Kukwe keta rike raba ni dimike ja tötika känänkäre
1. ¿Nitre tö ja tötikai Bibliabätä ye ñaka rabadre kwen nie angwane, nikwe dre nuaindre, aune ñobätä?
1 ¿Nitre tö ja tötikai Bibliabätä ye ñaka tä nemen kwen mäi? Ye erere angwane mäkwe ñaka ja di ngwan nekä, mäkwe känä jankunu. Nitre tä ja di ngwen jankunu sribi Jehovakwe nuainkäre ye kräke niara tä kukwe kwin mike nemen bare (Gál. 6:9). Kukwe ketarike mikata gare ja känenkäre ne käkwe mä dimikai.
2. ¿Ni raba ja tötika Bibliabätä ye driere ño biare ja tötika kömikakäre?
2 Ja tötika Bibliabätä ye driedre biare. Nita täräkwata Ni Mikaka Mokre bätä ¡Despertad! driere ye gare nitre kwati ie, akwa nita nitre tötike Bibliabätä ye ñaka gare ietre. Köbö mada te mä rika kukwe driere ju ju te angwane, ¿ñobätä mä ñan ja tötika Bibliabätä ye driere biare? Mätä nitre tuibiti yei mäkwe ja tötika Bibliabätä driedre arato. Niaratre käkwe ñaka ja tötika Bibliabätä ye kadre ngäbiti angwane, mä raba niken täräkwata o tärä ye ngwena jankunu kräke aune töi mike kukwe ütiäte yebätä. Kä kwati krubäte te ja mräkä iti nämene täräkwata Ni Mikaka Mokre bätä ¡Despertad! ye mikete nitre gure yei. Bati nikani täräkwata nükani mrä ye ngwena ietre ngwane, jämi nikenta ye känenkri, kukwe ne ngwanintari kwe nitre yei: “¿Mä törba ja tötikai Bibliabätä?”. Nitre ye käkwe jän niebare ie, aune kä nengwane nitre nibu ye ja ngökabarera ñöte.
3. ¿Ñobätä nikwe ñaka nütüdre nitre tä nüke kena gätäbätä ye niena ja tötike Bibliabätä?
3 Nire nire tä nüke Ju ja Ükarakrö känti yebe blitadre. Nitre tö kukwe mikai gare jai tä nüke gätäbätä ye abokän niena ja tötike Bibliabätä ye mäkwe ñaka nütüdre. Ja mräkä iti tä niere: “Nitre ja tötikaka tä tikwe ye jökrä bäsi kwani gätäte tie”. Meri ja gaire krubäte käkwe nänbare Ju ja Ükarakrö yekänti kä kwäjätä biti kwärike te monsoitre merire käkwe ja ngäkabarera ñöte yebe. Gätä kömika nämene ye bätärabe nämene nüke aune gätä nämene krüte ye bätärabe nämene nikenta. Bati, ja ngwai iti käkwe ja töi mikani ja tötika Bibliabätä driere ie. Meri ye ja tötika ye kani ngäbiti aune ja känenkäre ja ngökabare ñöte kwe. Ja ngwai käkwe tikabare: “¡Tikwe kä mikani niken kwäjätä biti kwärike ta ja tötika Bibliabätä driekäre ie ye ñaka kwin!”.
4. ¿Ni raba ja mike ño ja mräkätre mada dimikakäre ne kwe ni kwandre nie tötikakäre Bibliabätä?
4 Ja mikadre ni mada dimikakäre. Ja ngwai iti tä niken ja ngwai mada mukore nitre tötike. Ja tötika tä krüte ye bitikäre, tä kä kärere ja ngwai ni tötikaka ie, ni mada tärä abokän törba ja tötikai Bibliabätä ye ngwantarikäre ni ja tökaka ie. Ni raba kukwe ne nuainne arato, nire nire tuabitita nikwe käkwe tärä Dre drieta kani ngäbiti yei nikwe ngwandretari, ni mada tärä gare ietre abokän törba tärä ye ie ja kräke arato. Ne madakäre, nitre kukwe driekä o nitre prekursor kisete kukwe ruäre tä yebätä ñaka raba nitre tö ja tötikai Bibliabätä ye tötike. ¿Mä raba ja mike dimikakäre?
5. ¿Ñobätä bäri kwin ngwandretari ja mräkätre gure muko ñaka kukwebätä yei niara tö ja tötikai Bibliabätä o ñakare?
5 Ja mräkätre gure muko ñaka kukwebätä yebe blitadre. ¿Konkrekasion mäkwe yekänti ja mräkätre kukwe driekä tärä abokän muko ñaka Testiko? Niaratre ruäre ye ñaka töta nemen muko kwe tuai kukwe driere jai, akwa töta nemen ja tötikai Bibliabätä ni mada ñaka niara mräkäre yebe. Ño aune ñongwane ni raba blite ben ye nikwe ngwandretari käne muko kwe Testiko yei.
6. ¿Ñobätä orasion ye ütiäte krubäte ne kwe ni tö ja tötikai Bibliabätä kwandre nie?
6 Ja di kärädre Jehovai. Orasion ütiäte krubäte ni dimikakäre ye mäkwe ñaka käi kwitaka jabiti (Sant. 5:16). Jehová töi ño ye ererebätä nikwe orasion nuaindi angwane, niarakwe kukwe nuai tä käbämike nie (1 Juan 5:14). Ja mräkä iti ie kä ñaka nämene nemente krubäte ye käkwe ja di käräbare Jehovai ne kwe ni kwandre ie tötikakäre Bibliabätä. Akwa muko kwe namani töbike krubäte kä ñaka rabaite ie ni ja tötikaka ye dimikakäre metrere kukwe kri tädre ni ja tötikaka kisete ye ngwane. Ye medenbätä kukwe ye mikani gare kwe Jehovai orasion yebiti. Niaratre nibu käkwe orasion nuainbare ye Jehovakwe kukwe nuabare, bämän nikani krobu ta ye bitikäre ja ngwai prekursora konkrekasionte ie ni tö ja tötikai Bibliabätä kwani aune blitabare kwe ja mräkä yebe ne kwe niarakwe ni ye tötikadre. Muko kwe kukwe tikabare: “Nire nire ñaka raba ni mada tötike Bibliabätä tä nütüre, yei tita niere niaratre rabadre orasion nuainne jankunu aune kukwe meden ribeta kwe jai ye kädekadrete metrere kwe orasion yete. Kä rabai juto krubäte nunbätä ye nunkwe ñaka nütübare jire”. Mäkwe ñaka ja di ngwain nekä angwane, ni mada tö ja tötikai Bibliabätä ye kwain mäi arato bätä mäkwe dimikai näin “ji käta niken ni ngwena nüne kärekäre” yebiti ye käi rabai juto mäbätä (Mat. 7:13, 14, Kukwe Kuin Ngöbökwe).