Ja di ngwandre nuainne kwin
1. ¿Texto 1 Corintios 9:26 ye tä kukwe meden mike gare kukwe drie yebätä?
1 Apóstol Pablo kukwe ne tikani: “Ti abko ñan tä näin betekä ökwä kware amne ñan tita kuso braire ngwarbe kä tökarete” (1 Cor. 9:26, Kukwe Kuin Ngöbökwe [KKN]). Kukwe nebiti Pablo käkwe mikani gare nämene kukwe mike nuaindre jai kukwe ja üairebiti yebätä töi nämene kwatibe. Kukwe niebare kwe ye raba ni dimike kukwe drie yebätä arato, ni ñaka tö ‘ja di ngwain ngwarbe’, ñakare aune nita kukwe driere ne kwe kukwe kwin rabadre bare. ¿Nuaindre ño?
2. ¿Pablo aune nitre kukwe driekä mada siklo kena ye erere ora nuäi te aune medente ni raba kukwe driere?
2 Nitre tä medente yekänti ni rikadre. Pablo aune nitre kukwe driekä mada siklo kena, nämene niken kukwe driere medente nitre kwandre ietre yekänti (Hech. 5:42; 16:13; 17:17). Nita kukwe driere yekänti nitre jökrä bäsi tä deu gwi ye ngwane bäri kwin ni raba kukwe driere ju ju te deu. ¿Ñongwane nitre tä nüke kwati bus o tren ngübata yekänti? ¿Nitre tä niken sribire dekäkri o tä kiteta derekri ye ngwane? ¿Ora nuäi ngwane nitre kwati tä nemen jondron rürübäinta yekänti? Ora ye ngwane nikwe kukwe driedre ji ngrabare ye bäri kwin.
3. ¿Nikwe dre nuaindre ne kwe kä diankata kukwe driekäre yekänti kukwe driedre bäri kwin?
3 Kä känti kukwe drieta yebätä töbikadre kwin käne. Kä dianinkä kukwe driekäre ye ererebätä nitre ükadrete kwin ye köböire kukwe drie raba bäri kwin kä yekänti. Ñodre, nitre kwati juandre kä keteitibe känti ye ngwane nitre ye ñan raba kukwe driere ükaninte ye ererebätä. ¿Nitre ye ñäkäbiti raba jene jene? Kä mente diankata kukwe driekäre ye ngwane bäri kwin nitre juandre braibe karote, ye köböire nitre jökrä nünanka yete yei kukwe drie raba, aune nitre kukwe driekä itire itire raba blite siba. Ne madakäre, ¿kä kukwe driekäre nemenkä ni ken ye ni raba kärere jai kukwe driekäre? Ye köböire ni ñaka ora juain ngwarbe ta.
4. Nita nitre mada känene ni “gwakitaka” ye kwrere, ¿dre käkwe ni dimikai sribi ye nuainne kwin?
4 Jesukwe niebare ni kukwe driekä ye tä “gwa gaen” ye kwrere rabai nitre ükökrö (Mar. 1:17, KKN). Ni ie gwakita gare, ñan tä kötü o krade kite jerekäbe ñöte, ñakare aune, ñongwane bätä medente gwa raba kwen bäri ie ye erere känti tä niken gwakite. Ni gwakitaka ye tä ja di ngwen krubäte. Kukwe drieta ye ngwane nikwe ja di ngwandre nuainne erere arato (Heb. 6:11).