Kukwe ja tötikara 3

Nikwe Ngöbö mikadre gare jai

Ja mäkädre Ngöböbe gäre, nikwe mikadre gare jai. Nitre ja mäke nibe ye ie ni kä gare yebiti tä ni kädeke, ¿ñan ererea? Ye erere arato nikwe Ngöbö kä mikadre gare jai bätä nikwe kädekadrete ie niara tö. Ngöbö kä Jehová (Salmo 83:18; Mateo 6:9). Ne madakäre, dre tuin kwin ie bätä dre tuin käme ie ye rabadre gare nie, nireta ja mäke ben bätä nireta niara rüere ye rabadre gare nie arato. Ni mada ñaka tä nüke gare kwin jötrö nie, ye medenbätä Biblia kätä niere töbikadre kwin ja käne aune kä diandrekä jai Jehová ye mikakäre nüke gare kwin jai (Efesios 5:​15, 16).

Dre tuin kwin Ngöböi, ye erere nitre tä ja mäke ben kätä nuainne. Töbike ni ja ketamukotre mäkwe yebätä. Mäkwe ñaka kadre ngäbiti kwin aune jondron käme ñaka debe kräke mäkwe nuaindrebätä, ¿tädre ja mäke mäbe? Ñakare. Ye erere arato, ni törba ja mäkäi Ngöböbe, aune dre tuin kwin ie ye erere nikwe nuaindre (Juan 4:​24).

Kukwe jökrä drieta ye ñaka kätä ni dimike ja mäke Ngöböbe. Jesús, ja ketamuko bäri kwin Ngöbökwe, käkwe blitabare ji krobubätä. Krati kwata kri yebiti ni kwati tä dikekä. Ji ne tä niken ni ngwena gata kokwäre. Ji krati abokän krä chi yebiti ni braibe tä dikekä. Ji ne niken ni ngwena nünankäre kärekäre. Ne medenbätä ni törba ja mäkäi Ngöböbe, aune niara mikadre ño täte metre ye nikwe mikadre gare jai (Mateo 7:​13, 14).