¿Mä raba kukwe driere bämänte?
1. ¿Juta Filipos yekänti Pablo bätä nitre nänkä ben käkwe kukwe nuainbare ye tä dre driere nie?
1 Köbö sabado yete nitre judío nünanka Filipos nämene ja düke, aune köbö ye ngwane Pablo bätä nitre nänkä ben nämene misionero erere kukwe driere juta yete. Niaratre käkwe köbö ye diandrekä jai ja dükakäre angwane ni mada ñan käkwe ñäkädre ietre. Nitre judío nämene ja ükökrö köbö yete orasion nuainkäre ye nämene gare ietre, yebätä nikanintre kukwe driere nitre yei; aune ye köböire Lidia bätä mräkätre kwe ja ngökani ñöte. ¡Nitre kukwe driekä yebätä kä namani juto krubäte! (Hech. 16:13-15). Kä nengwane, ni kwati tä köbö dominko ye denkä jai ja dükakäre. Ye medenbätä, köbö ye diandrekä jai kukwe driekäre ye bäri kwin ¿ñan ererea?
2. ¿Kukwe meden ben juta Jehovakwe ja tuani kukwe driekäre bämänte?
2 Ja di ngwani kukwe driere bämänte. Kä 1927 ye ngwane juta Jehovakwe käkwe ja töi mikani kukwe driere bämänte. Ye medenbätä, gobran käkwe ja mikani niaratre rüere. Kä Estados Unidos yekänti kukwe ükaninte ja dükakäre köbö dominko yete, aune ja mräkätre ñaka nämene mike täte, nämene nitre nike bätä licencia ñaka nämene kwetre aune nämene jondron rürübäine, gobran namani nütüre, yebätä niaratre kitani ngite. Akwa ñaka ja di ngwani nekä kwetre. Ye bitikäre, kä 1930 ye ngwane “kukwe ükaninte kukwe driekäre”, ye abokän nitre kukwe driekä konkrekasion keta kabre te nämene niken kukwe driere kä dianinkä kukwe driekäre yekänti. Ruäre ngwane, nitre gobranka tö nämene niaratre mikai ngite, akwa ñaka nämene nemen nuäre kräketre, ñobätä ñan aune nitre kukwe driekä nämene kwati krubäte. ¿Ja mräkätre käkwe ja di ngwani ne kwe ni rabadre kukwe driere dominkote ye nita mike tuin ütiäte jai?
3. ¿Ñobätä köbö dominko ye kwin kukwe driekäre?
3 Köbö kwin krubäte kukwe driekäre. Nitre jökrä bäsi ñaka sribire bämänte, aisete köbö yete niaratre tä jäme aune raba ni kukwe nuin. Nitre ruäre kukwe madabätä ben nikwe blitadre Ngöböbätä köbö yete, raba ni kukwe nuin arato. Nita ja ükökrö bämänte angwane nita ja ngwä kitani kwin kukwe driekäre, ye medenbätä ¿ñobätä mä ñan ja töi mike kukwe driere gätä ye känenkri o gätä ye täbiti? Raba angwane, ni raba niken mrö ngwena kwetadre chi jai.
4. ¿Nikwe kukwe driedre bämänte angwane raba kä mike ño juto nibätä?
4 Kä diandrekä jai kukwe driekäre bämänte aune kä rabaite nie ja dükakäre chi arato. Nikwe kukwe driei siba angwane ja rabai ruin kwin nie, ñobätä ñan aune sribi ütiäte nuainta nikwe (Pro. 19:23). Lidia käkwe Ngöbö kukwei kani ngäbiti ye erere ni mada raba ni kukwe nuin arato.