“Munkwe ja mräkätre [...] tare”
Kukwe tä tikani kena ye tikabare Ngöbö diebiti kä mil krobu nikanina ta yete (1 Ped. 2:17, Kukwe Kuin Ngöbökwe). Kä nengwane bäri ni rabadre mike täte. Akwa ¿ja mräkätre kwati kä jökräbiti tibien ye ni raba tarere ño? Aune nitre ñaka ja tarere ye ngätäite, ¿nikwe dre nuaindre ne kwe ja tare ye tädre käre nikwe? (Mat. 24:12.) Mäkwe video Toda nuestra asociación de hermanos ye tua aune kukwe ngwantarita jatäri ne mäkwe mikadre gare ño ye mäkwe mika gare jai.
1) Metrere, ¿ñongwane nita nemen ja mräkätre kristiano kä jökräbiti tibien ye ngätäite? 2) ¿Sribi meden ketamä nita nuainne ja mräkätre kä jökräbiti tibien yebe? 3) ¿Ja mräkätre töita kwatibe kukwe driekäre ye tätre bämike ño a) kä mente Alaska yekänti, b) kä keta kabre nünankakäre ru mrente ie kä Europa yekänti aune c) kä tokwä dube krubäte Perú yekänti? 4) ¿Ñobätä ni ñaka rabadre kukwe drieta ye mike tuin jire jai sribi ñaka ütiäte ye kwrere? 5) Nitre testiko Jehovakwe ja dimikanina ño aune ja töi mikanina ño jäme kwärikwäri a) dobo kri ye bitikäre, b) murie kri ye bitikäre aune c) nitre ja käite arabe käkwe rübare jabe näire ye mä raba mike gare. 6) ¿Kukwe tä ni kristiano erametre mike gare ye nuain raba ño metrere? (Juan 13:35.) 7) ¿Ju ja Ükarakrö sribedre gwairebe ye köböire dre kwin raba nemen bare? 8) Juta Europa oriental aune Rusia yekänti nitre namani ja mike kukwe drieta rüere angwane, ¿ja mräkätre dre nuainbare rabakäre jankunu nire kukwe ja üaire yebiti? 9) ¿Nitre Testiko Jehovakwe kwati tä ja di ngwen krubäte dre nuainne rabakäre gätä kri köbömä yebätä, aune ñobätä tätre nuainne? 10) ¿Video ne mä töi miri ño dite a) Jehová mikakäre täte gwairebe ja mräkätre ben, b) nitre mada dimikakäre kukwe tare näire aune c) kukwe driekäre kä jökrä ngwane? 11) ¿Mä raba video nebiti ni mada dimike ño kukwe drieta yekänti?
Jehová tare nikwe yebätä nita nemen ja mräkätre kä jökräbiti tibien ye ngätäite. Ye medenbätä nita kukwe mike gare jai Jehovabätä aune nita niara mike gare ni madai ye käi juto nibätä. Ne madakäre, nitre tareta Jehovakwe ye nita tarere. Kukwe tare näire nita niaratre dimike ye ngwane, Ngöbökwe debe biandre nie ye ni ñaka ribere jire ie. Ñakare aune, nita debe bien Ngöböi ñobätä ñan aune ja mräkätre kä jökräbiti tibien ye ngätäite nita yebätä. Kä ne jämi krüte känenkri, ni rabadre ni mräkätre kä jökräbiti tibien tarere jankunu.