Kukwe ja tötikara 10

¿Kukwe meden meden nuainta abokän tuin käme Ngöböi?

¿Jondron käme nieta Ngöbökwe ye rabadre tuin ño mäi? (1)

¿Ja mika gure meden käme abokän ñaka nuaindre? (2)

¿Ni ngöka ye rabadre tuin ño ni kristiano ie? (3) ¿Jakata ngwian ütiäre ye rabadre tuin ño nie? (3) ¿Go ye rabadre tuin ño nie? (3) ¿Ja meta ye rabadre tuin ño nie? (4) ¿Kukwe ja mäkätä chokabe ye rabadre tuin ño nie? (5) ¿Dröbanika ye rabadre tuin ño nie? (6)

¿Ñokänti ni raba kukwe käme ye tuemetre? (7)

1. Kukwe kwin ye tare nitre Ngöbö mikaka täte yekwe, akwa brukwä rabadre kukwe käme yekrä arato. (Salmo 97:10.) Kukwe ruäre tuin käme Ngöböi ye abokän nikwe ñaka ja töi mikadre nuainne meden gärätä. ¿Kukwe meden meden ruäre gärätä nete?

2. Ni ñaka gure metre akwa nemen jabe: Ni jämi ja mike gure metre känenkri ni nemen jabe, ni tärä gure metre akwa nemen ni madabe, ni jondron nire ngwarbe gwita o känsenta ye mike jabe, ni ja mräkäre ruäre nementa jabe bätä ni brare ruäre nemen jabe, kukwe ne jökrä käme dikaro Ngöbö rüere. (Levítico 18:6; Romanos 1:​26, 27; 1 Corintios 6:​9, 10.) Nitre brare bätä merire nüne jabe akwa ñaka ja mike gure metre, ye abokän käkwe ja diandrekä mento o, ñakare aune, ja mikadre gure metre kwetre. (Hebreos 13:4.)

3. Ni ngöka, jakata ngwian ütiäre, go: Ngöbö Jehová ñaka raba ni ngökö. (Tito 1:2.) Ye medenbätä nire törba ja kan ngäbitimana ie käkwe ñaka ni ngökadre. (Proverbios 6:​16-19; Colosenses 3:​9, 10.) Jadaka ngwian ütiäre ye jökrä kätä ni töimike jondron tuabätä bäri jakwe. Ye medenbätä nitre kristiano ñaka “lotería” o “número” ye kökö ngwian ganainkrä jai. Arato ñaka ja gain ngwianbätä niata mädäbiti ye ütiäre. (Efesios 5:​3-5.) Ñaka gore, jondron goibare ye ñakare kökö. Arato ñaka niken jondron jenena ye ngwena jai ja töbiti. (Éxodo 20:15; Efesios 4:28, Kukwe Kuin Ngöbökwe.)

4. Rubun krubäte, ja meta: Ni nemen rubun krubäte ye abokän raba ni töimike ni mada nuainne tare. (Génesis 4:​5-8.) Nitre töi käme ja metabätä ye ñaka raba ja mäke Ngöböbe. (Salmo 11:5; Proverbios 22:​24, 25.) Nikwe ja ngie mikadre ye ñaka debe. Ni mada käkwe kukwe tare nuaindre nibätä angwane ni ñaka rabadre nuainne erere arato. (Proverbios 24:29; Romanos 12:​17-21.)

5. Ja mika sukiare bätä ja mäkätä chokabe: Nitre ruäre tä blite chokalitre yebe ne kwe brenbätä ye kräkäi mikadre kwetre. Nitre ruäre abokän tätre kwra bien nitre rüere yei ne kwe jatadre bren o gatadre. Kukwe ne jökrä nuainta Satana ye köböire. Ye medenbätä ni kristiano ñaka rabadre kukwe ne nuainne jire chi. (Deuteronomio 18:​9-13.) Ni tädre Jehová ye ken ye bäri kwin ne kwe ni kriemikadre nitre kwrare ye rüere. (Proverbios 18:10.)

6. Dröbanika: Bino, serbesa o dö mada kwaka ñadre chi ye ñaka käme. (Salmo 104:15; 1 Timoteo 5:23.) Akwa dö ñadre krubäte bätä dröbanikadre ye ñaka tuin kwin Ngöböi. (1 Corintios 5:​11-13, Kukwe Kuin Ngöbökwe; 1 Timoteo 3:8.) Dö ñadre krubäte raba ni mike bren bätä nüna kwin ja mräkäbe ye raba juen ngwarbe. Ne mada, raba bäri jötrö ni töimike kukwe mada käme nuainne. (Proverbios 23:​20, 21, 29-35.)

7. Kukwe käme ñäkäita Ngöbökwe nitre kätä nuainne ye abokän “gobran Ngöbökwe ñaka rabai kwe”. (Gálatas 5:​19-21.) Ngöbö tare metre mäkwe aune mä tö kä mikai jutobätä, mä raba kukwe käme ye tuemetre. (1 Juan 5:3.) Jondron käme nieta Ngöbökwe ye mäkwe ja brukwä mika kräke arato. (Romanos 12:9.) Nitre ja ngwen kwin Ngöbö mike metre täte yebe mä ja keta. (Proverbios 13:20.) Ni mräkätre kristiano niena täte kukwebätä ye raba ni dimike krubäte. (Santiago 5:14.) Akwa bäri bitita, mäkwe oradre Ngöböi niara ye raba mä dimike. (Filipenses 4:​6, 7, 13.)

[Jondron üai bämikani página 20 aune 21]

Dröbanika, go, jakata ngwian ütiäre bätä ja meta ye tuin käme Ngöböi