Nitre tä kukwe ngwentari
¿Nememe ñongwane kukwe kwin ye driedi?
Jesús niebare: “Kukwe kwin Gobran Ngöbökwebätä ye driedi kä jökräbiti tibien ne kwe kukwe ye rabadre gare nitre jökrä ie, aune ye ngwane kä krüte ye rükai” (Mat. 24:14). Versículo ne, aune versículo 6 bätä 13 yete “kä krüte” nieta ye kwitata télos kukwe griego yebiti. Kä gobrainta Satanakwe ye gaite täte Armagedonte ye gärätä (Apoc. 16:14, 16). Aisete kä rabaira chi kä krüte ye rükai ngwane kukwe kwin drieta ye mikai nünenkä. Bitinkä kukwe ne nükani gare nie.
Babilonia kri ye gaite aune ja tare nikai kri kömikai ye ngwane batibe nikwe kukwe drie mrä nütü nämä (Apoc. 17:3, 5, 15, 16). Ja tare nikai kri kömikai ye ngwane “kä te Jehovakwe jondron kwin nuaindi” nieta ye mikai krüte nütü nämäne (Is. 61:2). Ja tare nikai kri kömikai ye känenkri nire nire käkwe ja ngwain metre Jehovai ye aibe rabaite kwäre nütü nämäne. Nitre Judío nämäne ja ngwen metre Jehovai aune brukwä nämäne kukwe blo kräke yebätä namaninte kwäre aune yebätä niaratre dianinkä rabatekäre kwäre Jerusalén ganinte kä 607 Kristo känenkri ye erere rabaitre bare nitre kä ne ngwane kräke nun nämä niere (Ezeq. 5:11; 9:4). Akwa kukwe niebare Jesukwe Mateo 24:14 ye ñaka kukwe ye mike gare, ñobätä ñan aune kä gobrainta Satanankwe mikai krüte Armagedón yebiti ngwane, nememe yete kä täi nitre ie ja mikakäre kukwe metre yekri.
Kukwe nieta Mateo 24:14 yebiti Apocalipsis 16:21, ye nüke gare jene nie, texto Apocalipsis yete blitata jä kri kri bätä. Nita töbiketari bäri nguseta texto ketebu nebätä ngwane, tä blite bäsi kukwe ja erebe bätä nemen gare nie. ¿Ñobätä tä blite kukwe ja erebe bätä? Kukwe kwin Gobran Ngöbökwe ka ngäbitita ño nitrekwe yebiti. Apóstol Pablo tikani, ‘nitre näin ja nire kokwäre’, ye kräke kukwe drieta ye kwin aune “jändrän rä bäne” ye kwrere. Akwa, nitre ja mikaka Ngöbö rüere ye kräke kukwe drieta aune ye käme aune jondron “ngwäkäre rä käme kwrere” tuin ie (2 Cor. 2:15, 16). Satana ñan gobran kwin aune nitre tä ja ngwen käme ye gaite drieta kukwe kwin gobran Ngöbökwe yekwe yebätä nitre brukwä tä kukwe kwin ye kräke (Juan 7:7; 1 Juan 2:17; 5:19).
Kukwe bämikata Apocalipsis 16:21 yete arato “jä kri krubäte” räkäin tibien ye bämikata. Aisete ja tare nikai kri ye ngwane, kukwe driedi metre ta nitre ie, ye köböire nitre jökrä ie Jehová rabai gare ñaka namanina bare jire ye erere (Ezeq. 39:7). ¿Babilonia kri gaite ye bitikäre nitre ie kukwe kwin ye rabai tuin “jändrän rä bäne” ye kwrere aune tö rabai mikai gare jai ai gärätä? Jän nie raba. Kukwe ngwarbe ye gaite ye nitre testiko Jehovakwe nämäne driere kä kwati te ye rükaita törö ie raba ruin nie yebätä.
Ye erere namani bare kukwe keta jata tare namani bare Egipto ye bitikäre. Jehovakwe ‘ngöbö ngwarbe ganinte jökrä’ Egipto yete biti “nitre mada kwati nikani siba niaratre ben” nitre ye ñan israelita akwa ja mikani juta Ngöbökwe yekri kwe (Éx. 12:12, 37, 38). Nitre ñaka israelita ye töi jatani ja mikabätä Jehovakri kukwe keta jätä tare jatani nemen bare niebare Moisekwe ye ngwane.
Nire nire käkwe ja mikai Jehovakri Babilonia kri gaite ye bitikäre yekwe Kristo mräkätre täi kä tibienbätä dimikai köböire niaratre ye kädekai oveja (Mat. 25:34-36, 40). Erametre, jukwe ja nire kokwäre ye täi tikani kä rabaira chi rü Armagedón ye kömikakäre, kä rükai nitre dianinkä nänkäre kä kwinbiti jänäin jökrä kä kwinbiti ngwane.
Ni tare kri Jehovakwe aune tä ni mike tuin bobre jai ye nemen gare kwin nie kukwe nebiti. Aisete “ni jökrä kukwe nuenkä kämekäme Ngöbö rüere, ye abko käkwe tödekadre jökrä Jesubti” ie Jehová tö (2 Ped. 3:9).