Kukwe kira 97
Jesús nükani reire
NITRE nibu jondron käräkä ie kä ñaka tuin Jesukwe mikaninta kwin, ye bitikäre Jerusalén ye ken Jesús nükani juta chi känti. Nitre nänkä ben nibu ie niebare kwe: ‘Mun rika juta yete aune mula tä ngäbäre kwain krati munye. Munkwe tikate aune mun jata ngwena tie.’
Mula ye jänükani Jesús ie aune, namani täkänibiti. Biti, Jerusalén nämene känime yekänti nikani mula yebiti. Namani juta ye ken aune, nitre kwati nikani kain ngäbiti. Nitre jökrä bäsi käkwe dän kwetre ye dianinkä jabätä biti mikani jite kwetre. Nitre mada käkwe balma kä ye mikani jite biti namani niere ja dibiti: ‘¡Ngöbö, mä kukwe kwin nuain rei kite Jehová käbiti yekrä!’
Kirabe Israel yekänti rei mrä nämene niken Jerusalén mula yebiti ja mikakäre gare nitre ie. Erere Jesús nuainbare. Nitre ye tönamani Jesús tuai reire ye bämikani kwetre. Akwa nitre ruäre ñaka tönamani tuai reire. Jesús namani templo aune kukwe namani bare yebätä nüke gare nie.
Templo yete Jesús nitre ie kä ñaka tuin, bätä nitre nakwaninkä ye mikaninta kwin. Ye jutuabare monsotre kia ie aune, namani ja dibiti Jesús käikitekä. Akwa yekwe nitre sacerdote ye mikani rubun, aune niebare kwetre Jesús ie: ‘¿Monsotre kia tä dre niere ye ruin mäi?’
‘Jän,’ Jesús niebare. ‘“Ngöbö monsotre kia ye mikai ja käikitekä” nieta Bibliabätä ye ñaka gare munye?’ Yebätä rei biani Ngöbökwe ye monsotre kia namani käikitekä jankunu.
Monsotre kia ye erere ni tö ja ngwain, ¿ñan ererea? Nitre ruäre ñaka törba ni tuai blite gobran Ngöbökwe yebätä. Akwa jondron kwin krubäte Jesús nuaindi nitre kräke, ye nikwe mikai gare jankunu ni madai.
Jesús nämene Kä tibienbätä ye ngwane ñaka nämene gobrane. ¿Ñongwane kä rükai nuainkäre ie? Nitre nänkä ben ye tönamani mikai gare jai. Ani ye mike gare jai.