Kukwe 5
Ngite nemen ki Jerusalén ükaninte ye käi ngwane
Nitre Israel nämene ngite Babilonia ye ngwane, tödeka kwetre nuaninte kukwe keta kabrebiti. Sadrac, Mesac bätä Abednego kitani ñukwäte, akwa Ngöbökwe dianinkä nire kä yekänti. Biti nitre medo bätä persa käkwe Babilonia ganainbare ye bitikäre, Daniel kitani kä mäkäte kwrai akwa Ngöbökwe kriemikani arato, kwra kada dikani kwe.
Mrä mada, rei Ciro käkwe nitre Israel mikani kwäre. Nitre Israel jänikani ngite Babilonia ye bitikäre kä nikani 70 ta aune nükaninta juta kwetre yekänti. Nükaninta Jerusalén ye ngwane, käne sribi kömikani kwetre templo Jehovakwe ye sribekäre. Akwa jötrö ngwarbe nitre rüere ye käkwe sribi kwetre ye ötani. Ye medenbätä, niaratre nükaninta Jerusalén ye bitikäre, kä nikani 22 ta angwane mrä templo ye namani bare ietre.
Biti, Esdras nikaninta Jerusalén templo ye sribekäre bä nuäre ye nikwe mikani gare jai. Templo sribebare täte ye bitikäre, kä nikani 47 ta angwane ye namani bare. Esdras nikaninta Jerusalén ye bitikäre kä nikani 13 ta angwane, ki Jerusalén yebiti nämene tibien ye Nehemías käkwe nitre dimikani sribereta. Kukwe kira KETARIKE kädrieta nekänti kä nikani 152 ta.