Nitre Ngöbö kukwei niekä kukwe kwin bämikani yebätä mäkwe blita: Joel
1. Nita kukwe driere ye ngwane, ¿ño ni raba ja töi mike bobre Joel erere?
1 ¿Joel ni Ngöbö kukwei niekä ye abokän nire? Täräbätä niara kä tä tikani yekänti niara abokän “Petuel ngobo” ye aibe mikani gare kwe (Joel 1:1). Ni kukwe mikaka gare töi bobre yekwe ñaka blitabare sribi nuain nämene kwe yebätä, ñakare aune blitabare metrere kwe Jehová kukwei yebätä. Nita kukwe driere ye ngwane nita ye erere nuainne arato: ni ñaka tä jondron nuainne ni käi kitadrekä yekäre, ñakare aune ni madakwe Jehová aune kukwe Bibliabätä ye kukwe nuadre ie ni töta nemen (1 Cor. 9:16; 2 Cor. 3:5). ¡Aune kukwe drieta nikwe ye tä ni dimike krubäte! Joel kukwe niebare abokän tä ni töi mike kwatibe kukwe driebätä aune tö ngwen ye ani mike gare ruäre jai.
2. Köbö Jehovakwe nibira ni ken krubäte, ¿yebätä nikwe dre nuaindre?
2 “Köbö Jehovakwe ye nibira ja ken.” (Joel 1:15.) Kä nikanina mil krämä näre ta yete kukwe ye tikabare, akwa rabai bare täte kä nengwane. Kukwe tare tä nakainkä bäri käbiti tibien, aune nita kukwe driere yekänti nitre tä ni kötaire bätä ni tuin ngwarbe ietre. Ye tä mike gare nita nüne kä krüte te (2 Tim. 3:1-5; 2 Ped. 3:3, 4). Kä krüte nibira ni ken, yebätä kukwe driedre ye nikwe mikadre nuaindre käne jai (2 Ped. 3:11, 12).
3. Ja tare nikadi kri nibira ja ken krubäte kä nengwane yebätä, ¿ñobätä ütiäte nikwe kukwe driedre bäri?
3 “Jehová rabai ja kriemikakäre juta kwe yei.” (Joel 3:16.) “Kä kwin bätä kä tibien rabai ngrenkä” nieta bersikulo yebätä arato, ye abokän ja tare nikadi kri yete Jehovakwe kukwe ükaite ye meden gärätä. ¡Jehovakwe nitre niara mikaka metre täte mikai kwäre ye kwin krubäte! (Apoc. 7:9, 14.) Käre ni tädre kukwe driere aune Jehovata ni ngübare bätä ja die bien ño nie tödeka nikwe mikakäre dite aune kä ngwankäre nüke jai yebätä töbikadretari, ye köböire ni rabaite nire ja tare nikadi kri nibira ja ken yete.
4. ¿Ñobätä kä tädre juto nibätä aune tö ngwandre ja tuakäre kukwe ja känenkäre yebe?
4 Joel kukwe mikani gare ye tare krubäte nitre ruäre raba niere, akwa erametre tä juta Ngöbökwe mike tö ngwen mikai kwäre yei (Joel 2:32). Yebätä, nikwe tö ngwandre ja tuakäre kukwe ja känenkäre yebe, nikwe ja töi mikadre kwatibe kukwe kwin Gobran Ngöbökwe yebätä mike gare ni madai aune kukwe nieta Joel 2:23 ye nikwe nuaindre, yete nieta: “Jehová Ngöbö munkwe ye käi ngwen juto jabätä”.