebe, sribi ye nuainta bäri jötrö aune nuäre nuaindre. Nitre tä jondron sribere yebiti nita sribire arato. Juta Jehovakwe tä ti dimike ye kätä kä mike juto tibätä. Erametre, Jehovata kukwe ne jökrä nuainne” (Isa. 60:16). Ja mräkä mada käkwe niebare: “Kukwe ükateta ne jökrä nita tuin ye tä kä mike juto nibätä. Sribi nuainta computadora yebiti, yebätä tita kwin niere munye. Raba ruin tie munta nete nunbe. Ja ñaka ruin mente nunye, ñakare aune ja ruin bäri juta Jehovakwe ye ken nunye”.
11. ¿Nita Jehová mike täte angwane ye raba ni dimike ño sribire keteitebe?
11 Nita keteitebe ye mikadre tuin ütiäte jai. Jesukristo “-tä ji dokwäre konkrekasionte-” ie nikwe ja tuanemetre jie ngwandre angwane kä medenkänti sukursal tädi akwa nikwe ja töimikai “töbik[...]e ja kwrere jökrä amne ja rabadre ruen ja kwrere jökrä” sribi nuainkäre gwairebe (Efe. 5:23; 1 Cor. 1:10, KKN). Carro Jehovakwe ye käkwe ja kwitai jötrö ngwarbe bobukäreta aune Sribi Kwe ye ririai bäri ye jökrä nikwe tuai. Ye medenbätä, nitre ‘sribikä täte metre’ tä kukwe ükete yei nikwe tö ngwandre, aune ni rabadre tödeka nikwe ye mike nirien bäri jankunu bätä ja töimike kwatibe Ngöbö metre Jehová ye aibe mike täte keteitebe (Mat. 24:45-47).