Nikwe ‘kukwe kwin mikadre gare ni jökrä ie’
1. ¿Pablo kukwe meden kwin bämikani ni kräke kukwe drie yebätä?
1 “Kukwe kuin Jesubtä [...] [ye] makwe mika gare [...] kuin jökrä.” (2 Tim. 4:5, Kukwe Kuin Ngöbökwe [WBT].) Erametre apóstol Pablo kukwe ne niebare Timoteo ie ñobätä ñan aune niara nämene kukwe ye nuainne arato. Kä 47 aune 56 ye näire Pablo konkrekasion tuaninbiti mrä bämäkäre. Tärä Hechos ye tä blite bä kabre Pablo kukwe driebare täte yebätä (Hech. 23:11; 28:23). ¿Ye erere ni raba nuainne ño kä nengwane?
2. ¿Ni tädre kukwe driere ju ju te ye ngwane ño ni raba kukwe driere täte?
2 Ju ju te. Kukwe kwin drieta ye nitre ruäre jämi kukwe nuin jire, ye medenbätä blitakäre nitre ye erere ben, ni raba niken nitre ye tuinbiti akwa ora mada te. Ne madakäre, nikwe kukwe driedi derekri o bämän krüte yete angwane ni rabai blite nitre ji ngwanka mräkätre käne yebe. Ni rabadre ja di ngwen blite ni iti ben ju kwatire kwatire te, ye nuainkäre ütiäte krubäte nitre ñaka kwandre gwi nie ye nikwe tikadre täräbätä jai aune tuadrebiti ora mada te. Akwa, ni tädre ja di ngwen jankunu aune kukwe kwin ñaka rabadre nemen nikwe ye ngwane, ni raba tärä tike aune mikete o llamada nuainne teléfono yete.
3. ¿Kätä nemen ño ütiäte nie kukwe driekäre ni jökrä ngwärekri aune kä jökrä ngwane?
3 Kukwe driedre ni jökrä ngwärekri aune kä jökrä ngwane. Ni testiko Jehovakwe nita kukwe ‘erametre ni mikakäre töbätä’ ye mike gare nitre jökrä tö kukwe nuai yei. Ruäre ngwane, nita kukwe driere “ji ngrabare” o “kä känti nitre kwati näin ta” yekänti (Prov. 1:20, 21). Nita sribire mantre jetebe ye ngwane, nita ja di ngwen kukwe driere ye erere arato. Ye medenbätä ni raba niere nita “ja töi mik[e] kwatibe kukwe kuin Jesubtä” ye mike gare (Hech. 18:5, WBT). Ye erere angwane, ‘kukwe kwin mikadre gare ni jökrä ie’ ye nita nuainne (Hech. 10:42; 17:17; 20:20, 21, 24).
4. ¿Oradre aune töbikadretari ye raba ni dimike ño kukwe driere täte?
4 Akwa, ruäre ngwane, ja ñaka tä nemen nüke törö nie o nita nemen ja gaire yebätä ñaka kukwe drieta. Jata nemen ruin ño nie ye nüke gare Jehovai (Sal. 103:14). Akwa, kukwe ye rabadre bare nibätä angwane, nikwe oradre ie ne kwe kä jürä ñaka rabadre nibätä blitakäre (Hech 4:29, 31). Ne madakäre ni tädre ja tötike kaibe Kukwe Ngöbökwe yebätä angwane, nikwe töbikadretari kukwe kwin drieta yebätä ye käkwe ni töi mikai mike bäri ütiäte jai (Filip. 3:8). Ye rabai ütiäte ni kräke aune ni töi mikai kwe kukwe driere kä jutobiti.
5. ¿Ni raba dre nuainne ne kwe Joel kukwe mikani gare ye rabadre nemen bare?
5 Joel kukwe mikani gare yekänti niebare, köbö kri Jehovakwe aune jürä ngwandre krubäte jabätä ye rükai känenkri, juta kwe tädi kukwe driere krubäte aune kukwe mada käkwe ñaka ketaibätä jire (Joel 2:2, 7-9). Nikwe sribi ne nuaindre täte ñobätä ñan aune ñaka nuaindita jire.