KUKWE JA TÖTIKARA 4
¿Nire abokän Jesukristo?
1. ¿Ñokänti Jesús nükani?
¿Jesús töi meden kwin köböire ni jökrä tö nämene blitai ben? (MATEO 11:29; MARCOS 10:13-16)
Ni kä tibienbätä abokän nire metre, akwa Jesús rükadre Kä tibienbätä ye känenkri nämene ni üaire erere kä kwinbiti (Juan 8:23). Jehovakwe niara ye sribebare kena aune Jehová dimikani kwe jondron jökrä sribere. Biblia tä kädeke “Ngöbö Odei itibe” ñobätä ñan aune niara aibe sribebare kaibe Ngöbökwe (Juan 1:14). Arato, niara kädekata “Kukwe”, ñobätä ñan aune niarakwe Rün kukwei mikani gare. Mäkwe ñäkä Proverbios 8:22, 23, 30 aune Colosenses 1:15, 16 yebätä.
2. ¿Ñobätä Jesús jatani Kä tibienbätä?
Ngöbökwe Monsoi ye juani Kä tibienbätä. Ye nuainkäre, mikani nüke nire kwe María, meri iti bati jämi ja mike gure yebätä. Ye medenbätä Jesús rün ñaka kä tibien nebätä (Lucas 1:30-35). Niara jatani Kä tibien nebätä kukwe ketamä nuainkäre: 1) jatani kukwe metre driere Ngöbö yebätä, 2) kukwe tare yebiti ta Ngöbö mikadre täte ño ye bämikani kwe ni käne, aune 3) ja nire ngite ñakare biankäre ni “kökatarikäre”. Mäkwe ñäkä Mateo 20:28 yebätä.
3. ¿Ñobätä ni kökataridre ye nita ribere jai?
Ni kökatarita ye jondron bianta ni mada ütiäre mikakäre kwäre gärätä (Éxodo 21:29, 30). Ni rabadre umbre aune ni krütadre yei Ngöbö ñaka tö namani kena. Kukwe ye gare nie ñobätä ñan aune Jehovakwe niebare Adán ie, niara ja mikai ngite o ñaka kukwei mikai täte angwane krütai. Niara ñaka ja mikadre ngite akräke ñaka krütadre jire (Génesis 2:16, 17; 5:5). Biblia tä mike gare, Adán köböite gata ‘jatani’ kä tibien nebätä. Kukwe ne tä mike gare Adán ngite juani ni jökräbiti aune ye köböite nita krüte. Ye medenbätä, ni kökataridre ye ni jökrä tä ribere jai. Mäkwe ñäkä Romanos 5:12 aune 6:23 yebätä.
¿Nire rabadre ni kökötari aune ni mike kwäre gata yebätä? Nita krüte ye ngwane nita ja mika ngite ye ütiä bien. Ni ngite ye medenbätä ni ñaka raba ngite ni madakwe ye ütiä bien. Mäkwe ñäkä Salmo 49:7-9 yebätä.
4. ¿Ñobätä Jesús krütani?
Ni abokän ngite, akwa Jesús töi nämene metre aune ñaka ja mikani ngite jire kwe. Ye medenbätä niara ñaka krütani ngite kwe ütiäre, ñakare aune nuainbare kwe ngite nitre madakwe ütiä biankäre. Ngöbökwe Monso kwe juani ja nire bien ni ütiäre yebiti bämikani kwe, ni tare krubäte kwe. Jesukwe Rün kukwei mikani täte aune ja nire biani kwe ni mikakäre kwäre ngite aune gata yebätä, yebiti bämikani kwe ni tare kwe arato. Mäkwe ñäkä Juan 3:16 aune Romanos 5:18, 19 yebätä.
Video ¿Ñobätä Jesús murie ketani? mikadre ñärärä.
5. ¿Jesús tä dre nuainne kä nengwane?
Jesús nämene Kä tibien nebätä angwane, nitre bren mikaninta kwin kwe, nitre krütani ganinkröta kwe aune nitre nämene ja tare nike ye dimikani kwe, dre nuaindi kwe kä ja känenkäre yete nitre Ngöbö mikaka täte metre kräke ye bämikani kwe (Mateo 15:30, 31; Juan 5:28). Jesús krütani ye bitikäre, Ngöbökwe ganinkröta aune mikaninta nire kwe kä kwinbiti ni üaire erere (1 Pedro 3:18). Rün käkwe niara kädekadre reire Kä tibien nebiti ye nämene ngübare Rün kise ruin yekri (Hebreos 10:12, 13). Kä nengwane, Jesús tä gobrane kä kwinbiti, aune nitre ja tötikaka ben tä kukwe kwin ye mike gare kä jökräbiti tibien. Mäkwe ñäkä Daniel 7:13, 14 aune Mateo 24:14 yebätä.
Ngöbökwe niara kädekani Rei dite kri, yebiti gwäune nitre kukwe käme nuainkä aune tä nitre ngwen ja tare nike ye gaite kwe. Ni jökrä tä tödeke Jesubiti aune kukwei mike täte ye nünain kä jutobiti Kä tibien kwitai bä nuäre yete. Mäkwe ñäkä Salmo 37:9-11 yebätä.