¿Üai ñaka ngatain ye tärä nibätä?

¿JA NIRE tärä gata ye bitikäre? Kukwe ngwantarita ne käkwe ni Kä nebätä ngwanina töbike krubäte kä mili kwati te. Kirabe nükebe ne näire, nitre bätäkä käkwe töbikabarera kukwe nebätä, aune yebätä kukwe keta kabre mikanina era jai jatäri.

Kä jökräbiti tibien, ni kwati kätä nütüre nita krüte ye bitikäre “üai” yeta nemente nire. ¿Nita krüte ye ngwane jondron tärä nibätä abokän tä niken mento aune tä nemente nire? Üai ni nire yebätä, ¿ye dre gärätä? Nita krüte ye bitikäre, ¿dreta nemen bare üai yebätä? Biblia, Kukwe Ngöbökwe, ye kätä kukwe metre mike gare nie aune kätä ni töimike jäme kukwe ngwantarita nebätä.

¿Üai ye dre gärätä?

Biblia yebätä, kukwe kwitani ie üai nieta ye abokän metrere “mürie” gärätä, akwa nita mürie jäke ye ñan aibe gärätä. Ñodre, Biblia yebätä Santiago kukwe tikaka käkwe niebare: “Ni üai ñakare nibtä angwane, nita nebe ngwäkäre” (Santiago 2:26, Kukwe Kuin Ngöbökwe). Ye medenbätä, üai ye abokän kätä ni ngrabare mike nire meden gärätä.

Ni die kätä ni mike nire ye abokän mürie kätä näin ni bukrän ngrabare ye ñan aibe gärätä. ¿Ñobätä? Ne ñan ñobätä ni ñaka tärä nemen mürie jäke ye ngwane, ni ngrabare ye tä nemente nire kä braibe te: “minuto kabre te”, tärä The World Book Encyclopedia yeta niere. Ye medenbätä ni mürie mika töta nementa ye ruäre tä nemen bätä jondron ni teri ye kwita raba. Akwa, ni die kätä ni ngrabare mike nire ye tä krüte ye angwane ni mika ñaka raba nüketa nire. Mürie ñaka abokän raba ni ngrabare ye miketa nire jire chi. Ye medenbätä, üai, ye abokän ni nire die abokän ñaka raba tuin ye gärätä, ne abokän kätä ni ngrabare ye mike nire. Mürie jäkätä ye köböire di ye ñaka krüte (Job 34:​14, 15).

¿Üai ye kätä ni ye aibe mike nire? Biblia ye kätä ni dimike kukwe ne mike nüke gare metre jai. Salomón rei töbätä käkwe kukwe tikani: “Nitre kä nebätä monsoi ye üai niken kwin, ¿ye abokän nirei gare?; aune jondron känsenta ye üai, ye abokän niken nguse dobrote, ¿ye nirei gare?” (Eclesiastés 3:21). Ye medenbätä, Biblia kätä niere erere, jondron känsenta üai tärä ni nire ye erere arato. ¿Se abokän ñokänti ne erere?

Üai, o di kätä ni mike nire, ye bämika raba electricidad die kätä makina mike näin ye kwrere. Ye ñaka tuin nie, akwa raba jondron keta kabre nuainne makina medente mikadre ye ererebätä. Ñodre, estufa ye käi ngire, radio ye kukwei nua raba bätä telebision yete jondron üai tua raba ngö nua raba arato. Akwa, electricidad die ye ñaka nemen makina mikata näin kwe ye kwrere. Ye die aibe jankunu jerekäbe. Ye bä erere arato, die kätä ni mike nire ye ñaka nemen ni nire o jondron nire mikata nire kwe ye kwrere. Ñaka ja ngwen ni erere aune ñaka raba töbike. Ni nire bätä jondron känsenta ye “jökrä üai ja erebe” (Eclesiastés 3:19). Ne medenbätä, nita krüte ye ngwane, üai kwe ye ñaka niken nüne kä madakänti ni üaire ye kwrere.

Angwane, ¿nitre krütanina ye tä ño? Aune ¿nita krüte ye bitikäre dreta nakainkä üai yebätä?

“Mä näinta dobrote”

Ni brare kena, Adán, käkwe nierare Ngöbö kukwei mikani ñaka täte ye ngwane, Jehová käkwe niebare ie: “Makwe sribidi tare kri krübäte, köböire makwe mrödi köbö kwatirekwatire. Abti ma krütadi angwane, ma näinta dobote, ñobtä ñan angwane dobo dätebare mare, aisete ma rikwitadita dobore” (Génesis 3:19, Jändrän Jökrä Namani Bare Ño Kena). ¿Adán sribe jämi dobro yebiti Jehovakwe ye känenkri nämene medente? Ñaka nämene kä madakänti. Niara ñaka nämene jire chi. Ye medenbätä, “näinta dobote” Ngöbö Jehová käkwe niebare ie ye ngwane, Adán krütai gäräbare ie. Niara ñaka näin kä madakänti nüne ni üaire kwrere. Niara krütadre ye ngwane rikwitai jondron ngwarbe ñaka nire ye kwrere, niara ñaka nämene käne ye erere. Yekänti mikani ja ngie ngwen gata yebiti, —ñaka namanina nire⁠— ñaka nikani kä madakänti (Romanos 6:23).

¿Nitre mada mada krütanina yebätä dre nie raba? Eclesiastés 9:5, 10 ye kätä kukwe metre mike gare nie nitre krütanina yebätä: “Nitre krütanina ye ie kukwe ñaka gare [...] Kukwe köböikite ñakare, töbika ñaka jire chi dobo yete” (Moffatt, tikani inglere). Ye medenbätä, gata ye abokän ni ñaka ye erere arato. Ni salmo tikaka käkwe niebare, nita krüte ye ngwane, “üai yeta niken mento, niarata nikenta dobrote; ye näire erametre töita krüte jökrä” (Salmo 146:4).

Nibira gare metre nie, nitre krütanina ye töi ñaka jire chi aune ñaka niena jondron nuainne. Kukwe ñaka gare jire chi ie. Ni ñaka raba tuin ie, ñaka raba ni kukwei nuin, ñaka raba blite nibe. Ñaka raba ni dimike ñaka raba ni nuainne tare, ye medenbätä, ni ñaka raba jürä ngwen jabätä jire chi. Akwa ¿nita krüte ye angwane üai tä ‘niken mento’ nieta ye dre gärätä?

Üai yeta “nikenta Ngöbö erametre yei”

Biblia kätä niere, nita krüte ye angwane, “üai yeta nikenta Ngöbö erametre käkwe biani yei” (Eclesiastés 12:7). ¿Nebätä ni raba niere üai yeta nikenta metre mutate ta ja tuakäre Ngöbö ngwärekri? ¡Ye erere ñaka! Biblia yebätä, kukwe kädekata nikenta ye abokän nita nikenta metre kä madakänti ye ñan aibe gärätä. Ñodre, nitre Israel käkwe ñaka ja mikani täte ye ie niebare: “ ‘Näinta tikwäre, aune erametre ti näinta munkwäre’, Jehová nitre üaire rükä jie ngwanka kätä niere”(Malaquías3:7). ‘Näinta’ Jehovakwäre, ye abokän Israel, käkwe kukwe käme ye mikadrete bätä ja ngwandreta kukwe kwin metre Ngöbökwe ye erere kwetre meden gäräbare. Jehová, ‘näinta’ nitre Israel yekwäre, ye abokän niarakwe kukwe kwin ñäkäita juta kwe yekrä bobukäre meden gäräbare. Kukwe “näinta” niebare bobu, ye abokän ja töi kwitadre meden gäräbare aune ni rikadre metre kä madakänti ye ñan ai gäräbare.

Ye erere arato, üaita “nikenta” Ngöböi ye angwane, ñaka tä niken Kä nebätä nemen kä kwinbätä. Nikwe ngwandre törö jai üai ye abokän ni nire die. Ni die ye tä niken nikän aune, Ngöbö aibe raba di ye bienta nie bobukäre. Yebätä üai tä “nikenta Ngöbö erametre yei” ye abökän Ngöbö aibe raba ja nire ye bienta kä ja känenkäre yete nie ye meden gärätä.

Ñodre, ani miketari ñärärä Biblia kätä dre niere Jesús krütani yebätä. Lucas kukwe tikaka ye käkwe niebare: “Jesukwe ngratebare kri, käkwe niebare: ¡‘Ti Rün, ti bike ja üai mike gare mae!’ niebare kwe. Ye btäräbe krütani” (Lucas 23:46, Kukwe Kuin Ngöbökwe). Jesús ñaka nikani metre kä kwinbätä üai nikani mento niarabätä ye ngwane, ñobätä ñan aune niara nükaninta nire köbö köbömäkäre te biti nuabare kwe köbö gre ketebu aune nikaninta kä kwinbätä (Hechos 1:3, 9). Ñakare aune, namanina bäsi krütakäre aune, Jesús käkwe ja üai mikaninte niara Rün kisete, Jehová käkwe ja nire biainta ie nämene gare ie yebätä.

Yebätä, erametre, Ngöbö aibe raba ni miketa nüne bobukäre (Salmo 104:30). ¡ Jondron kwin krubäte mikata ni käne!

Jondron kwin käbämikata metre

Biblia kätä niere: “Kä rükai näre angwane nitre jökrä tä dobote ngwankäre törö ye ietre [Jesús] kukwe juruai aune jataita kä mrebiti” (Juan 5:28, 29). Jesukristo käkwe käbämikani nitre jökrä tä Jehová töite ye rükaita krö, rabaita nire. Nitre krütai ye kukwei nie ñaka rabaira, ñakare aune nitre gaikröta nire mikai gare nie. ¡Ni mräkätre tare nikwe krütani kain ngäbitita nire ye käi rabai juto krubäte nibätä!

Jondron kwin käbämikata Ngöbökwe ni käne ye ñokänti raba nemen mäkwe, ye mä törba mikai gare jai, aune mä raba täräkwata ¿Ngöbö tö dre nuainmana nie? ye kärere jakrä; yekäre mäkwe tärä tika biti mäkwe juan kä kädekateta ngösöri bäri mä ken yekänti.