Kukwe ja tötikara 16

Mäkwe ja töi mikadre Ngöbö kukwei mike täte

¿Mäkwe dre nuaindre ne kwe mä rabadre ja mäke Ngöböbe? (1, 2)

¿Ño mä raba ja denkä mento Ngöbö mikakäre täte? (1)

¿Ñongwane mä raba ja ngökö ñöte? (2)

¿Ñokänti ja di raba kwen mäi ne kwe mä tädre käre Ngöbö mike metre täte? (3)

1. Mä rabadre ja mäke Ngöböbe gäre, mäkwe ja tötikadre kwin kukwe metre Bibliabätä yebätä (1 Timoteo 2:​3, 4), kukwe nüke gare mäi yei mäkwe tödeka metre (Hebreos 11:6), ja rabadre ruin ngite mäi jondron käme mäkwe nuainbare yebätä (Hechos 17:30, 31) bätä ni nämene dre nuainne käne ye rabadre nie biti ja töi kwitadre. (Hechos 3:​19, Kukwe Kuin Ngöbökwe.) Ne biti mada Ngöbö tare mäkwe aune ye käkwe mä töi mikadre, ja denkä mento niara mikakäre täte. Ne gärätä abokän, mä rabadre blite kaibe Ngöböbe, känti mäkwe niedre ie mätä ja bien ie niara kukwei mikakäre täte. (Mateo 16:​24, Kukwe Kuin Ngöbökwe; 22:37.)

2. Mäkwe ja tötikadrera Ngöbö kukweibätä biti mäkwe ja diandrekä mento ye angwane, mäkwe ja ngökadre ñöte mada. (Mateo 28:​19, 20.) Ja ngökadre ñöte ye käkwe mikadi gare ni jökrä ie mäkwe ja dianinkä Jehová mikakäre täte. Ne medenbätä nitre töi niena Ngöbö kukwei mikakäre täte ye aibe raba ja ngökö ñöte. Nita ja ngökö ñöte ye aune ni ngrabare ye tädre ngökani täte ñöte jötrö ngwarbe.a (Marcos 1:​9, 10; Hechos 8:36.)

3. Mäkwe ja diandrekä Ngöbö kukwei mikakäre täte, ye bitikäre Jehovata ngübare mäkwe ja kukwe kitaninkä ie ye ererebätä mäkwe nünandre arato. (Salmo 50:14; Eclesiastés 5:​4, 5.) Diablu törbai mä diainkä mento ne kwe mäkwe ñaka Jehová kukwei mikadre täte. (1 Pedro 5:8, Kukwe Kuin Ngöbökwe.) Akwa mäkwe kröta Ngöbö ken orasion yebiti. (Filipenses 4:​6, 7, Kukwe Kuin Ngöbökwe.) Mäkwe ja tötika Kukwe kwe yebätä käre mantre jetebe. (Salmo 1:​1-3.) Mäkwe sribi gwaire konkrekasion yebe. (Hebreos 13:​17, Kukwe Kuin Ngöbökwe.) Mäkwe ne nuaindi jökrä aune, ja di kwain mäi Ngöbö mikakäre metre täte. Ne erere angwane Ngöbö tö dre nuainmana mäi ye mä raba nuainne kärekäre.

[Nota]