Kukwe ngwantarita

◼ Ni kukwe driekä rabadrera juto biare ja ngökakäre ñöte niedre ie ye känenkri tädre näin gätäbätä aune kukwe driere, ¿ye käkwe dre bämikadre?

Nita ja töi mike ja ngökö ñöte ye kukwe bäri ütiäte dianta nuaindre jai. Ye medenbätä, Ngöböta dre ribere ni ja ngökaka ñöte yei ye rabadre gare ie, ye bitikäre nitre umbre raba niere niara tä juto ja ngökakäre ñöte. Ne madakäre, niara töita kwatibe nünankäre Ngöböta kukwe ribere ye ererebätä ye bämikadre kwe.

Nitre kristiano ie ribeta rabadre ja ükökrö käre, ye medenbätä ni kukwe driekä tö ja ngökai ñöte angwane rabadre ye erere nuainne (Heb. 10:24, 25). Arato niara rabadre blite gätäte. Ne madakäre, niarata kukwe kädriere Kwela Sribi Ngöbökwe Kräke yete, akwa ja ngökakäre ñöte kukwe ye ribe ñaka niarabätä.

Ne madakäre, kukwe kwin driedre aune nitre tötikadre ye mikani nuaindre ni kristiano ie, yebätä ni kukwe driekä tö ja ngökai ñöte ye rabadre käre kukwe driere (Mat. 24:14; 28:19, 20). ¿Ja ngökadre ñöte ye känenkri kukwe driedre kwe sö kräbe te? Niara töita kukwe driebätä kä jutobiti sö kratire kratire ye bämikakäre rabadre kä mike niken ruäre ta (Sal. 78:37). Akwa, ñaka rabadre kä juen krubäte ta; sö rikadre braibe ta ye bitikäre raba nuainne. ¿Niarakwe ora nuaindre nuäi kukwe driebätä? Kukwe ñaka ükaninte jire kukwe ye kräke. Kukwe meden tä ni kukwe driekä itire itire kisete yebätä nitre umbre ja töi mikadre aune rabadre töbike kwin kräke (Luc. 21:1-4).

Konkrekasion ruäre känti nitre umbre ñaka krubäte yebätä ni sribikä konkrekasion yete o nitre umbre tärä ye käkwe ja ükadrekrö nire tö ja ngökai ñöte yebe angwane, rabadre ngwen törö jai nitre töi ñaka ja erebe aune rabadre töbike kwin käne ne kwe ni ye tä juto biare ja ngökakäre ñöte o ñakare mikakäre gare jai. Ni tö ja ngökai ñöte tö ja mikai testiko Jehovakwe ye bämikadre kwe. Arato, ja ükadrekrö juta Ngöbökwe yebe aune kukwe driedre ye tuin ütiäte ie ye rabadre bämike. Ni kukwe driekä mada ja ngökani ñöte tä ünä kukwe ja üairebiti bätä tä sribi nuainne kwin ye ñan ai nitre umbre rabadre ngübare ni kukwe driekä tö ja ngökai ñöte yebätä. Ni kukwe driekä tö ja ngökai ñöte ye ñaka tä juto biare ja ngökakäre ñöte rabadre tuin nitre umbre yei angwane, blitadre kwe ni yebe aune ñobätä niara ñaka niena juto ja ngökakäre ñöte ye mikadre gare kwe Biblia yebiti ie, bätä di mikadre kwe kukwe ja üairebiti tä ribere jai ye ererebätä.