¿Törö Mäi?

¿Mäkwe ñäkäbarera täräkwata Ni Mikaka Mokre mrä mrä yebätä? Ye erere ngwane, mä raba kukwe ngwantarita ne mike gare ño ye mike gare jai.

¿Nikwe ja töi kwitadre bitin ye abokän dre gärätä? (Romanos 12:2).

Ni tädre kwin yekäre kukwe ruäre aibe nuaindre ye ñan ai gärätä. Ñakare aune ni brukwä ño aune ni töi ño yebätä nikwe ja di ngwandre ja töi kwite. Ni tädre nüne kwin Jehová okwäkänti yekäre kukwe ükaninte kwe mikakäre täte ye nikwe nuaindre aune ye ererebätä nünandre (w23.01, página 8 aune 9).

¿Ño ni raba töbike debe näre kukweta nakainkä yebätä?

Kukwe tä nakainkä käbiti tibien ye tä profecía Bibliabätä mike nemen bare yebätä ütiäte krubäte ni kräke. Akwa ni tö töbikai kwin käne ñobätä ñan aune, ni ñan tö konkrekasion ñäkäibiti. Bäri kwin juta Ngöbökwe tä kukwe mrä mike gare ye ererebätä ni tö blitai (1 Cor. 1:10) (w23.02, página 16).

¿Jesús aune nitre nänkä niara jiebiti ja ngökani ñöte ye ñobätä ñan ja erebe?

Jesús därebare juta ja dianinanka mento Ngöbökrä yete, yebätä niara ñaka ja dianinkä mento Jehovakrä. Niara ye töi metre aune ngite ñaka jirebätä (w23.03, página 5).

¿Ni raba dre nuainne ne kwe ja mräkätre madakwe blitadre gätäte?

Blitadre kukwe braibebiti ye köböire kä rabadrete ne kwe ja mräkätre mada rabadre blite arato. Ne madakäre ñan kukwe niedre krubäte ne kwe ja mräkätre mada rabadre kukwe mike gare arato (w23.04, página 23).

¿“Ji deme” nieta Isaías 35:8 ye abokän drebätä blitata?

Nitre judío kräke ji ye abokän kukwe bämika nämäne. Ji Babilonia nemen Israel. ¿Nengwane abokän ji ye dre gärätä ni kräke? Kä nikani cien kabre ta, kä 1919 ye känenkri, ji ye ükate jatanina, ñodre, imprimi jatani aune Biblia kwita jatani. “Ji deme” ye tä niken juta Ngöbökwe ngwena kä bä nuäre ja üairebiti ye kokwäre aune kukwe kwin gobran Ngöbökwebätä ye käi ngwen juto jabätä (w23.05, página 15 nemen 19).

¿Proverbios kapitulo 9 yete meri nibu medenbätä kukwe bämikata?

Proverbios tä blite “meri ñan töbike kwin” yebätä aune kukwei kai ngäbiti ngwane näin ni ngwena “mobe Dobote nguse”. Ne madakäre “Kukwe töbätä erametre” tä ni nübaire ye käi ngäbiti ngwane näin ni ngwena “ji biti kukwe nüke gare” yebiti aune ja nire kokwäre (Prov. 9:​1, 6, 13, 18) (w23.06, página 22 nemen 24).

¿Jehová ni mike tuin bobre jai aune moto kwin ye bämikani ño kwe Lot ie?

Lot rabadre ngitie kä mobe kä tokwäre yete niebare Jehovakwe ie. Yebätä bikabare tidrä kwe Jehovabätä, tuadremetre kwe niken mräkätre kwe yebe kä Zóar yekäre. Ye ngwane, Ngöbökwe tuanimetre niken kä yekänti (w23.07, página 21).

¿Meritre raba dre nuainne muko tä pornografía tuin ngwane?

Nitre merire ñan rabadre ngite kite jabiti. Bäri kwin tä ja kete Jehovabe yebätä ja töi mikadre kwe, arato meritre ie ja namani ruin di nekä akwa Jehovakwe dimikani ño yebätä töbikadretari kwe. Raba muko kwe dimike kukwe raba niara mike ngoto ritete yebätä (w23.08, página 14 nemen 17).

¿Nita kukwe mike täte yebätä kukwe ngwandretari nie ngwane ja ngwan töbätä ye raba ni töi mike ño jäme?

Kukwe ngwantarita yebiti nitre töita ño aune dre tä ngwen töbike ye rükai gare nie. Yekwe ni dimikai kukwe mike gare ietre töi kwinbiti aune töi jämebiti (w23.09, página 17).

¿María kukwe nuainbare ja di käräkäre yebätä dre raba nemen gare nie?

Niarakwe Mesías ngübadi niebare ie ngwane, ja di käräbare kwe nitre madai. Gabriel aune Elisabet käkwe dimikani kukwe Ngöbökwe yebiti. Ye erere ja mräkätre raba ni dimike (w23.10, página 15).

¿Jehová raba orasion nikwe ye mike nemen bare ño?

Niara orasion nikwe kukwe nuai aune niara töita ño ye ererebätä kukwe mikai nemen bäre kwe nikrä käbämikata kwe nie (Jer. 29:12). Kukwe ja ererebe käräta ie akwa niara raba mike nemen bare jene jene. Akwa käre ni dimikai kwe käbämikata kwe nie (w23.11, página 21 aune 22).

Romanos 5:2 tä blite tö ngwanta kukwe ja känenkäre yebätä, ¿se ñobätä bersikulo 4 yete blitata bobukäreta kukwe arabätä?

Kukwe kwin mikata gare nitre ie ngwane. Niaratre raba nüne kä bä nuäre te kä tibienbätä tä nemen tö ngwen. Akwa, nikwe ja tuai kukwe tare ben, nikwe ja di ngwain aune Jehová ni kai ngäbiti ye rabai gare nie ngwane, tödeka nikwe ye rabai bäri dite (w23.12, página 12 aune 13).