Kukwe niebare abokän rabai bare kä jökräbiti

NITRE apóstol nibokä nämene ngutuä Olivo yekänti aune yete juta Jerusalén aune templo ye nämene tuin kwin menteni. Jesukwe kukwe niebare ye mikadre nüke gare kwe nitre apóstol yei niebare kwetre ie. Templo ye juain ngwarbe niebare Jesukwe, aune ye känenkri blitabare kwe “kukwe rakadikä kä mrä” näire yebätä (Mateo 13:40, 49). Aisete ngwanintari kwetre ie: “¿Ngöbökwe kä ne juandi ngwarbe jökrä makwe nini, ye abko rakadikä ñongwane? Erere arato, ma jatadreta bobuta amne kä ne rikai ta, ye abko bä mikadi ño nunye abko makwe niedre nunye” (Mateo 24:3).

Jerusalén aune templo juain ngwarbe ye känenkri dre dre rabai bare ye Jesukwe mikani gare ietre. Akwa kukwe niebare kwe ye rabadi bare kä jökräbiti. Jesús rükaita ñongwane ye rabadre gare nitre ie yekäre nitre tädre mokre kukwe rabai bare yebätä: kukwe keta kabre rabai bare kä jökräbiti jatäri. Kukwe rabai bare ye käkwe mikai gare Jehovakwe Jesús mikaira Reire gobrankäre aune gobran yekwe kukwe blo mikadre krüte aune ni mikadre nüne jäme kä jökräbiti tibien ye käi rabaira no. Kukwe keta kabre rabai bare niebare Jesukwe yekwe mikai gare kukwe kä nebätä, gobrantre, nitre jondron kä nebätä nuainkä aune nitre kukwe keta kabrebätä ye jökrä gaite. Biti nüna jatai kä bä nuäre yete.

Jesús rabai reire kä kwinbiti ye ngwane, Kä jökräbiti tibien rü, mrö nika, dobo kri aune bren bätäkä ngwarbe rabai niebare kwe. Kukwe ükaninte mikakäre täte ye ñaka mika jatai ütiäte jai. Ne madakäre, nitre ja tötikaka metre kwe yekwe kukwe kwin Gobran Ngöbökwe yebätä driei kä jökräbiti tibien. Mrä “ja tare nikadi kri krübäte”, ye abokän kukwe ñaka rakakabare erere rakaikä (Mateo 24:21).

¿Kukwe tare ye käi rabaira no ye ñokänti rabadi gare nitre kristiano ie? Jesukwe niebare nitre ja tötikaka kwe yei: “Higokrie btä kukweta nakenkä ño, yebtä munkwe ja töitika” (Mateo 24:32). Higokrie tä kite käbiti ye ngwane, kä moren nemena no. Ye erere, Jesukwe kukwe keta kabre niebare ye jatadre nemen bare jatäri ye ngwane kä krütai rabaira ja ken ye rabadre gare. Akwa, ja tare nikai kri ye kömikai köbö medente aune ora nuäi te ye gare Ngöbö aibe ie niebare Jesukwe. Yebätä, niebare kwe: “Mun tädre ngwäte käre [...], ñobätä ñakare angwane köbö ye ñongwane metre ñakare tärä gare” (Marcos 13:33, Ngöbö Täräe, tärä okwä ükaninte).

(Dianinkä Mateo kapitulo 24 aune 25, Marcos kapitulo 13 bätä Lucas kapitulo 21 yebätä.)