Mäkwe tödeka niaratre erere
1. ¿Tärä medenbätä nikwe ja tötikai Ja tötika Bibliabätä Konkrekasionte yete bämän 19 octubre yete ja känenkäre?
1 Bämän 19 octubre 2015 yete ja känenkäre nikwe ja tötikai tärä Mäkwe tödeka niaratre erere yebätä Ja tötika Bibliabätä Konkrekasionte yete. Tärä nebätä nitre brare aune merire 14 käkwe Ngöbö mikani metre täte yebätä blitata. Nita ñäkebätä ye ngwane, nitre kädrieta yete, aune kukwe medenbe ja tuani kwetre Jehová mikakäre metre täte tä nemen gare nie angwane, nitre ye tä nemen tuin bäri metre nie. Ne madakäre, kukwe kwin ja töi kräke tä nemen gare nie (Heb. 6:12).
2. Jondron meden tä ükaninte tärä Mäkwe tödeka niaratre erere yebätä ye kädekete.
2 Tärä ye tä ükaninte ño. Jondron ketebu ütiäte tä mikanibätä, kukwe nakaninkä jatäri kä jene jene te aune mapa, yebiti mikata gare ñongwane bätä medente nitre yekwe nünanbare. Kapitulo kwatire kwatire yebätä, sección “Kukwe ngwantarita töbikakäre” ye tä mikani, kukwe ye tä ni dimike töbiketari aune kukwe drieta ja töi kräke nie ye erere nuainne. Ne madakäre, jondron keta kabre tä bämikani, kia kia jökrä ükaninte kwin, ne kwe rabadre tuin metre nie.
3. ¿Ni raba dre nuainne ja tötikakäre kwin tärä nebätä?
3 Ja tötikadre ño kwin tärä yebätä. Nitre Braibe Konkrekasion Jökrä Ngübabitikä, käkwe tärä tikani kena yete, tä ni nübaire kukwe ne nuainne: “Nitre kädrieta ye töi nämene ño aune ja namani ruin ño ietre ye munkwe bämika ja töite, aune kukwe kwatire kwatire yekänti munkwe ja ngwandre ño yebätä munkwe töbika”. Akwa kukwe bämikadre ja töite nieta nete ye abokän ni törbadre bämikai ño ye erere nuaindre ye ñan ai gärätä; ñakare aune, nikwe bämikadre ja töite aune kukwe ye tä nemen bare nibätä ye kwrere mikadre tuin jai. Ye nuainkäre nikwe kä diandrekä jai töbikatarikäre (Neh. 8:8). Bämän ruärebätä ja tötika ye kömikadre kapitulo ötare ta yekänti angwane, kukwe kädriebare bämän käne yebätä ye ja mräkä ja tötika jie ngwanka ye käkwe ngwandreta törö ñaka minuto krati te. Arato bämän yebätä “Kukwe ngwantarita töbikakäre” ye ñaka mikani kädriekäre angwane, raba kukwe ngwentari keteiti o ketebu kukwe ngwankäreta törö.
4. ¿Ñobätä ütiäte nikwe ja tötikadre tärä Mäkwe tödeka niaratre erere yebätä?
4 Jondron aune nitre gobrainta Satanakwe ye tö ni di ngwain nekä mantre jetebe o ne kwe ni ñaka rabadre tödeke jire. Tärä ne aune kukwe kädekata ne erere tä kite Ni Mikaka Mokre yebätä, ye Jehová tä bien nie ni mikakäre tödeke bäri (Sant. 1:17). Ni jökrä rabadre ja tötike kwin tärä nebätä, yekäre ni tädre käre Ja tötika Bibliabätä Konkrekasionte yete aune blitadre arato.