Galleta nukro tikwe kräke
NICK, rua iti nünanka Oregón (Estados Unidos), käkwe tikani: “Kä 2014 yete ti jataba näin nukro ben basare juta te ruäre. Nitre testiko Jehovakwe nämä käre karito ken ja ngwä kitani kwin aune nitre nämä niken ta ye ie nämä köbö kwin niere kötare kwärä.
”Nitre testiko Jehovakwe ñaka nämä ja töi mike kwin nitre kräke aibe, ñakare aune nukro tikwe kräke arato. Bati meri kädekata Elaine, nämä karito yebe käkwe galleta bianba nukro tikwe ie. Ye bitikäre käre ti nämä nikenta ngwena basare ngwane, nämä nemen ‘kä ötöta medente galleta biani ie yekänti’.
”Kä jataba niken ta. Galleta ye käi nämä juto nukrobätä aune ti nämä blite chi nitre testiko Jehovakwe ben ye käi nämä juto tibätä. Akwa ti ñan tö nämä blitai krubäte. Kä rababara 70 biti bäri tibiti yebätä nitre testiko Jehovakwe nämä kukwe meden mike täte ye ñan nämä gare kwin tie. Iglesia protestante käkwe ti töi mikaba ulire yebätä tikwe ja tötikadre kaibe Bibliabätä ye bäri kwin ti nämä nütüre.
”Kä ye ngwane arato nitre testiko Jehovakwe mada jataba tuin tie karito yebe kä mada mada känti juta yete. Niaratre ye nämä ja töi mike kwin arato. Kukwe meden ti tö rababa mikai gare jai ye nämä mike gare tie Bibliabiti. Aisete ti jataba tö ngwen bäri ietre.
”Bati Elaine ngwantariba tie: ‘¿Jondron nire ye Ngöbökwe biani nie?’. ‘Jän’, tikwe nieba ie. Biti Isaías 11:6-9 yebätä ñäkäba kwe tie. Yete ja käne ti tö jataba kukwe Bibliabätä mikai gare jai. Akwa ti ñan nämä niken täräkwata nitre testiko Jehovakwe yekwe ngwena jai.
”Ye bitikäre ti nämä blite chi akwa nguseta Elaine aune muko kwe, Brent yebe. Dikadrekä Jesús tä jiebiti ye dre gärätä ye mikakäre gare jai tikwe ñäkädre Mateo nemen Hechos yebätä nieba kwetre tie. Aune ye erere tikwe nuainba. Ye bätäräbe ti jataba ja tötike Bibliabätä Brent aune Elaine yebe. Ye rababa bare kä 2016 ötare ye ngwane.
”Ti tötika nämä Bibliabätä aune gätä bämä kratire kratire ye ti nämä ngübare kä jutobiti. Ti nämä ja kite Bibliabätä ye käi nämä juto krubäte tibätä aune ti nämä debe bien krubätebätä. Kä rikaba kwati biti bäri ta ye bitikäre tikwe ja ngökaba ñöte. Nengwane kä niena 79 tibiti aune tita ji metre yebiti ye gare tie. Nitre ja mräkäre kä jökräbiti tibien tä sribire gwairebe ye ngätäite Jehová jatani ti ngwena yebiti kukwe kwin mikata nemen bare kwe ti kräke”.