Kukwe ngwantarita

◼ ¿Nitre tä mekerabe tibo kukwe ja üairebiti ye dimika raba ño ne kwe rabadreta kukwe kwin ye driere?

Nire tä tibo kukwe ja üairebiti tö Jehová mikaita täte tä bämike töi bökänbiti ye käi nemen juto nibätä (Luc. 15:4-6). Ja mikata rüere o kukwe madabe tä ja tuin mantre jetebe yebätä ñaka niena ja tötike kaibe Bibliabätä, näin gätäbätä aune kukwe driere. ¿Dre nuaindre dimikakäre bäri kwin ne kwe rabadreta nirien kukwe ja üaire yebiti?

Tare metre nikwe ye ni jökrä rabadre niere ie. Dimikadre ño kukwe ja üairebiti ye nitre umbre rabadre mike gare bengwairebe jai (Sant. 5:14, 15). Bitinkä tä tibo kukwe ja üairebiti angwane, ni kukwe driekä iti ie kukwe gare yekwe dimikadre ne kwe rabadreta kukwe driere. Akwa, mekerabe ñaka niena näin konkrekasionte angwane, dimikadre bäri kukwe madabiti. Tärä meden raba tödeka kwe mike dite aune töi mike sribi Ngöbökwe mike tuin ütiäte jai yebiti tötikadre. Ye erere ngwane, ni umbre kukwe drieta jie ngwanka yekwe ni kukwe driekä iti ie kukwe gare juandre tötike (Heb. 5:12-14; mäkwe “Sección de preguntas” tä Nuestro Ministerio del Reino noviembre 1998 yebätä ye mika ñärärä). Ni ye erere dimikadre gare mäi angwane, mäkwe nie ni umbre kukwe drieta jie ngwanka tä konkrekasionte yei.

Nire tä tibo kukwe ja üairebiti ye nübaidre kukwe driereta jabe ye känenkri, ni umbre nibu rabadre blite ben ne kwe raba kukwe driere o ñakare ye mikakäre gare jai. Nitre tö nemen ja mikai mrä kukwe driekä yebe blitata ye erere nuaindre kwetre ben arato (mäkwe La Atalaya 15 noviembre 1988, pág. 17 ye mika ñärärä). Nire tä tibo kukwe ja üairebiti yekwe ja töi mikadre kwatibe kukwe kwin driere. Kukwe nieta páginas 79 nemen 81 tärä Organizados yebätä ye erere rabadre nuainne aune rabadre ja ükökrö käre konkrekasionte arato.

Nire tä tibo kukwe ja üairebiti yekwe kukwe ükadrete kwin jai kukwe ja üaire nuainkäre köböire rabaita dite aune ja mäkäita kwin kwe Jehovabe bätä ji niken ni ngwena ja nire käre kokwäre yebiti rabaita näin (Mat. 7:14; Heb. 10:23-25). “Ja di [ngwandre] ngöi jökrä” kwe aune ja töi mikadre käre kwe ni kristiano erere angwane, ni kristiano erere “jändrän kuin nuendi [kwe] amne [...] ñan nüna[inta] ngwarbe” kwe (2 Ped. 1:5-8, Kukwe Kuin Ngöbökwe).