Nikwe ja töi kriemikadre

1. ¿Kukwe meden dianinkä gätä kri köböiti nuaindi kä 2013 kräke, aune ñokäre kukwe ye ükaninte?

¹ Mantre jetebe nita ja tuin kukwe keta kabre ben abokän tä ni töi nuinte. Kukwe dianinkä gätä kri köböiti nuaindi kä 2013 kräke kädekata, “Nikwe ja töi kriemikadre”, ye kömikai 1 septiembre kä 2012 yete ja känenkäre (1 Tim. 1:19). Ni ni Sribekä käkwe jondron kwin biani nie yebiti nita dre nuainne yebätä kukwe ükaninte kädriedre ye käkwe ni dimikai töbiketari bökän.

2. ¿Kukwe meden meden ngwantarita abokän mikai gare kukwe kädriei yete?

² Kukwe ngwantarita abokän mikai gare. Kukwe kädriei yete kukwe keta kükü ngwantarita ni töi yebätä abokän mikai gare:

• ¿Jondron meden raba ni töi juen ngwarbe?

• ¿Dre käkwe ni dimikai ja töi ye ükete kwin?

• ¿Ñokänti nitre jökrä ye därie ngie ñaka raba niken nibiti?

• Kukwe Bibliabätä ja jie ngwankäre yebätä nita töbiketari aune nita ja tuenmetre jie ngwandre ie ye ngwane, ¿nita dre bämike?

• ¿Ño ni ñaka raba nitre mada töi mike ulire?

• ¿Ño monsotre bati raba ja ngwen metre Ngöböi tödeka kwetre nuadrete ye ngwane?

• ¿Nire nire ie kukwe Bibliabätä niena gare ye ererebätä tätre ja ngwen ye köböire dre kwin rabai kwetre?

3. ¿Nikwe dre nuaindre ne kwe gätä kri köböiti ye käkwe ni dimikadre?

³ Satana tä ja di ngwen krubäte ni töi juankäre ngwarbe, akwa Jehová tä ni dimike kä ngwen nüke jai kukwe yebätä. Ni Rün kä kwinbiti ni tarekä tä Biblia aune juta kwe yebiti niere nie: “Ji ne ara. Näinbiti” (Is. 30:21). Gätä kri köböiti nuainta yebiti Jehová tä ni jie ngwen. Ye medenbätä, mäkwe ja di ngwan niken kukwe kädriei ye jökrä kukwe nuin. Kukwe kädriei ye mäkwe kukwe nua kwin aune kukwe ye mä raba nuainne ño yebätä mäkwe töbika. Ne madakäre, dre namani gare mäi ye mäkwe kä drieta mä mräkätre yebe. Kukwe nieta Ngöbökwe ye nita mike täte angwane, ni töita nemen kwin aune nitre gobrainta Satanakwe tä jondron kä ngwankäre juto jabätä driere ye ni ñaka tuenmetre ja töi mike käme (1 Ped. 3:16).