10. Tö ngwandre mäi

¿YE NUAINDRE ÑO?

Nire ie tö ngwanta ye tä kukweta ükaninte ye mike täte, kukwe nieta kwe ye erere nuainta kwe aune käre tä kukwe metre niere. Ye köböire, rün, meye, ja ketamuko aune jefe tä tö ngwen ie.

¿NUAINDRE YE ÑOBÄTÄ ÜTIÄTE?

Mä tuanemetre kukwe mada mada nuainne yekäre, käne tö ngwandre bäri mäi.

“Mä rün aune mä meye käkwe tö ngwandre bäri mäi yekäre, mäkwe ja ngwandre ni ünä kwrere aune mäkwe ja ngwandre metre käre, niaratre ngwärekri o kaibe” (Sarahi).

BIBLIA TÄ KUKWE NE DRIERE: “Munta ja ngwen ño ye munkwe bämika jankunu” (2 Corintios 13:5, TNM).

¿MÄ RABA DRE NUAINNE?

Mä rabadre dre nuainne ne kwe mä rün aune mä meye rabadre tö ngwenta mäi o tö ngwandre bäri kwetre mäi ye kukwe mika bike gare jatäri ne käkwe mä dimikai nuainne.

Mäkwe kukwe metre niedre. Mä ni ngökai ngwane, nitre ñaka tö ngwain mäi. Akwa kukweta nainte mäi ye ngwane, mätä ja ngwen metre aune kukwe metre niere ngwane, nitre mada tö ngwain bäri mäi.

“Kukwe metre niebätä kukwe kwin raba nemen nikwe, ye ngwane nuäre niekäre ni kräke, akwa kukwe metre niedre ye rabadre ni ngwen ja gaire, akwa yebiti ta niedre ngwane, nitre tö ngwain bäri nie” (Carlos).

BIBLIA TÄ KUKWE NE DRIERE: Ni “tö jändrän jökrä nuene kuin metre” (Hebreos 13:18).

Kukwe nieta mäkwe erere mäkwe nuaindre. Juta Estados Unidos yete, encuesta nuainbare ye käkwe mikani gare, nitre sribi bökänkä ye bäsi jökrä tä niken sribikä känene ngwane, “nitre tä dre niere erere nuaindre kwetre ye känänta bäri sribikäre”. Mätä ja di ngwen kukwe nieta mäkwe ye erere nuainne ye kwin mä kräke mä rabaira ünä ye ngwane.

“Kukwe nieta tie ye tita nuainne bengwairebe ye ti rün aune ti meye tä gain. Kukwe nuain mananta tie ye tita nuainne ngwane, niaratre tä tö ngwen bäri tie” (Sarah).

BIBLIA TÄ KUKWE NE DRIERE: “Tita kukwe niere, ye erere makwe mikadi täte jökrä gare kuin tie amne tita ja di ribere mae [...], yebti ta makwe kukwe mda mda nuendi bäri kuin” (Filemón 21).

Mäkwe kukwe ngübadre bätärekä. Monso tä nirien ye jutuen mrebe nitre jökrä ie, akwa niena ja ngwen ni ünä kwrere ya ye ñaka raba nemen gare jötrö ngwarbe nie.

“Ni rün, ni meye o nitre mada käkwe tö ngwandre nie ye ñan nemen bare jötrö ngwarbe. Akwa dre nieta nie ye erere nita nuainne käre ngwane, niaratre rabai tö ngwen bäri nie” (Brandon).

BIBLIA TÄ KUKWE NE DRIERE: “Munkwe jändrän jökrä ngibia bätärekä ja täritäri” (Colosenses 3:12).