Kukwe ja tötikara 11
Kukwe mikata täte jai bätä nuainta abokän ñaka nemen kwin Ngöbökrä
¿Kukwe meden mikata täte bätä nuainta abokän käme? (1)
¿Nitre kristiano raba nütüre Ngöbö ye ni nimä Ngöböre itibe? (2)
¿Ñobätä nitre kristiano erametre ñaka Nabidad, Año Nuebo bätä kumpleaño, ye käi ngwen juto jabätä? (3, 4)
¿Nitre krütanina ye raba ni nire ye nuainne tare? (5)
¿Jesús ye murie ketani krusobätä? (6)
¿Ñobätä ütiäte krubäte Ngöbö mikadre täte? (7)
1. Kukwe jökrä mikata täte bätä nuainta ye ñaka käme. Akwa kukwe kite nitre kukwe ngwarbe driekä Ngöböbätä yekri o kukwe tikani Bibliabätä erere ñaka drieta ye abokän ñaka nemen debe Ngöbökrä. (Mateo 15:6.)
2. Ngöbö nimä: ¿Jehová ye abokän ni nimä, Ngöböre itibe? Ñakare. Jehová, Jesús Rün, niara ye “aibe itibe Ngöbö metre”. (Juan 17:3; Marcos 12:29.) Jesús ye abokän Monso mubai Kwe, Ngöbö yeta bäri Jesús ye bitita. (1 Corintios 11:3.) Rün ye bäri kri Monsoi kwe yekrä. (Juan 14:28.) Üai deme nieta ye abokän ñan ni nire; ye Ngöbö die kri medenbiti tä jondron jökrä nuainne ye meden gärätä. (Génesis 1:2; Hechos 2:18.)
3. Nabidad bätä Año Nuebo: Jesús ñaka därebare köbö 25 diciembre ye näire. Sö octubre köböi kena ye käi ngwane Jesús därebare. Kä ye ngwane, nitre obeja ngübaka nämene obeja ngübarebiti jubäre dibire. (Lucas 2:8-12.) Jesús därebare ye käi ngwandre juto jabätä, ye ñaka nuain manamene kwe nitre kristiano yei. Niara ja nire biani yebrä ngwandre törö jai kwetre niebare kwe ietre. (Lucas 22:19, 20, Kukwe Kuin Ngöbökwe.) Nabidad aune jondron nuainta ye näire ye abokän dätebare kirabe nitre kukwe ngwarbe driekä Ngöböbätä ye käkwe, meden abokän nuainta nükebe kä nengwane. Ne erere ni raba niere Año Nuebo bätä jondron nuainta ye näire yebätä arato. Nitre kristiano kena ñaka nämene Nabidad bätä Año Nuebo ye sribere. Nitre kristiano metre kä nengwane ñakare nuainne arato.
4. Kumpleaño: Kumpleaño ketebukebe sribebare kädekateta Bibliabätä. Ne abokän nitre ñaka Jehová mike täte käkwe nuainbare. (Génesis 40:20-22; Marcos 6:21, 22, 24-27.) Nitre kristiano kena ñaka nämene kumpleaño ye sribere. Kukwe ne dätebare kirabe nitre kukwe ngwarbe driekä Ngöböbätä ye käkwe, meden abokän nuainta nükebe kä nengwane. Nitre kristiano erametre tätre jondron bien jai. Arato tätre kä denkä jai kä ngwankäre juto jabätä gwairebe köbö mada ngwane.
5. Nitre krütanina jürä ngwanta jabätä: Nitre krütanina ye ñan raba dre nuainne arato ñaka nemena ruin jire chi ngrabare. Ni ñaka raba dimike, bätä niaratre ñaka raba ni nuainne tare. (Salmo 146:4; Eclesiastés 9:5, 10.) Ni nire tä krüte, ñaka niken nüne jankunu gata ye bitikäre. Akwa ruäre angele käme, kädekata chokali, tä ja bä kwite ni krütanina ye kwrere. Ni krütanina jürä ngwandre jabätä o mikadre täte, kukwe ye jökrä käme. (Isaías 8:19.)
6. Kruso: Jesús ñaka murie ketani krusobätä, murie ketani kribätä. Biblia kabrebätä kukwe griego ye kwitani abokän ie “kruso” nieta, ye abokän kri kratibe meden gärätä. Kruso bä mikata ye abokän kite kirabe nitre kukwe ngwarbe driekä Ngöböbätä yekri. Nitre kristiano kena ñaka nämene kruso ye ngwen bätä ñaka nämene mike Ngöböre jai. Ye medenbätä, ¿nikwe kruso ngwandre Ngöbö mikakäre täte ye kwin raba ruin mäi? (Deuteronomio 7:26; 1 Corintios 10:14.)
7. Kukwe mikata täte bätä nuainta ye abokän ñaka nuäre tuanemetre nikrä. Ruäre ni mräkätre o ni ja ketamuko nikwe ye ñaka törba kukwe ye tuametremana nie. Akwa Ngöbö mikadre täte ye bäri ütiäte ni mada yebätä. (Proverbios 29:25; Mateo 10:36, 37, Kukwe Kuin Ngöbökwe.)
[Jondron üai bämikani página 22]
Ngöbö ye ñaka ni nimä
[Jondron üai bämikani página 23]
Nabidad bätä Año Nuebo ye kite kirabe nitre kukwe ngwarbe driekä Ngöböbätä yekri
[Jondron üai bämikani página 23]
Ni krütanina ye ni ñaka raba mike täte bätä jürä ngwen jabätä