Kukwe ja tötikara 7
Ño ni raba nökrö Ngöbö ken orasion yebiti
¿Ñobätä ütiäte krubäte nikwe oradre käre? (1)
¿Nirei nikwe oradre, bätä nuaindre ño? (2, 3)
¿Kukwe meden meden bätä ni raba orare? (4)
¿Ñongwane mä raba orare? (5, 6)
¿Orasion ye jökrä kukwe nuata Ngöbökwe? (7)
1. Oradre nieta ye abokän blitadre Ngöböbe töi bobrebiti meden gärätä. Käre nikwe oradre Ngöböi. Nikwe nuaindi ne erere angwane, ja rabai ruin niara ken nie ja ketamuko tare nikwe ye kwrere. Jehová ye ni kri bätä die krubäte. Akwa nita orare ie angwane tä ni kukwe nuin. ¿Mätä orare käre Ngöböi? (Salmo 65:2; 1 Tesalonicenses 5:17, Kukwe Kuin Ngöbökwe.)
2. Oradre ye ütiäte Ngöbö mikakäre täte. Ye medenbätä, nikwe oradre Ngöbö Jehová ye aibe ie. Jesús nämene Kä tibien nebätä angwane, käre nämene orare Rün kwe ye aibe ie, ñan ni madai. Nikwe nuaindre erere arato. (Mateo 4:10; 6:9.) Akwa käre nikwe oradre Jesús ye käbiti. Ne kwrere nita mike gare Jesús ye abokän ütiäte nikrä. Bätä ja nire biani kwe ni ütiäre, ni kökatarikäre yei nita tödeke. (Juan 14:6, Kukwe Kuin Ngöbökwe; 1 Juan 2:1, 2.)
3. Nikwe oradre Ngöböi ye angwane, nikwe blitadre ja brukwä teri yebiti ben. Nikwe oradre Ngöböi ye angwane orasion ni madakwe namani gare nie ye ñan arabe nietädre jatäri arato tä tikani täräbätä, ye ñan aibätä ni rabadre ñäke. (Mateo 6:7, 8.) Ni raba orare nünaninkä krö, täkäni tibien, ño jökrä erere akwa nuaindre kwin debe ye erere. Bätä nuaindre kä ño jökrä ngwane, bätä kä jökrä känti. Nita orare käbube ja brukwäte Ngöböi ye abokän tä kukwe nuin arato. (1 Samuel 1:12, 13.) Nikwe oradre jakrä ye ngwane nikwe nuaindre kaibe bätä kä kwekebe känti. (Marcos 1:35.)
4. ¿Kukwe meden meden bätä ni raba orare? Ni raba ja driere Ngöböi nita ja mäke ño ben yebätä. (Filipenses 4:6, 7, Kukwe Kuin Ngöbökwe.) Oradre ño ye Jesús käkwe driebare. Niebare kwe nikwe oradre Jehová kä ye ütiäre bätä tö dre tuai nemen bare yebätä. Arato jondron ribeta nikwe ja nirekrä, ye biandre kwe nie nikwe kärädre ie. Nita ja mike ngite ye juandre nibiti ta kwe kärädre ie. Bätä ni dimikadre kwe kä ngwankäre nüke jai ne kwe ni ñaka matadre kukwe käme yete. (Mateo 6:9-13.) Nikwe oradre angwane ñaka töbikadre jabebätä. Jondron tuin kwin Ngöböye yebe kärädre ie. (1 Juan 5:14.)
5. Mä törba debe bian Ngöböi o mä törba niara käikitaikä, ye angwane käre mä raba orare ie. (1 Crónicas 29:10-13.) Kukwe tare rakaka mäbätä bätä mä töimika törba ñaka Ngöbö kukwei mikabätä täte ye angwane mäkwe oradre käre. (Salmo 55:22; 120:1.) Arato mrödre ye känenkri nikwe oradre. (Mateo 14:19.) Jehová kätä ni nübaire nikwe oradre “kärekäre” ie. (Efesios 6:18, Kukwe Kuin Ngöbökwe.)
6. Nikwe ja mikadre ngite kukwe kämebiti ye angwane jötrö oradre Jehovai. Ja muaidre niarabätä ne kwe ni rabadreta tuin bobre ie biti ja mika ngite ye juandre nibiti ta kwe. Ngöbö töita biarebe “ja mika ngite ye juankäre ta”, akwa ne erere rabadre bare gäre nikwe ja mikani ngite ye mikadre gare ie. Biti mada ja di ngwandre ne kwe ni ñaka rabadreta kukwe ye nuainenta. (Salmo 86:5; Proverbios 28:13.)
7. Nitre kukwe kwin nuainkä kätä orare Jehovái ye aibe niarata kukwe nuin. Mä oradre Ngöböi ye kukwe nuadre kwe gäre, mäkwe ja di ngwandre nüne kukwe Kwe ye erere. (Proverbios 15:29; 28:9.) Mäkwe oradre Ngöböi ye angwane, mäkwe nuaindre ja töi bobrebiti. (Lucas 18:9-14.) Mätä dre kärere orasionte ye erere mäkwe nuaindre arato. Yekänti mäkwe mikadi gare mätä tödeke metre bätä mätä ja driere Ngöböi töi bökänbiti. Ye aibe angwane Jehovakwe mä kukwe nuai. (Hebreos 11:6, Kukwe Kuin Ngöbökwe.)